ભારતીય મહિલા ટીમની દિગ્ગજ ખેલાડી ઝુલન ગોસ્વામીએ આંતરરાષ્ટ્રીય ક્રિકેટમાંથી નિવૃત્તિની સત્તાવાર જાહેરાત કરી છે. ઝુલને તેની છેલ્લી મેચ ઇંગ્લેન્ડ સામે લોર્ડ્સ ક્રિકેટ ગ્રાઉન્ડ પર રમી હતી, જેમાં ભારતીય ટીમ 16 રને જીતી હતી. ઝુલને આ મેચમાં 2 વિકેટ લીધી હતી.
ઝુલન ગોસ્વામીએ સોશિયલ મીડિયા પર નિવૃત્તિની જાહેરાત કરી. તેણે નિવૃત્તિનો પત્ર શેર કર્યો છે, જેમાં સ્પષ્ટ દેખાઈ રહ્યું છે કે તે ક્રિકેટમાંથી નિવૃત્તિ લેવાનું દુઃખી છે. જો કે તેણે કહ્યું છે કે તે ભારત માટે રમીને ગર્વ અનુભવે છે.
ઝુલન ગોસ્વામીની કારકિર્દી: ઝુલન ગોસ્વામી, જે ચકડા એક્સપ્રેસ તરીકે જાણીતી છે, તે વિશ્વની સૌથી ઝડપી બોલર અને સૌથી વધુ વિકેટ લેનારી બોલર છે. 6 જાન્યુઆરી 2002ના રોજ આંતરરાષ્ટ્રીય ક્રિકેટમાં પ્રવેશ કરનાર ઝુલને 19 વર્ષની કારકિર્દીમાં 284 મેચમાં 355 વિકેટ ઝડપી છે. મહિલા વર્લ્ડ કપમાં સૌથી વધુ વિકેટ લેવાનો રેકોર્ડ તેના નામે છે. તેણે 34 વર્લ્ડ કપ મેચમાં 43 વિકેટ લીધી છે. તેણે વર્લ્ડ કપમાં બે વખત 4 વિકેટ લીધી છે. ઝુલને તેની આંતરરાષ્ટ્રીય કારકિર્દીમાં 1924 રન પણ બનાવ્યા છે. જેમાં 3 અર્ધસદીનો પણ સમાવેશ થાય છે.
ઝુલન ગોસ્વામીની છેલ્લી મેચમાં પ્રથમ બેટિંગ કરતા ભારતે 45.4 ઓવરમાં 169 રન બનાવ્યા હતા જેના જવાબમાં ઈંગ્લેન્ડ 43.4 ઓવરમાં 153 રન જ બનાવી શકી હતી. આ મેચમાં ઝુલન ગોસ્વામીએ 10 ઓવરમાં 30 રન આપીને 2 વિકેટ ઝડપી હતી. ઝુલનનો 10 ઓવરનો ક્વોટા પૂરો થયા બાદ ભારતીય ખેલાડીઓએ ઝુલનને અભિનંદન આપ્યા અને ગળે લગાવ્યા.
ઝુલન ગોસ્વામીએ પત્રમાં લખ્યું છે કે, મારો ક્રિકેટ પરિવાર અને તેનાથી આગળ. આખરે એ દિવસ આવી ગયો! જેમ દરેક પ્રવાસનો અંત હોય છે, તેમ મારી 20 વર્ષથી વધુની ક્રિકેટ સફરનો આજે અંત આવે છે. હું ક્રિકેટના તમામ ફોર્મેટમાંથી મારી નિવૃત્તિની જાહેરાત કરું છું.
Thank you everyone! @BCCI @BCCIWomen pic.twitter.com/8TWq8SfxDj
— Jhulan Goswami (@JhulanG10) September 25, 2022
ઝુલન ગોસ્વામીએ લખ્યું, “જેમ કે અર્નેસ્ટ હેમિંગ્વેએ કહ્યું હતું કે, “સફરનો અંત હોવો સારો છે, પરંતુ તે સફર છે જે અંતમાં ગણાય છે.” મારા માટે આ સફર સૌથી સંતોષજનક રહી છે. તે આનંદદાયક, રોમાંચક રહી છે. અથવા ઓછા શબ્દોમાં. મારે કહેવું જ જોઇએ કે તે એક સાહસ હતું. મને બે દાયકાથી વધુ સમયથી ભારતની જર્સી પહેરવાનું અને મારી ક્ષમતા મુજબ મારા દેશની સેવા કરવાનું સન્માન મળ્યું છે. જ્યારે પણ હું મેચ પહેલા રાષ્ટ્રગીત સાંભળું છું , હું ગર્વની લાગણી અનુભવું છું..”
ઝુલન (39 વર્ષ) એ ઈંગ્લેન્ડ સામેની વનડે શ્રેણી સમાપ્ત થયા બાદ આંતરરાષ્ટ્રીય ક્રિકેટમાંથી નિવૃત્તિ લઈ લીધી છે. ભારતીય ટીમે આ સિરીઝમાં ક્લીન સ્વીપ કરીને આ દિગ્ગજ ઝડપી બોલરને ભવ્ય વિદાય આપી હતી. ઝુલને 2002માં ભારત માટે ડેબ્યૂ કર્યું હતું. તેણે પોતાની કારકિર્દીમાં 12 ટેસ્ટ, 204 ODI અને 68 T20 આંતરરાષ્ટ્રીય મેચ રમી હતી. આ તમામ મળીને તેણે 355 વિકેટ લીધી હતી.
ઝુલને તેની કારકિર્દીમાં પાંચ ODI વર્લ્ડ કપ (2005, 2009, 2013, 2017 અને 2022)માં ભાગ લીધો છે અને તે મહિલા વિશ્વ કપમાં સૌથી વધુ વિકેટ લેનારી બોલર છે. મહિલા ક્રિકેટમાં 250 થી વધુ ODI વિકેટ લેનારી તે એકમાત્ર ઝડપી બોલર છે.
