ટીમ ઈન્ડિયાના ન્યૂઝીલેન્ડ પ્રવાસ માટે અદભુત ઉત્સાહ: શરૂઆતી ૪૮ કલાકમાં જ ૨૬,૦૦૦ ટિકિટો વેચાઈ
ભારતીય ક્રિકેટ ટીમનો ન્યૂઝીલેન્ડ પ્રવાસ શરૂ થવાને હજુ બે મહિના જેટલો સમય બાકી છે, પરંતુ ફેન્સમાં અત્યારથી જ આ શ્રેણીને લઈને ભારે રોમાંચ જોવા મળી રહ્યો છે. ૨૨ ઓક્ટોબરથી શરૂ થનારા આ ઐતિહાસિક પ્રવાસમાં ભારત અને ન્યૂઝીલેન્ડ વચ્ચે ત્રણેય ફોર્મેટ (T20, ODI અને ટેસ્ટ) માં કુલ ૧૨ મેચો રમાશે. આ પ્રવાસ માટે ‘ક્રિકેટ નેશન’ મેમ્બર સેલ શરૂ થતાં જ માત્ર ૪૮ કલાકની અંદર રેકોર્ડ ૨૬,૦૦૦ ટિકિટો વેચાઈ ગઈ છે, જે ન્યૂઝીલેન્ડ ક્રિકેટ (NZC) ના ઇતિહાસમાં આંતરરાષ્ટ્રીય સમર સીઝન માટે સૌથી ઝડપી વેચાણમાંથી એક છે.આગામી ઓક્ટોબર અને નવેમ્બર મહિનામાં યોજાનારી આ શ્રેણી ન્યૂઝીલેન્ડના ચાહકો માટે વિશ્વના શ્રેષ્ઠ રમતગમતના સિતારાઓને પોતાના આંગણે રમતા જોવાની એક અદભુત તક લઈને આવી છે.
હેગલી ઓવલ અને ઇડન પાર્ક ખાતે ટિકિટોની ભારે માંગ
ન્યૂઝીલેન્ડના તમામ મુખ્ય સ્ટેડિયમોમાં ભારત સામેની મેચો માટે ચાહકોની ભારે ભીડ જોવા મળી રહી છે. ખાસ કરીને ઓકલેન્ડના પ્રખ્યાત ઇડન પાર્ક ખાતે રમાનારી વ્હાઇટ-બોલ (T20 અને ODI) મેચો માટે સૌથી ઝડપી ટિકિટ વેચાણ નોંધાયું છે.
બીજી તરફ, ક્રાઇસ્ટચર્ચનું ૯,૦૦૦ ની ક્ષમતા ધરાવતું હેગલી ઓવલ સ્ટેડિયમ પણ સંપૂર્ણ ભરાઈ જવાની તૈયારીમાં છે. ૨૨ અને ૨૪ ઓક્ટોબરે યોજાનારી પ્રથમ બે T20 મેચો તેમજ ૨૭ નવેમ્બરથી ૧ ડિસેમ્બર દરમિયાન રમાનારી બીજી ટેસ્ટ મેચની બધી જ ટિકિટો હાઉસફુલ થવાની અપેક્ષા છે. આ ઉપરાંત વેલિંગ્ટનના સેલો બેસિન રિઝર્વ અને સ્કાઈ સ્ટેડિયમ (HNRY સ્ટેડિયમ) ખાતેની મેચો માટે પણ ચાહકોએ ભારે પ્રતિસાદ આપ્યો છે.
NZCના ચીફ માર્કેટિંગ અને કોમર્શિયલ ઓફિસર ગ્લેન ક્રિચલીએ જણાવ્યું હતું કે ચાહકોનો આ ઉત્સાહ અભૂતપૂર્વ છે. તેમણે ચાહકોને સમયસર ટિકિટ બુક કરવાની સલાહ આપી છે જેથી તેઓ આ રોમાંચક મેચો જોવાથી વંચિત ન રહી જાય.
સામાન્ય જનતા માટે ૭ સપ્ટેમ્બરથી ખુલશે ટિકિટ વિન્ડો
જે ફેન્સ હજુ સુધી ટિકિટ બુક કરી શક્યા નથી તેમના માટે પણ તક બાકી છે. સામાન્ય જનતા માટે અધિકૃત ટિકિટ વિન્ડો ૭ સપ્ટેમ્બરથી ખોલવામાં આવશે. જોકે, ચાહકો ‘ક્રિકેટ નેશન’ માં સાઇન અપ કરીને એક્સક્લુઝિવ પ્રી-સેલ વિન્ડોનો લાભ મેળવી શકે છે અને ટિકિટો પર ૧૫ ટકા સુધીનું ખાસ ડિસ્કાઉન્ટ પણ મેળવી શકે છે.
ભારતના ન્યૂઝીલેન્ડ પ્રવાસનું સંપૂર્ણ ટાઈમટેબલ
T20I શ્રેણીનો કાર્યક્રમ:
૨૨ ઓક્ટોબર: ૧લી T20I, ક્રાઇસ્ટચર્ચ (હેગલી ઓવલ)
૨૪ ઓક્ટોબર: ૨જી T20I, ક્રાઇસ્ટચર્ચ (હેગલી ઓવલ)
૨૭ ઓક્ટોબર: ૩જી T20I, વેલિંગ્ટન (HNRY સ્ટેડિયમ)
૩૦ ઓક્ટોબર: ૪થી T20I, ઓકલેન્ડ (ઇડન પાર્ક)
૦૧ નવેમ્બર: ૫મી T20I, હેમિલ્ટન (સેડન પાર્ક)
ODI શ્રેણીનો કાર્યક્રમ:
૪ નવેમ્બર: ૧લી ODI, ઓકલેન્ડ (ઇડન પાર્ક)
૭ નવેમ્બર: ૨જી ODI, વેલિંગ્ટન (HNRY સ્ટેડિયમ)
૧૦ નવેમ્બર: ૩જી ODI, હેમિલ્ટન (સેડન પાર્ક)
૧૩ નવેમ્બર: ૪થી ODI, માઉન્ટ મૌંગાનુઈ (બે ઓવલ)
૧૫ નવેમ્બર: ૫મી ODI, માઉન્ટ મૌંગાનુઈ (બે ઓવલ)
ટેસ્ટ શ્રેણીનો કાર્યક્રમ:
૧૯ થી ૨૩ નવેમ્બર: ૧લી ટેસ્ટ, વેલિંગ્ટન (બેસિન રિઝર્વ)
૨૭ નવેમ્બર થી ૧ ડિસેમ્બર: ૨જી ટેસ્ટ, ક્રાઇસ્ટચર્ચ (હેગલી ઓવલ)
