અનિલ અંબાણીની દેવામાં ડૂબેલી રિલાયન્સ કેપિટલ લિમિટેડ (RCL)ના એક્વિઝિશન માટે માત્ર 4 કંપનીઓએ રસ દર્શાવ્યો છે. આ કંપનીઓમાં ઈન્ડસઈન્ડ બેંક, અમેરિકન એસેટ મેનેજમેન્ટ કંપની ઓક્ટ્રી કેપિટલ, ટોરેન્ટ ગ્રુપ અને બી-રાઈટ ગ્રુપનો સમાવેશ થાય છે. સમાચાર એજન્સી પીટીઆઈએ તેના સૂત્રોને ટાંકીને કહ્યું કે આ કંપનીઓએ આ માટે બિડ પણ સબમિટ કરી છે. સૂત્રોના જણાવ્યા અનુસાર, આઠ અલગ-અલગ સેક્ટરમાં બિઝનેસ કરતી કંપની માટે આ બિડ રૂ. 4,000 કરોડની રેન્જમાં છે.
તમને જણાવી દઈએ કે રિલાયન્સ કેપિટલ માટે બિડ સબમિટ કરવાની છેલ્લી તારીખ 29 ઓગસ્ટના રોજ સમાપ્ત થઈ હતી. પરંતુ આ સમયમર્યાદા અગાઉ પણ પાંચ વખત લંબાવવામાં આવી હતી. શરૂઆતમાં 54 કંપનીઓએ રિલાયન્સ કેપિટલ માટે રસ દાખવ્યો હતો, પરંતુ અત્યાર સુધીમાં માત્ર ચાર કંપનીઓએ નાદારી રિઝોલ્યુશન પ્રક્રિયાના ભાગરૂપે બિડ સબમિટ કરી છે. એટલે કે લોકોને આ નાદારીવાળી કંપનીમાં રસ પણ નથી.
બિડર્સને બે વિકલ્પો ઓફર કરવામાં આવ્યા હતા. પ્રથમ વિકલ્પમાં બિડર્સે સમગ્ર RCL માટે બિડ સબમિટ કરવાની જરૂર હતી, જ્યારે બીજા વિકલ્પ હેઠળ તેઓ કંપનીના ચોક્કસ વિસ્તારો માટે બિડ કરી શકે છે. સૂત્રોએ જણાવ્યું કે પિરામલ ગ્રૂપ, ઝ્યુરિચ રે અને અમેરિકન પ્રાઈવેટ ઈક્વિટી ફંડ એડવેન્ટે રિલાયન્સ જનરલ ઈન્સ્યોરન્સના બિઝનેસ માટે બિડ કરી છે. તે જ સમયે, રિલાયન્સ નિપ્પોન લાઈફ ઈન્સ્યોરન્સ બિઝનેસ માટે કોઈ બિડ પ્રાપ્ત થઈ નથી. આ ઉપરાંત, જિંદાલ સ્ટીલ એન્ડ પાવર અને યુવી એસેટ રિકન્સ્ટ્રક્શન કંપનીએ રિલાયન્સ કેપિટલના એસેટ રિસ્ટ્રક્ચરિંગ બિઝનેસ માટે બિડ સબમિટ કરી છે.
