સ્ટુડન્ટ ઓફ ધી યર ટુ ની તારીખ થઇ જાહેર

ટોચના ફિલ્મ સર્જક કરણ જોહરે પોતાની મહત્વકાંક્ષી સિક્વલ સ્ટુડન્ટ ઑફ ધી યરની રિલિઝ ડેટ રજૂ કરતાં કહ્યું હતું કે આ ફિલ્મ અમે ચાલુ વર્ષના નવેમ્બરની ૨૩મીએ રજૂ કરવા ધારીએ છીએ. મૂળ ફિલ્મ સ્ટુડન્ટ ઑફ ધી યર ૨૦૧૨માં રજૂ થઇ હતી અને એ ફિલ્મે બોલિવૂડને ત્રણ નવા કલાકારો આપ્યા હતા- આલિયા ભટ્ટ, વરુણ ધવન અને સિદ્ધાર્થ મલ્હોત્રા. એમાંના પહેલા બે તો એ લિસ્ટના કલાકારોમાં ગણાતા થઇ ગયા છે. સિદ્ધાર્થ હજુ એ સફળતા મેળવી શક્યો નથી. મૂળ ફિલ્મનું ડાયરેક્શન કરણ જોહરે પોતે કર્યું હતું.પરંતુ સિક્વલનું ડાયરેક્શન પુનિત મલ્હોત્રા કરવાના છે. આ માહિતી આપનારા સૂત્રોએ કહ્યું કે કરણના મનમાં સિક્વલના હીરો તરીકે ટાઇગર શ્રોફ નક્કી છે. મૂળ ફિલ્મમાં બે હીરો અને એક હીરોઇન હતી. સિક્વલમાં બે હીરોઇનો અને એક હીરો હશે. ટાઇગર નક્કી છે પરંતુ બે હીરોઇનોની તલાશ જારી છે. એ નક્કી થઇ જતાં કરણ સર એની વિગતો જાહેર કરશે. ત્યાં સુધી વેઇટ એન્ડ વૉચ. આ સિક્વલ માટે કેટલીક હીરોઇનોનાં નામ બોલાઇ રહ્યાં છે પરંતુ કરણ કેમ્પ હજુ નામ પાડવા તૈયાર નથી. એવું એેક નામ ચંકી પાંડેની પુત્રી અનન્યા પાંડેનું છે. જો કે કરણ જોહરે સોશ્યલ મિડિયા પર એવો અણસાર આપ્યો હતો કે અમે આવતા મહિને સ્ટુડન્ટ ઑફ ધી યરની સિક્વલની હીરોઇનોનાં નામ જાહેર કરીશું.