હાલમાં જ ઘણા રાજ્યોમાં પોપ્યુલર ફ્રન્ટ ઓફ ઈન્ડિયા (PFI)ના અડ્ડાઓ પર દરોડા પાડવામાં આવ્યા બાદ ઘણા ખુલાસા થયા છે. NIAએ દરોડા પછી દાવો કર્યો છે કે PFI યુવાનોને આતંકવાદી સંગઠન લશ્કર, ISIS અને અલ-કાયદામાં જોડાવા માટે પ્રોત્સાહિત કરી રહી છે. PFI આ માટે દેશભરના મુસ્લિમ યુવાનોને નિશાન બનાવે છે. આ પછી, તેમનું બ્રેઈનવોશ કરવામાં આવે છે અને આતંકવાદી બનવાની તાલીમ આપવામાં આવે છે.
જાણકારી અનુસાર NIAએ કેરળની એક વિશેષ અદાલત સમક્ષ આ વાતનો ખુલાસો કર્યો. NIAએ PFI સભ્યો અને કેડર પર શાંતિ ભંગ કરવાનો અને ભારત વિરુદ્ધ અસંતોષ ફેલાવવાનો આરોપ લગાવ્યો હતો. NIAએ કોર્ટમાંથી ધરપકડ કરાયેલા આરોપીઓના રિમાન્ડની માંગણી કરતી વખતે દાવો કર્યો હતો કે PFI નેતાઓ, સભ્યો અને કાર્યકરો મુસ્લિમ યુવાનોને કટ્ટરપંથી બનાવવા અને ઈસ્લામિક સ્ટેટ (ISIS) જેવા પ્રતિબંધિત આતંકવાદી સંગઠનોમાં તેમની ભરતી કરવામાં સામેલ હતા.
NIAની કોચી શાખા આ મામલાની તપાસ કરી રહી છે. NIAએ આરોપી કરમના અશરફ મૌલવી, PFIની શિક્ષણ શાખાના રાષ્ટ્રીય પ્રભારી અને અન્ય લોકોની કોચીની વિશેષ અદાલત સમક્ષ ન્યાયિક રિમાન્ડની માંગણી કરી છે. NIAએ પોતાના રિપોર્ટમાં કહ્યું છે કે આરોપીઓએ ધાર્મિક દુશ્મનાવટ ઊભી કરીને ગેરકાયદેસર પ્રવૃત્તિઓમાં સામેલ થવાનું કાવતરું ઘડ્યું હતું. એજન્સીએ જણાવ્યું હતું કે સંસ્થા કથિત રીતે ભારત વિરુદ્ધ અસંમતિ પેદા કરી રહી છે અને વૈકલ્પિક ન્યાય વિતરણ પ્રણાલીને પ્રોત્સાહન આપી રહી છે. PFIએ હિંસક જેહાદના ભાગરૂપે આતંકવાદી કૃત્યો કરીને ભારતમાં ઇસ્લામિક શાસન સ્થાપિત કરવાનું કાવતરું ઘડ્યું હતું.
આ સિવાય NIAએ કહ્યું કે દરોડા દરમિયાન NIAના અડ્ડા પરથી વાંધાજનક સામગ્રી મળી આવી છે. જપ્ત કરાયેલા દસ્તાવેજોમાં ચોક્કસ સમુદાયના અગ્રણી નેતાઓને નિશાન બનાવવા સંબંધિત અત્યંત વાંધાજનક સામગ્રીનો પણ સમાવેશ થાય છે. એજન્સીએ કહ્યું, “જપ્ત કરાયેલી હિટ લિસ્ટ સ્પષ્ટપણે દર્શાવે છે કે PFI, જે તેના નેતાઓ, સભ્યો અને સહયોગીઓ દ્વારા કામ કરી રહી છે, તે સમુદાયમાં અશાંતિ ફેલાવવાનો પ્રયાસ કરી રહી છે.” જણાવી દઈએ કે ગુરુવારે NIA, ED અને કેટલાક રાજ્યોની પોલીસ દ્વારા PFIના 93 સ્થળો પર દરોડા પાડવામાં આવ્યા હતા, જેમાં PFIના કુલ 106 લોકોની ધરપકડ કરવામાં આવી હતી.
