ભારતીયોનું અમેરિકા જવાનું સપનું તૂટી રહ્યું છે, આ આંકડાઓ ચોંકાવી દેશે!
અમેરિકામાં ભારતીયો માટે વિઝા મેળવવામાં ભારે ઘટાડો થયો છે. H-1B, H4, F1, L1 અને L2 વિઝામાં છેલ્લા ત્રણ વર્ષમાં ભારતને સૌથી વધુ નુકસાન થયું છે, જ્યારે ચીન, નેપાળ અને વિયેતનામને ફાયદો થયો છે.
અમેરિકામાં કામ કરવા ઇચ્છુક ભારતીયો માટે રસ્તો હવે વધુ મુશ્કેલ બની રહ્યો છે. માત્ર H-1B વિઝાની અછત જ નહીં, પરંતુ ભારતીય પરિવારો અને વિદ્યાર્થીઓને મળતા અન્ય જરૂરી વિઝા જેવા કે H4 (પરિવાર માટે), F1 (વિદ્યાર્થીઓ માટે), L1 (કંપની ટ્રાન્સફર માટે) અને L2 (આ વિઝાધારકોના પરિવાર માટે) માં પણ ભારે ઘટાડો જોવા મળ્યો છે. મનીકંટ્રોલના એક રિપોર્ટ અનુસાર, છેલ્લા ત્રણ વર્ષમાં ભારતને આ વિઝા શ્રેણીઓમાં સૌથી વધુ નુકસાન થયું છે, જ્યારે ચીન, નેપાળ અને વિયેતનામ જેવા દેશોને ફાયદો થયો છે.
ચિંતાજનક આંકડાઓ
H4 વિઝા: H-1B વિઝા ધારકોના પરિવારના સભ્યોને મળતા H4 વિઝા આ વર્ષે મે મહિના સુધીમાં માત્ર 46,982 જ જારી કરવામાં આવ્યા છે, જ્યારે 2023માં આ સંખ્યા 71,130 હતી. એટલે કે, લગભગ 34%નો મોટો ઘટાડો થયો છે. આ સમયગાળામાં મેક્સિકોએ પોતાના H4 વિઝા બમણા કરી દીધા છે, અને ઘાના, દક્ષિણ આફ્રિકા, ફિલિપાઈન્સ પણ ઝડપથી આગળ વધ્યા છે. ચીનમાં પણ આ વિઝામાં 10.7%નો વધારો થયો છે.
F1 વિઝા: વિદ્યાર્થીઓ માટેનો F1 વિઝાનો હાલ વધુ ચિંતાજનક છે. 2023માં ભારતને લગભગ 17,800 વિઝા મળ્યા હતા, જે ઘટીને હવે માત્ર 11,484 થઈ ગયા છે. આ લગભગ 35%નો ઘટાડો છે. જ્યારે ચીનને લગભગ 10%નો વધારો મળ્યો છે, વિયેતનામને 40%થી વધુ અને નેપાળને તો 260%થી પણ વધુનો જબરદસ્ત વધારો થયો છે. આફ્રિકાના ઝિમ્બાબ્વે અને કેન્યા જેવા દેશોમાં પણ ત્રણ આંકડામાં વધારો થયો છે.
L1 અને L2 વિઝા: કંપનીઓની અંદર ટ્રાન્સફર માટેના L1 વિઝામાં પણ ભારતને લગભગ 28%નો ઘટાડો સહન કરવો પડ્યો છે. આ સાથે L2 વિઝામાં પણ લગભગ 38%નો ઘટાડો આવ્યો છે. જ્યારે, ચીને અહીં અનુક્રમે 64% અને 43%નો જબરદસ્ત વધારો નોંધાવ્યો છે. આ ઉપરાંત, ઇઝરાયેલ, વિયેતનામ, મલેશિયા અને બ્રાઝિલને પણ L1 અને L2 વિઝામાં સારો એવો ફાયદો થયો છે.
દક્ષિણ એશિયામાં ભારત કેમ પાછળ રહી ગયું?
દક્ષિણ એશિયાના બાકી દેશોની સરખામણીમાં ભારતને સૌથી વધુ નુકસાન થઈ રહ્યું છે. નેપાળે F1 વિઝામાં 262% અને L2 વિઝામાં 113%*\નો જબરદસ્ત વધારો કર્યો છે. બાંગ્લાદેશે H4 વિઝામાં 28% અને F1 વિઝામાં 5%નો સામાન્ય વધારો જોયો છે. પાકિસ્તાને તો F1 વિઝા લગભગ બમણા કરી દીધા છે અને H4 વિઝામાં પણ 40%નો વધારો થયો છે. શ્રીલંકામાં પરિસ્થિતિ થોડી મિશ્ર છે, જ્યાં H4 વિઝા વધ્યા છે, પણ વિદ્યાર્થી વિઝા ઘટ્યા છે.
રિપોર્ટ અનુસાર, H-1B વિઝાની સંખ્યા છેલ્લા બે વર્ષમાં 37%થી વધુ ઘટી ચૂકી છે. તેની અસર માત્ર નોકરી કરતા લોકો પર જ નહીં, પરંતુ તેમના પરિવાર અને અભ્યાસની તકો પર પણ પડી છે. આ ઉપરાંત, અમેરિકન સરકારની નવી યોજના, જેમાં H-1B વિઝા માટે વાર્ષિક $100,000નો ચાર્જ લગાવવાનો પ્રસ્તાવ છે, તે ભારતીય ઉમેદવારોની આશાઓ પર વધુ એક બોજ બની ગયો છે.
