રાજસ્થાનના કેપ્ટન મહિપાલ લોમરોર ઇંગ્લેન્ડમાં ચમકવા તૈયાર: સરે સાથે છ મેચ માટે કરારબદ્ધ
ભારતીય સ્થાનિક ક્રિકેટમાં પોતાના સતત અને પ્રભાવશાળી પ્રદર્શનથી ઓળખ બનાવનાર રાજસ્થાનના ૨૬ વર્ષીય કેપ્ટન મહિપાલ લોમરોર હવે ઇંગ્લેન્ડની કાઉન્ટી ચેમ્પિયનશિપમાં પોતાની પ્રતિભા દર્શાવવા માટે સજ્જ થયા છે. વિદેશી પરિસ્થિતિઓમાં પોતાની ક્ષમતા સાબિત કરવા માટે લોમરોર માટે આ એક અત્યંત મહત્વપૂર્ણ તક માનવામાં આવી રહી છે. જાણીતી કાઉન્ટી ક્લબ સરે (Surrey) એ ૨૦૨૬ કાઉન્ટી ચેમ્પિયનશિપ સિઝનની છેલ્લી છ મેચો માટે આ યુવા ભારતીય ઓલરાઉન્ડર સાથે કરાર કર્યા છે.
સરેને કેમ પડી લોમરોરની જરૂર?
સરેની ટીમ હાલમાં ખેલાડીઓની અનુપલબ્ધતા અને ઈજાઓની સમસ્યાનો સામનો કરી રહી છે. ટીમના મહત્વના ખેલાડી ડેન લોરેન્સને પાકિસ્તાન સામેની આગામી ટેસ્ટ શ્રેણી માટે ઇંગ્લેન્ડની રાષ્ટ્રીય ટીમમાં વાપસીનું બુલંદ તેડું આવ્યું છે. બીજી તરફ, સ્ટાર ઓલરાઉન્ડર વિલ જેક્સ હાલમાં પગની ઘૂંટીની ઈજામાંથી પુનઃપ્રાપ્તિ (recovery) મેળવી રહ્યો છે, જેના કારણે તે હાલ સ્પિન બોલિંગ કરવા માટે સંપૂર્ણ રીતે ફિટ નથી.
આ બંને મુખ્ય ખેલાડીઓની ગેરહાજરીને કારણે સરેના મિડલ ઓર્ડર અને સ્પિન વિભાગમાં મોટી જગ્યા ખાલી પડી હતી. આ જરૂરિયાતને પૂરી કરવા માટે તેમણે ભારતના મધ્યમ ક્રમના ડાબોડી બેટ્સમેન અને ઉપયોગી ડાબા હાથના સ્પિનર મહિપાલ લોમરોર પર પસંદગીનો કળશ ઢોળ્યો છે.
સરેના પુરુષ ક્રિકેટ ડિરેક્ટર એલેક સ્ટુઅર્ટે લોમરોરના ટીમમાં સમાવેશ અંગે ખુશી વ્યક્ત કરતા જણાવ્યું હતું કે, ડેન લોરેન્સની ગેરહાજરી અને વિલ જેક્સની સ્પિન બોલિંગ ન કરવાની અસમર્થતાને ધ્યાનમાં રાખીને ટીમને એક એવા બેટ્સમેનની સખત જરૂર હતી જે બેટિંગ મજબૂત કરવાની સાથે જરૂર પડે ત્યારે થોડી ઓવરો સ્પિન બોલિંગ પણ ફેંકી શકે. લોમરોર આ માટે યોગ્ય વિકલ્પ છે.
બેટ અને બોલથી શાનદાર ટ્રેક રેકોર્ડ
મહિપાલ લોમરોરનો પ્રથમ વર્ગ (First-Class) ક્રિકેટમાં રેકોર્ડ ખૂબ જ પ્રભાવશાળી રહ્યો છે. તેણે અત્યાર સુધીમાં ૬૩ ફર્સ્ટ-ક્લાસ મેચોમાં ૪૨.૬૨ ની ઉત્કૃષ્ટ સરેરાશથી ૩,૮૩૬ રન બનાવ્યા છે. તેની કારકિર્દીનું સૌથી મોટું આકર્ષણ તેણે ફટકારેલી અણનમ ત્રિપલ સેન્ચુરી (૩૦૦*) છે. બેટિંગ ઉપરાંત, પોતાની ઉપયોગી સ્લો ડાબા હાથની ઓર્થોડોક્સ બોલિંગથી તેણે ૬૨ વિકેટો પણ ઝડપી છે, જેમાં એક ઇનિંગ્સમાં પાંચ વિકેટ લેવાની સિદ્ધિ પણ સામેલ છે.
Welcome to Surrey, Mahipal Lomror. 🤝🇮🇳
The experienced Rajasthan captain and all-rounder joins Surrey for the final six Rothesay County Championship matches of the season.
🤎 | #CountyChampionship pic.twitter.com/w1r7DSsUN8
— Surrey Cricket (@surreycricket) August 18, 2026
તાજેતરની રણજી ટ્રોફી સિઝનમાં પણ લોમરોર ઘાતક ફોર્મમાં હતો. તે રાજસ્થાન તરફથી સૌથી વધુ રન બનાવનાર બીજો બેટ્સમેન રહ્યો હતો, જ્યાં તેણે ૪૮.૬૬ ની સરેરાશથી બે અદભુત સદીઓ સાથે રનનો ખડકલો કર્યો હતો.
સરેમાં મળશે ઘર જેવું વાતાવરણ
ઇંગ્લેન્ડની તદ્દન અલગ હવામાન અને પિચ પરિસ્થિતિઓમાં સેટ થવું કોઈપણ ભારતીય ખેલાડી માટે મોટો પડકાર હોય છે, પરંતુ લોમરોર માટે એક આશ્વાસનરૂપ બાબત એ છે કે સરેના ડ્રેસિંગ રૂમમાં તેને એક પરિચિત ચહેરો મળશે. રાજસ્થાન ટીમમાં તેનો સાથી ખેલાડી અને ભારતીય લેગ સ્પિનર રાહુલ ચહર પહેલેથી જ સરે ટીમનો હિસ્સો છે. પોતાના રાજ્યના સાથી ખેલાડીની હાજરીથી લોમરોરને અંગ્રેજી માહોલમાં ઝડપથી અનુકૂળ થવામાં ઘણી મદદ મળશે.
A message from new signing Mahipal Lomror. 🗣️
🤎 | #SurreyCricket pic.twitter.com/ibdp3cyLPA
— Surrey Cricket (@surreycricket) August 18, 2026
સરે ક્લબ સાથે જોડાયા બાદ મહિપાલ લોમરોરે પોતાની ખુશી વ્યક્ત કરતા કહ્યું હતું કે, કાઉન્ટી ચેમ્પિયનશિપની બાકીની સિઝન માટે સરે જેવી ઐતિહાસિક ક્લબનો ભાગ બનવું તે તેના માટે ગર્વની વાત છે. નવા વાતાવરણમાં પોતાની જાતને પડકારવાની અને વિશ્વકક્ષાના અનુભવી ખેલાડીઓ પાસેથી શીખવાની આ એક શાનદાર તક છે.
