પતિએ કરી અરજી, ‘પત્ની મોડી ઉઠે છે, જમવાનું ટેસ્ટી નથી બનાવતી’

મુંબઈના સાન્તા ક્રુઝ વિસ્તારમાં રહેતા એક યુવકે ફેમિલી કોર્ટમાં છૂટાછેડાની અરજી કરી. છૂટાછેડાનું કારણ જાણીને ફેમિલી કોર્ટે તેની અરજી ફગાવી દીધી હતી. પતિની ફરિયાદ હતી કે તેની પત્ની સવારે વહેલી નથી ઉઠતી અને સ્વાદિષ્ટ જમવાનું પણ નથી બનાવી શકતી. આ કારણોસર તે છૂટાછેડા લેવા માંગતો હતો. હવે આ યુવકે ફેમિલી કોર્ટનો ચુકાદો બોમ્બે હાઈકોર્ટમાં પડકાર્યો છે. તેણે હાઈકોર્ટમાં દલીલ કરી છે કે, ફેમિલી કોર્ટના આદેશમાં ભૂલ છે. તેણે પુરાવા તરીકે પોતાના પિતાનું સ્ટેટમેન્ટ પણ નોંધાવ્યું છે, જેમાં તેમણે દીકરાના આરોપોનું સમર્થન કર્યું છે.
આ યુવકની ફરિયાદ છે કે, જો તે અથવા તેનો પરિવાર તેની પત્નીને સવારે ઉઠાડવાનો પ્રયત્ન કરે તો તે દુર્વ્યવહાર કરતી હતી. અરજી કરનાર પતિનો આરોપ છે કે, ઓફિસેથી 6 વાગ્યે પાછી આવીને તેની પત્ની સુઈ જતી હતી અને લગભગ 8.30 વાગ્યે જમવાનું બનાવતી હતી.
યુવકે ફરિયાદ કરી કે, તે ટેસ્ટી અને માપસરનું જમવાનું પણ નહોતી બનાવતી અને કોઈ કારણોસર હું મોડો ઘરે આવું તો પાણી પણ નહોતી આપતી. જો કે પત્નીએ આ આરોપો ફગાવ્યા છે અને કહ્યું કે તે ઓફિસ જતા પહેલા આખા પરિવાર માટે જમવાનું બનાવીને જતી હતી.