વડાપ્રધાન નરેન્દ્ર મોદી શનિવારે હૈદરાબાદ પહોંચ્યા હતા. આ અંગે માહિતી આપતાં તેમણે ટ્વીટ કરીને કહ્યું કે, ‘ભાજપની રાષ્ટ્રીય કાર્યકારિણીની બેઠકમાં ભાગ લેવા માટે ગતિશીલ શહેર હૈદરાબાદમાં ઉતર્યા. આ બેઠક દરમિયાન અમે પાર્ટીને વધુ મજબૂત કરવાના ઉદ્દેશ્ય સાથે ઘણા મુદ્દાઓ પર ચર્ચા કરીશું. બેઠકમાં બે દરખાસ્તો પર ચર્ચા થવાની અપેક્ષા છે, જેમાં પાર્ટીના રાજકીય તેમજ આર્થિક એજન્ડાનો સમાવેશ થાય છે. સૂત્રોના જણાવ્યા અનુસાર, રાજકીય એજન્ડાના ભાગરૂપે, પાર્ટી તેના રાષ્ટ્રપતિ પદના ઉમેદવાર દ્રૌપદી મુર્મુ અને મહારાષ્ટ્રમાં તાજેતરમાં રચાયેલી ભાજપ સરકાર પર પણ બેઠકમાં ચર્ચા કરી શકે છે.
હૈદરાબાદ ઈન્ટરનેશનલ કન્વેન્શન સેન્ટર ખાતે ભાજપની રાષ્ટ્રીય કાર્યકારિણીની બેઠકમાં વડાપ્રધાન નરેન્દ્ર મોદી, ભાજપના રાષ્ટ્રીય અધ્યક્ષ જેપી નડ્ડા, 19 રાજ્યોના મુખ્યમંત્રીઓ અને અન્ય વરિષ્ઠ ભાજપના નેતાઓએ હાજરી આપી હતી.
હૈદરાબાદમાં ભાજપની બે દિવસીય રાષ્ટ્રીય કાર્યકારિણીની બેઠક શરૂ થઈ ગઈ છે. જ્યાં પાર્ટીના કાર્યકરો દ્વારા પીએમ મોદીનું સ્વાગત કરવામાં આવ્યું હતું. તમને જણાવી દઈએ કે પીએમ મોદી રવિવારે રાષ્ટ્રીય કાર્યકારિણીને સંબોધિત કરે તેવી શક્યતા છે.
આ પહેલા શનિવારે બીજેપી અધ્યક્ષ જેપી નડ્ડાએ બેઠકનું ઉદ્ઘાટન કર્યું હતું. આ દરમિયાન તેમણે ભાજપના સભ્યોને સંબોધિત કર્યા હતા. તેમના સંબોધનમાં નડ્ડાએ વિવિધ રાજ્યોમાં યોજાયેલી વિધાનસભા ચૂંટણી, પેટાચૂંટણીઓમાં જીત માટે મોદી સરકારના ગરીબ તરફી પગલાંને શ્રેય આપ્યો હતો. આ પછી ભાજપના રાષ્ટ્રીય ઉપાધ્યક્ષ વસુંધરા રાજેએ પ્રેસ કોન્ફરન્સ કરીને ભારતની અર્થવ્યવસ્થા વિશે વાત કરી. તેમણે કહ્યું કે દેશની અર્થવ્યવસ્થા 8.7 ટકાના દરે આગળ વધી રહી છે. આ પણ અમારી સરકારની મોટી ઉપલબ્ધિ છે.
