નવરાત્રિ સ્પેશિયલ ફરાળી નમકીન: વ્રતમાં તળ્યા વિના બનાવો હેલ્ધી નાસ્તો
૨૨ સપ્ટેમ્બરથી નવરાત્રિનો પ્રારંભ થઈ રહ્યો છે, જે ૧ ઓક્ટોબરે નવમી તિથિ સાથે સંપન્ન થશે. આ નવ દિવસ દરમિયાન મા દુર્ગાના નવ સ્વરૂપોની પૂજા-અર્ચના કરવામાં આવે છે. આ સમયગાળામાં ઘણા લોકો વ્રત રાખે છે—કેટલાક ફક્ત પહેલા અને છેલ્લા દિવસે, તો કેટલાક પૂરા નવ દિવસ. ઉપવાસ દરમિયાન હળવી ભૂખ લાગે ત્યારે ઘણીવાર કોઈ હેલ્ધી અને ફરાળી નાસ્તાની જરૂર પડે છે.
આવા સમયે, અમે તમારા માટે લાવ્યા છીએ સ્પેશિયલ ફરાળી નમકીનની સરળ રેસિપી, જેને એકવાર બનાવીને આખા વ્રતમાં સ્ટોર કરી શકાય છે. આ નાસ્તો સ્વાદિષ્ટ તો છે જ, સાથે જ પૌષ્ટિક અને હલકો પણ છે.
સામગ્રી
- મગફળી – ૧ કપ
- બદામ – ૧ કપ
- કાજુ – ૧ કપ
- મખાના – ૧ કપ
- નાળિયેરની પાતળી સ્લાઇસ – ½ કપ
- કિસમિસ – થોડી
- લીલા મરચાં – ૨-૩ (ઝીણા સમારેલા)
- જીરું – ½ નાની ચમચી
- સિંધવ મીઠું – ½ નાની ચમચી
- કાળા મરીનો પાવડર – ½ નાની ચમચી
- ખાંડ – ½ નાની ચમચી (ઇચ્છા મુજબ)
- ઘી – ૧ મોટી ચમચી
બનાવવાની રીત
એક કડાઈમાં ઘી ગરમ કરો અને તેમાં મખાના, મગફળી, બદામ અને કાજુને ધીમી આંચ પર હળવા સોનેરી થાય ત્યાં સુધી શેકી લો.
હવે નાળિયેરની સ્લાઇસ નાખીને હળવા બ્રાઉન થાય ત્યાં સુધી શેકો.
થોડી કિસમિસ નાખો અને થોડી સેકન્ડ શેકીને બધી સામગ્રી કાઢી લો.
તે જ કડાઈમાં થોડું ઘી નાખીને જીરું અને ઝીણા સમારેલા લીલા મરચાંનો વઘાર કરો.
હવે તેમાં પહેલાથી શેકેલા નટ્સ અને મખાના નાખો અને સારી રીતે મિક્સ કરો.
ઉપરથી સિંધવ મીઠું, કાળા મરી અને જો તમે ઈચ્છો તો થોડી ખાંડ નાખીને ધીમી આંચ પર થોડીવાર શેકો, જેથી બધા ફ્લેવર સારી રીતે મિક્સ થઈ જાય.
સ્ટોર કરવાની રીત
- તૈયાર થયેલી નમકીનને સંપૂર્ણપણે ઠંડી થવા દો.
- પછી તેને એરટાઈટ ડબ્બામાં ભરીને સ્ટોર કરી લો.
આ નમકીન પૂરા ૯ દિવસ સુધી તાજી રહે છે અને વ્રતમાં હળવી ભૂખ લાગે ત્યારે તરત જ ખાઈ શકાય છે.
