મોબાઈલ બિલ: ‘અચ્છે દિન’ પૂરા, હવે નહીં મળે સસ્તા પ્લાન

છેલ્લા થોડા મહિનાથી તમારા કોલ ફ્રી થયા છે, ઇંટરનેટ ડેટા સસ્તો થયો છે એટલે કે તમારું મોબાઈલ બિલ ઘટ્યું છે. માસિક મોબાઈલ બિલમાં 30-40 ટકા ઘટાડો થયા બાદ હવે બિલ ઘટવાની કોઈ જ શક્યતા નથી. રેવેન્યૂ લોસ અને માર્જિન પ્રેશરનો સામનો કરતા ટેલિકોમ ઓપરેટર્સ પ્લાન સસ્તા કરવાને બદલે હવે વધુ ડેટા અને આકર્ષક ઓફર્સ આપી શકે છે. છેલ્લા પાંચ ત્રિમાસિક ગાળામાં જિયોની સામે ટકી રહેવા ભારતીય એરટેલ, આઈડિયા સેલ્યુલર અને વોડાફોન ઈંડિયાએ સસ્તા ટેરિફનો લાભ યુઝર્સને આપ્યો છે.
કાઉંટરપોઈંટ ટેક્નોલોજી માર્કેટના રિસર્ચ પ્રમાણે, છેલ્લા થોડા મહિનાથી લોકોના મોબાઈલ બિલમાં 90 ટકાનો ઘટાડો થયો છે. ગયા વર્ષની સરખામણીમાં યુઝર્સને વધારે ડેટા મળ્યો છે. ટેરિફ વોરમાં જૂન 2016થી ડિસેંબર 2017ની વચ્ચે એરટેલ, વોડાફોનને વાર્ષિક રેવન્યૂમાં 9.5 બિલિયન ડૉલર (આશરે 617.5 અબજ રૂપિયા)નું નુકસાન થયું છે. યુઝર્સને મોબાઈલ કંપનીઓ અને ટેલિકોમ ઓપરેટરની પાર્ટનરશીપની કેશબેક ઓફર્સથી પણ ફાયદો થયો છે.
KPMG ઈંડિયાના ટેલિકોમ હેડ મૃત્યુંજય કપૂરે જણાવ્યું કે, ટેલિકોમ કંપનીઓ માટે હવે વધારે પૈસા ઓછા કરવાનો વિકલ્પ નથી બચ્યો.” જાણકારોનું માનીએ તો આવનારા દિવસોમાં મોબાઈલ યુઝર્સને માસિક બિલમાં વધુમાં વધુ 10-15 ટકાનો જ ફાયદો થશે. જો કે વિવિધ ઓફર્સ યુઝર્સને મળતી રહેશે.