ફુગાવાના ડરામણા આંકડાઓ વચ્ચે સરકારે કહ્યું છે કે રિટેલ ફુગાવાને માપવા માટે ટૂંક સમયમાં નવી શ્રેણી લાવવામાં આવશે. આ માટે સર્વેની કામગીરી ચાલી રહી છે, જે ટૂંક સમયમાં પૂર્ણ થશે. હાલમાં, મોંઘવારી માપવાની શ્રેણી 2011-12ના સર્વેક્ષણ પર આધારિત છે.
મનીકંટ્રોલના જણાવ્યા અનુસાર આ વખતે સરકારે ઉપભોક્તા ખર્ચ સંબંધિત સર્વે માટે ટેબલેટની મદદ લીધી છે. સર્વે માટે રચાયેલી સ્ટેન્ડિંગ કમિટિ ઓફ ઈકોનોમિક્સ સ્ટેટિસ્ટિક્સના વડા પ્રણવ સેને જણાવ્યું હતું કે આ વખતે નવી શ્રેણી આવતા વધુ સમય નહીં લાગે. પહેલા ડેટા કલેક્ટ કરવામાં 7-8 મહિનાનો સમય લાગતો હતો, પરંતુ આ વખતે ટેબલેટનો ઉપયોગ કરવામાં આવી રહ્યો છે. જોકે, તે આવતા વર્ષના અંત સુધીમાં આવી જશે.
સેને કહ્યું કે, કોરોના મહામારીને કારણે આ વખતે સર્વે શરૂ કરવામાં વિલંબ થયો હતો અને તે 30 જુલાઈ, 2023ના રોજ સમાપ્ત થશે. વર્તમાન શ્રેણી 2015માં રિલીઝ થઈ હતી અને તેના આંકડા એકત્ર કરવામાં અઢી વર્ષ લાગ્યા હતા.
નવી શ્રેણી સાથે શું બદલાશે
ઉપભોક્તા ખર્ચના ડેટા એકત્ર કર્યા પછી, નવી શ્રેણી લાગુ થશે ત્યારે છૂટક ફુગાવાના દરને અપડેટ કરવામાં આવશે. આનાથી રિટેલ ફુગાવાને માપવા માટે માત્ર આધાર વર્ષ બદલાશે નહીં, પરંતુ ઉત્પાદનો અને સેવાઓનો હિસ્સો પણ બદલાશે. અગાઉ, સરકારે વર્ષ 2017-18માં પણ આ માટે એક સર્વે કર્યો હતો, પરંતુ પછી ડેટાની નબળી ગુણવત્તાને ટાંકીને તેને જાહેર કરવાનો ઇનકાર કર્યો હતો.
પરિવર્તનની જરૂર કેમ છે
રિટેલ ફુગાવા અને ઉપભોક્તા ખર્ચના ડેટાને માપવા માટે ઉપયોગમાં લેવાતી વર્તમાન શ્રેણીમાં આવા ઘણા ઉત્પાદનોનો પણ સમાવેશ થાય છે, જે હવે બંધ કરવામાં આવી છે. ડીવીડી પ્લેયર અને ટેપ રેકોર્ડર જેવા ઉત્પાદનો હવે બજારમાં વેચાતા નથી અને ગ્રાહકો દ્વારા તેનો ઉપયોગ થતો નથી. તેમ છતાં, આ ઉત્પાદનોનો ઉપયોગ છૂટક ફુગાવાને માપવા માટે કરવામાં આવી રહ્યો છે. આનાથી સચોટ અને વાસ્તવિક ડેટા રિલીઝ કરવામાં મુશ્કેલી પડે છે.
