મોંઘી સારવારનો બોજ થશે ઓછો: GST ઘટાડાથી કેન્સરના દર્દીઓને આર્થિક મદદ
ભારતમાં કેન્સરની સારવાર હંમેશા દર્દી અને તેના પરિવાર માટે એક મોટો આર્થિક પડકાર રહી છે. કીમોથેરાપી, દવાઓ અને લાંબા ગાળાની સારવારનો ખર્ચ લાખો રૂપિયામાં થતો હતો. પરંતુ હવે સરકારે GST કાઉન્સિલની ૫૬મી બેઠક માં એક ઐતિહાસિક નિર્ણય લીધો છે, જેનાથી કેન્સરની સારવાર સંબંધિત દવાઓ અને સેવાઓ પરનો GST ઘટાડીને શૂન્ય (૦%) કરવામાં આવ્યો છે. આ નિર્ણય દર્દીઓ અને તેમના પરિવારો માટે આશાનું કિરણ લઈને આવ્યો છે.
કીમોથેરાપી અને દવાઓ પર મોટી બચત:
કેન્સરની સારવારમાં કીમોથેરાપી સૌથી મોંઘી પ્રક્રિયા છે. કીમોથેરાપી દવાઓનો ખર્ચ લગભગ ૧ લાખ રૂપિયા જેટલો હોય છે. અગાઉ, તેના પર ૧૨% GST લાગવાથી કુલ ખર્ચ વધીને રૂ. ૧,૧૨,૦૦૦ થતો હતો. પરંતુ નવા નિયમ મુજબ હવે તેના પર કોઈ GST લાગશે નહીં, જેનાથી દર્દીઓને સીધા રૂ. ૧૨,૦૦૦ ની બચત થશે. આ જ રીતે, કેન્સરની અન્ય દવાઓ જેની કિંમત રૂ. ૫ લાખ સુધી હોય છે, તેના પર પણ GST શૂન્ય થવાથી દર્દીઓને સીધા રૂ. ૬૦,૦૦૦ સુધીની બચત થશે.
સંપૂર્ણ સારવાર પરનો ખર્ચ ઘટશે:
કેન્સરની સંપૂર્ણ સારવાર, જેમાં દવાઓ, કીમોથેરાપી અને અન્ય તબીબી સેવાઓનો સમાવેશ થાય છે, તેનો કુલ ખર્ચ રૂ. ૩,૩૦,૦૦૦ કે તેથી વધુ થઈ શકે છે. અગાઉ, GST ના બોજને કારણે આ ખર્ચ વધીને રૂ. ૩,૫૦,૦૦૦ સુધી પહોંચતો હતો. હવે GST માં ઘટાડાથી દર્દીઓને સારવારના કુલ ખર્ચમાં રૂ. ૧૬,૦૦૦ સુધીની સીધી રાહત મળશે.
આ નિર્ણય ખાસ કરીને ભારત જેવા દેશ માટે ખૂબ જ મહત્વપૂર્ણ છે, જ્યાં કરોડો લોકો મધ્યમ અને ગરીબ વર્ગમાંથી આવે છે. કેન્સર જેવી ગંભીર બીમારીની સારવાર હવે થોડી હદ સુધી સસ્તી થશે, જેનાથી વધુને વધુ દર્દીઓ સમયસર સારવાર મેળવી શકશે. આ પગલું માત્ર નાણાકીય બોજ ઓછો કરશે નહીં, પરંતુ સમાજમાં આરોગ્યની સુલભતા સુધારવામાં પણ મદદ કરશે.
