Jailer 2: રજનીકાંતની ધમાકેદાર ફિલ્મની રિલીઝ ડેટ કન્ફર્મ, જાણો ક્યારે આવશે સિનેમાઘરોમાં
રજનીકાંતના ચાહકો માટે સારા સમાચાર છે. તેમની સૌથી વધુ રાહ જોવાતી ફિલ્મ ‘Jailer 2’ ની રિલીઝ ડેટ પરથી પડદો ઊંચકાઈ ગયો છે. સુપરસ્ટાર રજનીકાંતે પુષ્ટિ કરી છે કે તેમની આ એક્શન-થ્રિલર ફિલ્મ આવતા વર્ષે મોટા પડદા પર ધૂમ મચાવશે.
‘Jailer 2’ એ 2023માં આવેલી સુપરહિટ ફિલ્મ ‘Jailer’નો સીક્વલ છે. આ ફિલ્મની જાહેરાત 17 જાન્યુઆરીએ કરવામાં આવી હતી, જેમાં રજનીકાંતનો દમદાર એક્શન અવતાર જોવા મળ્યો હતો. હાલમાં, રજનીકાંત ‘Jailer 2’ના શૂટિંગમાં વ્યસ્ત છે અને તાજેતરમાં તેમણે પોતે જ ફિલ્મની રિલીઝ ડેટ વિશે માહિતી આપી છે.
‘Jailer 2’ ક્યારે રિલીઝ થશે?
અહેવાલ મુજબ, રજનીકાંત કેરળના પલક્કડ પાસે ‘Jailer 2’ના શૂટિંગ માટે પહોંચ્યા હતા. ત્યાં ચાહકોએ તેમનું ભવ્ય સ્વાગત કર્યું હતું. રજનીકાંતે કારની સનરૂફ ખોલીને ચાહકોને અભિવાદન કર્યું. અહેવાલ અનુસાર, ‘Jailer 2’નું ક્લાઇમેક્સ દ્રશ્ય કેરળમાં શૂટ કરવામાં આવ્યું છે.
કેરળમાં શૂટિંગ પૂરું કરીને રજનીકાંત ચેન્નઈ પાછા ફર્યા હતા. એરપોર્ટ પર તેમણે મીડિયા સાથે વાતચીત કરતાં જણાવ્યું કે આ ફિલ્મ 12 જૂન, 2026 ના રોજ સિનેમાઘરોમાં રિલીઝ થશે.
સન પિક્ચર્સના બેનર હેઠળ બની રહેલી આ ફિલ્મનું નિર્દેશન પણ પહેલા ભાગની જેમ નેલ્સન કરી રહ્યા છે. આ ફિલ્મમાં એસજે સૂર્યા અને નંદમૂરી બાલકૃષ્ણ જેવા કલાકારો પણ જોવા મળી શકે છે.
‘Jailer’નું બોક્સ ઓફિસ કલેક્શન
2023માં રિલીઝ થયેલી ‘Jailer’ ફિલ્મે બોક્સ ઓફિસ પર ₹600 કરોડથી વધુનું જબરદસ્ત કલેક્શન કર્યું હતું. આ ફિલ્મમાં રજનીકાંત મુખ્ય ભૂમિકામાં હતા, જ્યારે તેની સાથે રમ્યા કૃષ્ણન, વિનાયકન, સુનીલ, વસંત રવિ, યોગી બાબુ અને મિરના જેવા કલાકારો પણ હતા. આ ઉપરાંત, તમન્ના ભાટિયાના આઇટમ સોંગ ‘કાવલા’એ પણ ભારે લોકપ્રિયતા મેળવી હતી.
