ધમાકેદાર બેટિંગ! ઇંગ્લેન્ડે દક્ષિણ આફ્રિકા સામે બનાવ્યો નવો વર્લ્ડ રેકોર્ડ
તાજેતરમાં, માન્ચેસ્ટરના મેદાન પર ઇંગ્લેન્ડ અને દક્ષિણ આફ્રિકા વચ્ચેની T20 શ્રેણીની બીજી મેચમાં ઇંગ્લિશ ટીમે બેટિંગનો એવો જાદુ બતાવ્યો જેણે ક્રિકેટ જગતમાં હલચલ મચાવી દીધી. આ મેચમાં ઇંગ્લેન્ડે એક સાથે અનેક નવા રેકોર્ડ બનાવ્યા અને એક મોટો રેકોર્ડ ભારતીય ટીમ પાસેથી છીનવી લીધો.
૧૨ સપ્ટેમ્બર, ૨૦૨૫ ના રોજ રમાયેલી આ મેચમાં, ઇંગ્લેન્ડના ઓપનરો ફિલ સોલ્ટ અને જોસ બટલરની જોડીએ દક્ષિણ આફ્રિકાના બોલરોને એક પણ તક આપી નહીં. તેમની તોફાની બેટિંગના કારણે ઇંગ્લેન્ડે ૨૦ ઓવરમાં ૩૦૪ રનનો વિશાળ સ્કોર બનાવ્યો. આ પહેલીવાર હતું જ્યારે ઇંગ્લેન્ડે T20 ઇન્ટરનેશનલમાં ૩૦૦ રનનો આંકડો પાર કર્યો હોય. આ જીત સાથે ઇંગ્લેન્ડે સીરિઝ ૧-૧થી બરાબર કરી દીધી છે.
પૂર્ણ સભ્ય દેશ સામે ૩૦૦ રન બનાવનાર પ્રથમ ટીમ
T20 ઇન્ટરનેશનલ ક્રિકેટના ઇતિહાસમાં અત્યાર સુધી માત્ર ત્રણ વખત ૩૦૦ રનનો આંકડો પાર થયો છે. આ રેકોર્ડ ઝિમ્બાબ્વે અને નેપાળના નામે પણ છે. જોકે, ઇંગ્લેન્ડે એક અનોખો રેકોર્ડ બનાવ્યો છે. તે પૂર્ણ સભ્ય (Full Member) ટીમ સામે ૩૦૦ કે તેથી વધુ રન બનાવનારી વિશ્વની પ્રથમ ટીમ બની ગઈ છે. આ પહેલા, પૂર્ણ સભ્ય દેશ સામે સૌથી વધુ રન બનાવવાનો રેકોર્ડ ભારતીય ટીમ પાસે હતો.
ભારતે ૨૦૨૪માં હૈદરાબાદના મેદાન પર બાંગ્લાદેશ સામે ૨૯૭ રન બનાવ્યા હતા. હવે ઇંગ્લેન્ડે ૩૦૪ રન બનાવીને ભારતનો આ રેકોર્ડ તોડી નાખ્યો છે.
પૂર્ણ સભ્ય ટીમો સામે T20I માં સૌથી વધુ સ્કોર કરનાર ટીમો
- ઇંગ્લેન્ડ – ૩૦૪ વિરુદ્ધ દક્ષિણ આફ્રિકા (માન્ચેસ્ટર, ૨૦૨૫)
- ભારત – ૨૯૭ રન વિરુદ્ધ બાંગ્લાદેશ (હૈદરાબાદ, ૨૦૨૪)
- ભારત – ૨૮૩ રન વિરુદ્ધ દક્ષિણ આફ્રિકા (જોહાનિસબર્ગ, ૨૦૨૪)
- અફઘાનિસ્તાન – ૨૭૮ રન વિરુદ્ધ આયર્લેન્ડ (દેહરાદૂન, ૨૦૧૯)
- ઇંગ્લેન્ડ – ૨૬૭ રન વિરુદ્ધ વેસ્ટ ઈન્ડિઝ (તારોઉબા, ૨૦૨૩)
પાવરપ્લેમાં ૧૦૦ રન બનાવ્યા
આ મેચમાં ઇંગ્લેન્ડે માત્ર સ્કોરનો જ નહીં, પરંતુ પાવરપ્લેનો પણ રેકોર્ડ બનાવ્યો. આંતરરાષ્ટ્રીય T20 ઇતિહાસમાં પહેલીવાર ઇંગ્લેન્ડ પાવરપ્લે (પ્રથમ ૬ ઓવર) માં ૧૦૦ રનનો આંકડો પાર કરવામાં સફળ રહ્યું. આ સાથે જ, ઇંગ્લેન્ડ ઓસ્ટ્રેલિયા, દક્ષિણ આફ્રિકા અને ઝિમ્બાબ્વે બાદ આ સિદ્ધિ મેળવનાર ચોથી પૂર્ણ સભ્ય ટીમ બની ગયું છે. ઇંગ્લેન્ડની આ શાનદાર ઇનિંગે ક્રિકેટ ચાહકોને ફરી એકવાર રોમાંચિત કરી દીધા છે. આ મેચમાં ઇંગ્લેન્ડે ૧૪૬ રનના મોટા અંતરથી જીત મેળવી, જે T20 ઇન્ટરનેશનલમાં તેમનો સૌથી મોટો વિજય પણ છે.
