પેટ્રોલ-ડીઝલના ભાવમાં કોઈ મોટો ફેરફાર નહીં

આજે, ૨૬ ઓગસ્ટ ૨૦૨૬ ના રોજ દેશના પેટ્રોલ પંપ પર ઇંધણ ખરીદવા જઈ રહેલા વાહનચાલકો માટે મોટા સમાચાર સામે આવ્યા છે. ભારતીય ઓઇલ માર્કેટિંગ કંપનીઓ (OMCs) એ આજે પેટ્રોલ અને ડીઝલના ભાવમાં કોઈ જ બદલાવ કર્યો નથી, જેના કારણે દેશભરમાં કિંમતો ગઈકાલના સ્તરે જ જળવાઈ રહી છે. બીજી તરફ, વૈશ્વિક બજારમાં ક્રૂડ ઓઇલના દરોમાં આશરે ૨ ટકાનો નોંધપાત્ર ઘટાડો જોવા મળ્યો હોવા છતાં દેશના રિટેલ માર્કેટમાં ગ્રાહકોને કોઈ સીધો આર્થિક લાભ મળ્યો નથી.

આંતરરાષ્ટ્રીય સ્તરે ક્રૂડ ઓઇલના ભાવમાં આજે મોટો ઘટાડો નોંધાયો છે. ગ્લોબલ બેન્ચમાર્ક ગણાતું બ્રેન્ટ ક્રૂડ ૨.૨૩ ટકા ઘટીને ૮૬.૬૦ ડૉલર પ્રતિ બેરલ પર ટ્રેડ થઈ રહ્યું છે. તે જ રીતે, યુએસ ધોરણ ગણાતું WTI ક્રૂડ પણ ૧.૭૨ ટકાના ઘટાડા સાથે ૮૦.૯૪ ડૉલર પ્રતિ બેરલના સ્તરે આવી ગયું છે.

ભારત પોતાની સ્થાનિક વપરાશની ૮૫ ટકાથી વધુ તેલની જરૂરિયાતો અન્ય દેશોમાંથી આયાત કરીને પૂરી કરે છે. જેના કારણે યુએસ ડૉલર સામે ભારતીય રૂપિયાનો વિનિમય દર અને આંતરરાષ્ટ્રીય ક્રૂડના દરો સીધી રીતે દેશના પેટ્રોલ-ડીઝલના ભાવ પર અસર કરે છે. આમ છતાં, સરકારી તેલ કંપનીઓએ આજે દરો સ્થિર રાખવાનો નિર્ણય કર્યો છે.

દેશભરમાં ૨૫ મે પછી પેટ્રોલ અને ડીઝલના ભાવ મોટાભાગે સ્થિર રહ્યા છે. તે સમયે ઓઇલ માર્કેટિંગ કંપનીઓએ સમગ્ર દેશમાં પેટ્રોલના ભાવમાં પ્રતિ લિટર ૨.૬૧ રૂપિયા અને ડીઝલના ભાવમાં પ્રતિ લિટર ૨.૭૧ રૂપિયાનો વધારો કર્યો હતો.

આજના તાજેતરના દરો અનુસાર, દેશની રાજધાની દિલ્હીમાં પેટ્રોલ પ્રતિ લિટર ૧૦૨.૧૨ રૂપિયા અને ડીઝલ ૯૫.૨૦ રૂપિયાના ભાવે મળી રહ્યું છે. મુંબઈમાં પેટ્રોલનો દર ૧૧૧.૩૧ રૂપિયા અને ડીઝલ ૯૭.૯૭ રૂપિયા છે. જ્યારે કોલકાતામાં પેટ્રોલ ૧૧૩.૫૧ રૂપિયા તથા ડીઝલ ૯૯.૮૨ રૂપિયા પ્રતિ લિટર છે. દક્ષિણ ભારતના ચેન્નાઈમાં પેટ્રોલ ૧૦૭.૭૮ રૂપિયા અને ડીઝલ ૯૯.૫૬ રૂપિયાના સ્તરે ટ્રેડ થઈ રહ્યું છે.

અન્ય મુખ્‍ય શહેરોની વાત કરીએ તો, હૈદરાબાદમાં પેટ્રોલ ૧૧૫.૬૯ રૂપિયા અને ડીઝલ ૧૦૩.૮૨ રૂપિયાના ઊંચા સ્તરે છે. પટનામાં પેટ્રોલ ૧૧૩.૩૫ રૂપિયા અને ડીઝલ ૯૯.૩૬ રૂપિયા છે. જયપુરમાં પેટ્રોલ ૧૧૨.૬૬ રૂપિયા અને ડીઝલ ૯૭.૭૮ રૂપિયા છે. જ્યારે પુણેમાં પેટ્રોલ ૧૧૨.૦૨ રૂપિયા અને ડીઝલ ૯૮.૬૬ રૂપિયા પર સ્થિર છે. બેંગલુરુમાં ગ્રાહકોને પેટ્રોલ ૧૧૦.૮૨ રૂપિયા અને ડીઝલ ૯૮.૭૭ રૂપિયા પ્રતિ લિટરના ભાવે મળી રહ્યું છે.

ફેબ્રુઆરી ૨૦૨૬ માં અમેરિકા, ઈરાન અને ઈઝરાયેલ વચ્ચે શરૂ થયેલો લશ્કરી સંઘર્ષ હવે એક ભયાનક આર્થિક અને વ્યૂહાત્મક યુદ્ધનું સ્વરૂપ ધારણ કરી ચૂક્યો છે. અમેરિકાએ ઈરાન વિરુદ્ધ ‘ઓપરેશન ઈકોનોમિક આઉટકાસ્ટ’ ની જાહેરાત કરીને અત્યાર સુધીના સૌથી કડક આર્થિક પ્રતિબંધો લાદી દીધા છે.

વોશિંગ્ટને વિશ્વના દેશોને સ્પષ્ટ ચેતવણી આપી છે કે જે પણ દેશ ઈરાન સાથે કોઈપણ પ્રકારનો વેપાર કે નાણાકીય વ્યવહાર ચાલુ રાખશે તેણે ગંભીર આર્થિક પરિણામો ભોગવવા પડશે. અમેરિકા ખાસ કરીને ઈરાન પાસેથી સૌથી વધુ તેલ ખરીદતા ચીન પર મોટું દબાણ લાવી રહ્યું છે. આ ભૌગોલિક-રાજકીય તણાવના કારણે આવનારા દિવસોમાં વૈશ્વિક તેલ પુરવઠા અને ઊર્જા બજાર પર વધુ મોટી અસરો પડવાની શક્યતા સેવાઈ રહી છે.