અમેરિકામાં ગ્રીન કાર્ડ મેળવવું હવે સપ્નું? વિઝા ફ્રોડ તપાસમાં ‘કોગ્નિઝન્ટ’ પર કેમ વાગી મોટો બ્રેક!
અમેરિકામાં સ્થાયી થવાનું અને ગ્રીન કાર્ડ મેળવવાનું સ્વપ્ન જોતા ભારતીય આઈટી વ્યાવસાયિકો માટે એક અત્યંત ચિંતાજનક સમાચાર સામે આવ્યા છે. ટ્રમ્પ વહીવટીતંત્ર દ્વારા વિઝા ફ્રોડ (વિઝા ધોખાધડી) સામે શરૂ કરવામાં આવેલી આક્રમક ઝુંબેશ હેઠળ અમેરિકાએ આઈટી ક્ષેત્રની જાયન્ટ કંપની ‘કોગ્નિઝન્ટ’ (Cognizant) ની પરમનન્ટ લેબર સર્ટિફિકેશન (PERM) ફાઇલિંગ પર તાત્કાલિક અસરથી રોક લગાવી દીધી છે.
PERM એ અમેરિકામાં ગ્રીન કાર્ડ મેળવવાની પ્રક્રિયાનું સૌથી પહેલું અને મહત્વનું પગથિયું છે. ચેન્નઈમાં સ્થપાયેલી અને હાલ ન્યૂ જર્સીથી કાર્યરત કોગ્નિઝન્ટ યુએસમાં H-1B વિઝાના સૌથી મોટા સ્પોન્સર્સમાંથી એક છે. આ કાર્યવાહીના કારણે હવે ટીસીએસ, ઇન્ફોસિસ, વિપ્રો અને એચસીએલ જેવી અન્ય મોટી ભારતીય આઈટી કંપનીઓ પર પણ કડક સમીક્ષા અને કાનૂની નજરનું જોખમ વધી ગયું છે.
યુએસ લેબર ડિપાર્ટમેન્ટનો મોટો આદેશ: PERM અરજીઓ સ્થગિત
અમેરિકી લેબર ડિપાર્ટમેન્ટના ઇન્સ્પેક્ટર જનરલ એન્થોની ડી’એસ્પોસિટોએ મંગળવારે જાહેરાત કરી હતી કે વ્હાઇટ હાઉસ ફ્રોડ ટાસ્ક ફોર્સ અને અન્ય કાયદાકીય અધિકારીઓ સાથે મળીને કરવામાં આવેલી તપાસ બાદ કોગ્નિઝન્ટ અને ‘ક્લાઉડેરા’ (Cloudera) ની પરમનન્ટ લેબર સર્ટિફિકેશન અરજીઓ અટકાવી દેવામાં આવી છે.
Fighting fraud is a TEAM SPORT.@Sonderling47 and I are for real.@Cognizant’s PERM filings are suspended. @DOLOIG is on the hunt.
Threats to American workers will NOT be tolerated.
Alongside @WHFraudTF, we’re following facts, fraud and finances.
Handcuffs await.
— Inspector General Anthony D’Esposito (@USLaborIG) September 8, 2026
સરકારના આદેશ અનુસાર, કોગ્નિઝન્ટની H-1B અને PERM પ્રોગ્રામ્સમાં થયેલી કથિત ગડબડી અને વિઝા ફ્રોડની સંપૂર્ણ તપાસ પૂરી ન થાય ત્યાં સુધી કંપની નવી PERM અરજીઓ દાખલ કરી શકશે નહીં.
આ કાર્યવાહી અંગે સોશિયલ મીડિયા પ્લેટફોર્મ X પર માહિતી આપતાં ઇન્સ્પેક્ટર જનરલે અત્યંત કડક શબ્દોમાં લખ્યું હતું કે, “ફ્રોડ સામેની લડાઈ એ એક ટીમ સ્પોર્ટ છે. અમે કથિત ગડબડીઓ સામે ખૂબ જ ગંભીર છીએ. કોગ્નિઝન્ટની PERM ફાઇલિંગ સ્થગિત કરવામાં આવી છે. અમેરિકી કામદારોના હિતો સામેનું કોઈપણ જોખમ સહન કરવામાં આવશે નહીં. વ્હાઇટ હાઉસ ફ્રોડ ટાસ્ક ફોર્સ સાથે મળીને અમે તમામ તથ્યો અને નાણાકીય ગોટાળાની તપાસ કરી રહ્યા છીએ. ગુનેગારો માટે હાથકડીઓ તૈયાર છે.”
ગ્રીન કાર્ડ પ્રક્રિયામાં ‘PERM’ નું મહત્વ શું છે?
અમેરિકામાં સ્થાયી વસવાટ કરવા ઇચ્છતા વિદેશી નાગરિકો માટે PERM (પ્રોગ્રામ ઇલેક્ટ્રોનિક રિવ્યુ મેનેજમેન્ટ) પ્રક્રિયા અત્યંત નિર્ણાયક હોય છે. આ એક એવી વ્યવસ્થા છે જેના દ્વારા અમેરિકી સ્પોન્સર/કંપનીએ યુએસ લેબર ડિપાર્ટમેન્ટ પાસેથી મંજૂરી લેવી પડે છે કે તેઓ જે વિદેશી કર્મચારીને કાયમી ધોરણે નોકરી પર રાખી રહ્યા છે, તે પદ માટે કોઈ યોગ્ય કે ઉપલબ્ધ અમેરિકી નાગરિક મળ્યો નથી.
આ પ્રક્રિયા હેઠળ કંપનીઓએ એ પણ સાબિત કરવું પડે છે કે વિદેશી કર્મચારીની ભરતી કરવાથી સ્થાનિક અમેરિકી કામદારોના પગાર કે કામ કરવાની પરિસ્થિતિઓ પર કોઈ નકારાત્મક અસર નહીં પડે. ટ્રમ્પ વહીવટીતંત્રે જુલાઈ મહિનાથી જ H-1B અને PERM વિઝા પ્રોગ્રામ્સમાં થઈ રહેલા ગોટાળા સામે વ્યાપક તપાસ શરૂ કરી હતી, અને કોગ્નિઝન્ટ સામેનો આ આદેશ તે તપાસનો જ એક મોટો ભાગ છે.
કોગ્નિઝન્ટનો H-1B પ્રોફાઇલ અને ભારતીય આઈટી સેક્ટર પર અસર
કોગ્નિઝન્ટની સ્થાપના ૧૯૯૪માં ચેન્નઈમાં થઈ હતી અને આજે તે વૈશ્વિક સ્તરે આઈટી ક્ષેત્રનું બહુ મોટું નામ છે. યુનાઇટેડ સ્ટેટ્સ સિટિઝનશિપ એન્ડ ઇમિગ્રેશન સર્વિસીસ (USCIS) ના આંકડા મુજબ, ૩૦ જૂન સુધીમાં કંપનીને ૩,૫૧૦ H-1B વિઝા અરજીઓની મંજૂરી મળી હતી, જે ૨૦૨૦માં ૯,૪૧૩ હતી.
નોંધનીય છે કે કોગ્નિઝન્ટ અગાઉ પણ વિવાદોમાં રહી છે. એક અગાઉના કેસમાં ફેડરલ જ્યુરીએ ચુકાદો આપ્યો હતો કે કંપનીએ બિન-ભારતીય કર્મચારીઓ સામે ભેદભાવ કર્યો હતો. હવે ગ્રીન કાર્ડ ફાઇલિંગ પર બ્રેક વાગવાથી અન્ય ભારતીય આઈટી કંપનીઓની ઊંઘ પણ ઉડી ગઈ છે. TCS, Infosys, Wipro અને HCL જેવી કંપનીઓ પોતાના હજારો કર્મચારીઓને અમેરિકા મોકલવા અને ત્યાં જાળવી રાખવા માટે આ જ H-1B અને PERM સિસ્ટમ પર નિર્ભર રહે છે. જો આ તપાસનો દાયરો વધશે તો આખી આઈટી ઈન્ડસ્ટ્રી માટે મુશ્કેલીઓ ઊભી થઈ શકે છે.
અમેરિકામાં વસતા ભારતીયો માટે આનો શો અર્થ છે?
PERM ફાઇલિંગ અટકી જવાથી અમેરિકામાં સ્થાયી થવાનું સ્વપ્ન જોઈ રહેલા હજારો ભારતીય આઈટી એન્જિનિયરો અને પ્રોફેસનલ્સ માટે વિલંબ અને અનિશ્ચિતતાનો નવો તબક્કો શરૂ થશે.
ગ્રીન કાર્ડ બેકલોગમાં વધારો: હાલમાં જ આશરે ૧૦ લાખ (૧ મિલિયન) જેટલા ભારતીય નાગરિકો એમ્પ્લોયમેન્ટ-બેઝ્ડ (EB) ગ્રીન કાર્ડના બેકલોગમાં ફસાયેલા છે, જ્યાં દાયકાઓ સુધી રાહ જોવી પડે છે.
કરિયર પર તલવાર: PERM પ્રક્રિયામાં કોઈ પણ પ્રકારનો વિલંબ કે રોક ભારતીયો માટે અમેરિકામાં લાંબા ગાળાનું કરિયર બનાવવું વધુ મુશ્કેલ બનાવી દેશે.
વિઝા સ્ટેટસનું જોખમ: જો PERM સમયસર મંજૂર ન થાય તો H-1B વિઝાની ૬ વર્ષની સમયમર્યાદા પૂરી થયા પછી કર્મચારીઓએ દેશ છોડવો પડી શકે છે.
અમેરિકી પ્રશાસનની આ કડક કાર્યવાહી એ સ્પષ્ટ સંકેત આપે છે કે આવનારા દિવસોમાં વિદેશી કર્મચારીઓની ભરતી અને ગ્રીન કાર્ડ સ્પોન્સરશિપ માટેના નિયમો વધુ કઠિન બનવાના છે.
