રોકાણકારો તૈયાર રહો: NSE અને હીરો મોટર્સ સહિત ૧૧ કંપનીઓના IPO ખુલશે, ૧૯ કંપનીના શેર લિસ્ટેડ થશે
ભારતીય શેરબજારના પ્રાઇમરી માર્કેટમાં રોકાણકારો માટે કમાણીનો જબરદસ્ત મોકો આવી ગયો છે. ૧૪ સપ્ટેમ્બર ૨૦૨૬થી શરૂ થઈ રહેલા નવા સપ્તાહમાં સ્ટોક એક્સચેન્જ પર અભૂતપૂર્વ ધમધમાટ જોવા મળશે. આ અઠવાડિયા દરમિયાન નેશનલ સ્ટોક એક્સચેન્જ (NSE) અને હીરો મોટર્સ જેવા મોટા નામો સહિત કુલ ૧૧ નવી કંપનીઓના આઈપીઓ (IPO) સબસ્ક્રિપ્શન માટે ખુલવા જઈ રહ્યા છે. આ ૧૧ આઈપીઓમાંથી ૫ પબ્લિક ઈશ્યૂ મેઇનબોર્ડ સેગમેન્ટના છે, જ્યારે બાકીના SME સેગમેન્ટના છે. આ સિવાય, પાછલા અઠવાડિયે ખુલેલા ૮ આઈપીઓમાં સબસ્ક્રાઇબ કરવાની છેલ્લી તક પણ રોકાણકારોને મળશે. બીજી તરફ, અલગ-અલગ સ્ટોક એક્સચેન્જ પર કુલ ૧૯ કંપનીઓના શેરનું લિસ્ટિંગ પણ પ્રસ્તાવિત છે.
આ અઠવાડિયે ખુલનારા મેઇનબોર્ડ અને SME IPO
સપ્તાહના પ્રારંભિક દિવસોમાં જ વિવિધ SME અને મેઇનબોર્ડ કંપનીઓ પોતાના પબ્લિક ઈશ્યૂ માર્કેટમાં ઉતારી રહી છે. ૧૫ સપ્ટેમ્બરના રોજ વામા વોવેનફેબ, શક્તિ પોલીટ્રેપ અને ક્વાન્ટો એગ્રોવર્લ્ડના SME આઈપીઓ ખુલશે, જે ૧૭ સપ્ટેમ્બર સુધી સબસ્ક્રાઇબ કરી શકાશે. વામા વોવેનફેબ ₹૪૯.૫૪ કરોડ અને ક્વાન્ટો એગ્રોવર્લ્ડ ₹૩૧.૦૨ કરોડ એક્ત્ર કરવાનું લક્ષ્ય ધરાવે છે. આ કંપનીઓના શેર ૨૨ સપ્ટેમ્બરે BSE SME પર લિસ્ટેડ થશે.
૧૬ સપ્ટેમ્બરથી મેઇનબોર્ડ સેગમેન્ટમાં ભારે હલચલ જોવા મળશે. એસએસ રિટેલ કંપનીનો ₹૫૦૦ કરોડનો મેઇનબોર્ડ આઈપીઓ ₹૪૦૩ થી ₹૪૨૪ની પ્રાઇસ બેન્ડ સાથે ખુલશે. આ જ દિવસે જિંદાલ સુપ્રીમી લિમિટેડનો ₹૧૨૪.૮૮ કરોડનો ઈશ્યૂ અને જાણીતી ઓટો કોમ્પોનન્ટ ઉત્પાદક હીરો મોટર્સનો ₹૧,૦૦૦ કરોડનો મેઇનબોર્ડ આઈપીઓ ખુલશે. હીરો મોટર્સ માટે પ્રાઇસ બેન્ડ ₹૭૯ થી ₹૮૪ નક્કી કરવામાં આવી છે. આ ત્રણેય મેઇનબોર્ડ ઈશ્યૂ ૧૮ સપ્ટેમ્બરે બંધ થશે અને ૨૩ સપ્ટેમ્બરે NSE તથા BSE પર લિસ્ટેડ થશે.
NSEનો મેગા IPO અને અન્ય લિસ્ટિંગ
રોકાણકારો જેની લાંબા સમયથી પ્રતીક્ષા કરી રહ્યા હતા તે નેશનલ સ્ટોક એક્સચેન્જ (NSE)નો મેગા IPO ૧૭ સપ્ટેમ્બરે ખુલી રહ્યો છે. એનએસઇ આઈપીઓ દ્વારા ₹૨૨,૫૬૧.૫૭ કરોડ એકત્ર કરવા માંગે છે, જે ભારતીય મૂડીબજારના ઇતિહાસના સૌથી મોટા IPOમાં સ્થાન મેળવશે. આ ઈશ્યૂની પ્રાઇસ બેન્ડ ₹૧૭૦૦ થી ₹૧૭૮૫ નક્કી કરાઈ છે અને ૨૧ સપ્ટેમ્બરે સબસ્ક્રિપ્શન બંધ થયા બાદ ૨૪ સપ્ટેમ્બરે તેનું લિસ્ટિંગ થશે.
આ ઉપરાંત ૧૭ અને ૧૮ સપ્ટેમ્બરે સ્પેક્ટ્રાએ ટેક્નોલોજી, ખેરિયા ઓટોકોમ્પ, સોનાસેલેક્શન ઈન્ડિયા અને એક્સિઓમ ગેસ એન્જિનિયરિંગના પબ્લિક ઈશ્યૂ પણ રોકાણકારો માટે ઉપલબ્ધ બનશે.
સબસ્ક્રિપ્શનની છેલ્લી તક અને લિસ્ટિંગ કેલેન્ડર
ગયા અઠવાડિયે ખુલેલા વીગાલેન્ડ ડેવલપર્સ, ઓમ ગેલેક્સી, મહારાજ એન્ડ સ્પીડેક્સ અને રાકસન ટ્રાન્સફોર્મ્સ સહિત ૮ આઈપીઓ ૧૫ અને ૧૬ સપ્ટેમ્બરે બંધ થઈ રહ્યા છે.
લિસ્ટિંગ અંગે વાત કરીએ તો, ૧૫ સપ્ટેમ્બરે પ્રવણ કન્સ્ટ્રક્શન્સ અને અપના લોજિસ્ટ્રિક્સના શેર માર્કેટમાં પ્રવેશશે. ૧૬ સપ્ટેમ્બરે કાનોહાર ઇલેક્ટ્રિકલ્સ, પ્રાસોલ કેમિકલ્સ અને ગ્લાસ વોલ સિસ્ટમ્સનું લિસ્ટિંગ થશે. ૧૭ સપ્ટેમ્બરના રોજ સૌથી વધુ કંપનીઓ લિસ્ટેડ થશે, જેમાં રેન્ટોમોજો, મનીપાલ પેમેન્ટ, સ્ટીમહાઉસ ઈન્ડિયા અને કરમતારા એન્જિનિયરિંગ મુખ્ય છે. જ્યારે ૧૮ સપ્ટેમ્બરે વીગાલેન્ડ ડેવલપર્સ સહિત ૫ કંપનીઓના શેર એક્સચેન્જ પર ટ્રેડિંગ માટે ઉપલબ્ધ થશે.
