આર્યન ખાનની વેબ સિરીઝ “ધ બેડ્સ ઓફ બોલિવુડ”નાં સીનને લઈ સમીર વાનખેડે પહોંચ્યા દિલ્હી કોર્ટ તો જાણો કોર્ટે શું કહ્યું..
શાહરૂખ ખાનના પુત્ર આર્યન ખાનની પહેલી વેબ સિરીઝ, “ધ બેડ્સ ઓફ બોલિવુડ”, હાલમાં ચર્ચામાં છે. આ સિરીઝના એક સીનમા ભૂતપૂર્વ નાર્કોટિક્સ કંટ્રોલ બ્યુરો (NCB) અધિકારી સમીર વાનખેડેની મજાક ઉડાડવામાં આવી હોવાનું કહેવાય છે, આ સીને વિવાદ ઉભો કર્યો છે. સમીર વાનખેડેએ દિલ્હી હાઈકોર્ટમાં માનહાનિનો દાવો દાખલ કર્યો છે, જેમાં શાહરૂખ ખાન અને ગૌરી ખાનની કંપની, રેડ ચિલીઝ એન્ટરટેઈનમેન્ટ અને નેટફ્લિક્સ પર તેમની ઈમેજ ખરાબ કરવાનો આરોપ લગાવ્યો છે.
સમીર વાનખેડેનો આરોપ
પોતાની અરજીમાં સમીર વાનખેડેએ દાવો કર્યો છે કે “ધ બેડ્સ ઓફ બોલિવુડ” માં આ દ્રશ્ય ખોટું, દુર્ભાવનાપૂર્ણ અને બદનક્ષીભર્યું છે. તેમણે જણાવ્યું હતું કે આ દ્રશ્ય માત્ર તેમની છબી ખરાબ કરતું નથી પરંતુ નાર્કોટિક્સ કંટ્રોલ બ્યુરો જેવી અમલીકરણ એજન્સીઓને પણ ખોટી રીતે રજૂ કરે છે.
દિલ્હી હાઈકોર્ટમાં સુનાવણી દરમિયાન શું થયું?
દિલ્હી હાઈકોર્ટે આજે આ મામલાની સુનાવણી કરી. વાનખેડેનું પ્રતિનિધિત્વ કરતા વરિષ્ઠ વકીલ સંદીપ સેઠીએ દલીલ કરી હતી કે વેબ સિરીઝ દિલ્હી સહિત સમગ્ર ભારતમાં જોવામાં આવી રહી છે. તેમણે કહ્યું કે “આ શ્રેણીને કારણે મારા ક્લાયન્ટ વિરુદ્ધ સોશિયલ મીડિયા પર મીમ્સ બનાવવામાં આવી રહ્યા છે, જે ખાસ કરીને દિલ્હીમાં તેમની પ્રતિષ્ઠાને અસર કરી રહ્યા છે.” સેઠીએ ₹2 કરોડના નુકસાનની માંગ કરી હતી અને પ્રસ્તાવ મૂક્યો હતો કે આ રકમ ટાટા મેમોરિયલ કેન્સર હોસ્પિટલને દાનમાં આપવામાં આવે.
કોર્ટે વાનખેડેની અરજી ફગાવી દીધી
દિલ્હી હાઈકોર્ટમાં કેસની સુનાવણી દરમિયાન, રેડ ચિલીઝ એન્ટરટેઈનમેન્ટ અને નેટફ્લિક્સ વતી વરિષ્ઠ વકીલો હરીશ સાલ્વે અને મુકુલ રોહતગીએ દલીલ કરી હતી. કોર્ટે સમીર વાનખેડેના વકીલને કાર્યવાહીના આધાર વિશે પ્રશ્ન કર્યો. ન્યાયાધીશે કહ્યું, “તમારી અરજી માન્ય નથી. હું તમારી અરજી ફગાવી રહ્યો છું.” તેમણે એમ પણ કહ્યું કે જો વાનખેડેએ બહુવિધ અધિકારક્ષેત્રોમાં માનહાનિનો દાવો કર્યો હોત અને દિલ્હી તે સ્થાન હતું જ્યાં સૌથી વધુ નુકસાન થયું હતું, તો કેસ પર વિચાર કરી શકાયો હોત.
