ધો.9માં ભણતા વિદ્યાર્થીએ શિક્ષિકાને ચોડી દીધો લાફો: સુરત

50 વર્ષીય મહિલા ટીચરે તેના ક્લાસમાં ભણતા 15 વર્ષના સ્ટુડન્ટને મસ્તી ન કરવા અને તેના સહધ્યાયીને હેરાન ન કરવા માટે તાકીદ કરતા વિદ્યાર્થીએ ટીચરને લાફો મારી દીધો હતો. આ ઘટના સુરતની જાણિતી સ્કૂલ સર જે. જે. ઇંગ્લિશ સ્કૂલના શિક્ષિકા હસુમતી સારંગને સ્કૂલના એક વિદ્યાર્થીએ ફરિયાદ કરી હતી કે ધો. 9માં ભણતો અસીમ(નામ બદલ્યું છે) તેને હેરાન કરે છે. જેથી શિક્ષિકાએ અસીમને બોલાવી યોગ્ય વર્તન કરવાનું જણાવતા અસીમે પોતાના ટીચરને તમાચો જડ દીધો હતો.
આ ઘટનાથી શિક્ષિકાના ચહેરા પર ઈજા થઈ હતી અને લોહી નીકળવા લાગ્યું હતું. તો ઘટના બાદ તરત જ બીજા વિદ્યાર્થીઓ અને ટીચર્સ ઘટનાસ્થળે શિક્ષિકા સારંગની મદદ માટે દોડી ગયા હતા. જોકે ઘટનાથી શિક્ષિકા આઘાતના કારણે દિગ્મૂઢ બની ગયા હતા. સ્કૂલના પ્રિન્સિપલે આ અંગે કહ્યું કે, ‘પોતાના વિદ્યાર્થી દ્વારા આ પ્રકારનું વર્તન થતા તેઓ હજુ સુધી શોકમાં છે. જ્યારે અમે બધા જ આ ઘટનાથી ચિંતિત છીએ.’
દરમિયાન, અસીમ અને તેના પેરેન્ટ્સે આરોપ લગાવ્યો છે કે તેના ટીચર અસીમને પરેશાન કરતા હોઈ બાળક લાફો મારવા માટે ઉશ્કેરાયો હતો. તેમણે વધુમાં આરોપ મુક્યો કે ઘટના બાદ અન્ય વિદ્યાર્થીઓ અને ટીચરે પણ અસીમ સાથે હાથાપાયી કરી હતી અને જેના કારણે ઈજા થતા તેને હોસ્પિટલમાં દાખલ પણ કરવો પડ્યો છે.
અસીમના પિતાનું કહેવું છે કે ‘આ ઘટના બાદ અમારા પુત્રના ભવિષ્ય અંગે અમે ચિંતાતુર છીએ. તેણે ટીચરને લાફો માર્યા બાદ સ્કૂલના બીજા વિદ્યાર્થીઓ અને ટીચર્સે તેની સાથે ગેરવર્તણુક કરી હતી. જ્યારે આ ટીચર ઘણા સમયથી તેને પરેશાન કરતા હોવાથી હાથ ઉપાડવા માટે તે મજબૂર બન્ય હતો.’
સ્કૂલ ઓથોરિટીએ કહ્યું કે, ‘અમે સમગ્ર ઘટના અંગે ઝીમવટ પૂર્વક તપાસ કરી રહ્યા છીએ. અમે CCTV ફૂટેજના આધારે પણ વધુ તપાસ કરી રહ્યા છીએ કે ખરેખર શું બન્યું હતું.’ સ્કૂલ સુરત પારસી પંચાયત દ્વારા સંચાલિત છે અને શહેરની સૌથી જૂની સ્કૂલો પૈકી એક છે. જિલ્લા શિક્ષણ અધિકારીએ કહ્યું કે, ‘આ સમગ્ર મામલે પ્રિન્સિપલ પાસેથી રિપોર્ટ માગવામાં આવ્યો છે જે આગામી 6 દિવસમાં પોતાનો રિપોર્ટ સોંપશે’