ગુજરાતમાં આ વર્ષે વિધાનસભાની ચૂંટણી યોજાવાની છે અને તે દરમિયાન એક ચોંકાવનારો અહેવાલ સામે આવ્યો છે. રિપોર્ટ અનુસાર MLA લોકલ એરિયા ડેવલપમેન્ટ સ્કીમ (MLA LADS) હેઠળ મળેલી રકમનો મોટો હિસ્સો ખર્ચવામાં આવ્યો નથી.
રિપોર્ટ અનુસાર, ગુજરાતના ધારાસભ્યોએ MLA ફંડના લગભગ 300 કરોડ રૂપિયા ખર્ચ્યા નથી.
એસોસિયેશન ઓફ ડેમોક્રેટિક રિફોર્મ્સ (ADR) અને NGO માહી અધિકાર ગુજરાત પહેલ (MAGP)એ સંયુક્ત રીતે ગુજરાત વિધાનસભાના ધારાસભ્યોની કામગીરી પર એક રિપોર્ટ તૈયાર કર્યો છે. એમએલએ લોકલ એરિયા ડેવલપમેન્ટ ફંડ સ્કીમ (એમએલએ એલએડીએસ) હેઠળ, દરેક ધારાસભ્ય તેમના મતવિસ્તારમાં રૂ. 1.5 કરોડના વિકાસ કાર્યોની ભલામણ અથવા સૂચન કરી શકે છે, એમ અહેવાલમાં જણાવાયું છે. જિલ્લા આયોજન મંડળ એમએલએ એલએડીએસ ફંડના હિસાબની જાળવણી કરે છે. ગુજરાતમાં આ યોજના 1,365 કરોડથી વધુની છે. અહેવાલ મુજબ, 2017-22માં ધારાસભ્યો દ્વારા ₹1,004.15 કરોડના વિકાસ કાર્યોની ભલામણ કરવામાં આવી હતી, જેમાંથી ₹849.64 કરોડ બહાર પાડવામાં આવ્યા હતા અને માર્ચ 2022 સુધી ₹677.5 કરોડનો ખર્ચ કરવામાં આવ્યો હતો.
આ સિવાય રિપોર્ટમાં એમ પણ કહેવામાં આવ્યું છે કે કુલ 53,029 પ્રોજેક્ટ્સમાંથી માત્ર 76 ટકા જ કામ પૂર્ણ થયું છે. આ ઉપરાંત 53,020 મંજૂર થયેલા કામોમાંથી માર્ચ 2022 સુધીમાં માત્ર 40,428 કામો જ પૂર્ણ થયા છે. અહેવાલ મુજબ એમએલએ એલએડી ફંડ માટે ફાળવાયેલ બજેટ પાંચ વર્ષ માટે છે. 300 કરોડની બિનખર્ચિત રકમ વિધાનસભાની મુદત પૂરી થવાની સાથે સમાપ્ત થશે. એવું કહેવામાં આવી રહ્યું છે કે વર્તમાન વિધાનસભાનો કાર્યકાળ ડિસેમ્બરમાં સમાપ્ત થશે અને આટલા ઓછા સમયમાં આ નાણાં ખર્ચવામાં આવે તેવી શક્યતા ઓછી છે. અહેવાલ મુજબ 6,094 પ્રોજેક્ટ હેઠળ કામો મંજૂરી હોવા છતાં શરૂ થઈ શક્યા નથી.
