૭૧મા રાષ્ટ્રીય ફિલ્મ પુરસ્કાર ૨૦૨૫: શાહરૂખ ખાન અને વિક્રાંત મસી શ્રેષ્ઠ અભિનેતા બન્યા, ‘12th Fail‘ને મળ્યો શ્રેષ્ઠ ફિલ્મનો પુરસ્કાર
ભારતીય સિનેમાના સૌથી પ્રતિષ્ઠિત પુરસ્કાર, ૭૧મા રાષ્ટ્રીય ફિલ્મ પુરસ્કારોના વિજેતાઓની ઘોષણા શુક્રવારે નવી દિલ્હીમાં કરવામાં આવી. આ વર્ષના પુરસ્કાર સમારોહમાં કેટલીક ઐતિહાસિક જીત જોવા મળી, જેમાં શાહરૂખ ખાન અને રાની મુખર્જી જેવા દિગ્ગજોએ તેમના દાયકાઓ લાંબા કરિયરમાં પહેલો રાષ્ટ્રીય પુરસ્કાર જીત્યો. વિધુ વિનોદ ચોપરા દ્વારા નિર્દેશિત ‘૧૨th ફેલ’ને શ્રેષ્ઠ ફીચર ફિલ્મનો સર્વોચ્ચ પુરસ્કાર મળ્યો. આ પુરસ્કારો માટે ૧ જાન્યુઆરી, ૨૦૨૩ થી ૩૧ ડિસેમ્બર, ૨૦૨૩ વચ્ચે CBFC દ્વારા પ્રમાણિત ફિલ્મોને ધ્યાનમાં લેવામાં આવી હતી. ફિલ્મ નિર્માતા આશુતોષ ગોવારિકરની અધ્યક્ષતાવાળી જ્યુરીએ વિજેતાઓની પસંદગી કરી.
અભિનયમાં દિગ્ગજોનો દબદબો
આ વર્ષના પુરસ્કારોનું મુખ્ય આકર્ષણ શ્રેષ્ઠ અભિનેતાનો પુરસ્કાર રહ્યો, જે શાહરૂખ ખાન અને વિક્રાંત મસીએ વહેંચ્યો. શાહરૂખ ખાનને ફિલ્મ ‘જવાન’માં તેમના શક્તિશાળી પ્રદર્શન માટે ૩૩ વર્ષના શાનદાર કરિયરમાં તેમનો પહેલો રાષ્ટ્રીય પુરસ્કાર મળ્યો. તે જ સમયે, વિક્રાંત મસીને ફિલ્મ ‘૧૨th ફેલ’માં IPS અધિકારી બનવા માટે સંઘર્ષ કરનાર વિદ્યાર્થી મનોજ કુમાર શર્માના જીવંત ચિત્રણ માટે આ સન્માન આપવામાં આવ્યું.
શ્રેષ્ઠ અભિનેત્રીનો પુરસ્કાર રાની મુખર્જીને ફિલ્મ ‘મિસેઝ ચેટર્જી વર્સેઝ નોર્વે’માં એક માતાના પોતાના બાળકો માટેના સંઘર્ષને હૃદયસ્પર્શી રીતે દર્શાવવા બદલ મળ્યો. આ તેમના ૩૦ વર્ષના કરિયરનો પહેલો રાષ્ટ્રીય પુરસ્કાર છે. પોતાની જીત પર રાનીએ કહ્યું, “હું મારા પ્રદર્શન માટે રાષ્ટ્રીય પુરસ્કાર જીતીને અભિભૂત છું… આ પુરસ્કાર માતૃત્વની સ્થિતિસ્થાપકતાની ઉજવણી કરતી આ વિશેષ પ્રોજેક્ટ પર કામ કરનારા બધા લોકો સાથે શેર કરું છું.” શાહરૂખ ખાને પણ પોતાની ખુશી વ્યક્ત કરતા કહ્યું, “આ સન્માન માટે ભારત સરકારનો આભાર.”
દાદાસાહેબ ફાળકે પુરસ્કારથી આ વર્ષે મહાન અભિનેતા મોહનલાલને સન્માનિત કરવામાં આવશે.
”12th Fail” અને ‘ધ કેરલા સ્ટોરી’ની મોટી જીત
”12th Fail” માત્ર શ્રેષ્ઠ ફિલ્મ બની નહિ, પરંતુ વિક્રાંત મસી માટે શ્રેષ્ઠ અભિનેતાનો પુરસ્કાર પણ લાવી. જ્યારે, સુદીપ્તો સેનને ફિલ્મ ‘ધ કેરલા સ્ટોરી’ માટે શ્રેષ્ઠ નિર્દેશકનો પુરસ્કાર મળ્યો. આ જ ફિલ્મ માટે પ્રશાંતનુ મહાપાત્રાએ શ્રેષ્ઠ સિનેમેટોગ્રાફીનો પુરસ્કાર પણ જીત્યો.
અન્ય મુખ્ય શ્રેણીઓના વિજેતા:
શ્રેષ્ઠ હિન્દી ફિલ્મ: કઠલ: એ જેકફ્રૂટ મિસ્ટ્રી.
શ્રેષ્ઠ મનોરંજન પ્રદાન કરનાર ફિલ્મ: રોકી ઔર રાની કી પ્રેમ કહાની.
રાષ્ટ્રીય, સામાજિક મૂલ્યોને પ્રોત્સાહન આપનાર શ્રેષ્ઠ ફિલ્મ: સેમ બહાદુર.
શ્રેષ્ઠ સહાયક અભિનેતા: વિજયરાઘવન (પૂક્કાલમ) અને મુથુપેટ્ટઈ સોમુ ભાસ્કર (પાર્કિંગ).
શ્રેષ્ઠ સહાયક અભિનેત્રી: ઉર્વશી (ઉલોજુક્કુ) અને જાનકી બોડીવાલા (વશ).
શ્રેષ્ઠ સંગીત નિર્દેશન (બેકગ્રાઉન્ડ સ્કોર): હર્ષવર્ધન રામેશ્વર (એનિમલ).
શ્રેષ્ઠ મહિલા પાર્શ્વ ગાયિકા: શિલ્પા રાવ (ચલિયા, જવાન).
શ્રેષ્ઠ એક્શન નિર્દેશન: હનુ-માન (તેલુગુ).
શ્રેષ્ઠ નોન-ફીચર ફિલ્મ: ફ્લાવરિંગ મેન.
આ પુરસ્કાર સમારોહ ૨૩ સપ્ટેમ્બર, ૨૦૨૫ ના રોજ નવી દિલ્હીના વિજ્ઞાન ભવનમાં યોજવામાં આવશે, જ્યાં રાષ્ટ્રપતિ દ્રૌપદી મુર્મુ વિજેતાઓને સન્માનિત કરશે. સમારોહનું સીધું પ્રસારણ યુટ્યુબ ચેનલ પર કરવામાં આવશે. રાષ્ટ્રીય ફિલ્મ પુરસ્કારોની સ્થાપના ૧૯૫૪ માં ભારતીય કલા અને સંસ્કૃતિને પ્રોત્સાહિત કરવા માટે કરવામાં આવી હતી અને તેને વ્યાવસાયિક પુરસ્કારોની તુલનામાં વધુ અધિકૃત માનવામાં આવે છે.
