પાકિસ્તાનના ભૂતપૂર્વ વડા પ્રધાન ઇમરાન ખાને દાવો કર્યો છે કે તત્કાલીન આર્મી ચીફ જનરલ કમર જાવેદ બાજવાએ તેમના પર ભારત સાથે મૈત્રીપૂર્ણ સંબંધો સ્થાપિત કરવા દબાણ કર્યું હતું.
કાશ્મીર મુદ્દા અને સરહદ પારના આતંકવાદને લઈને ભારત અને પાકિસ્તાન વચ્ચેના સંબંધો તણાવપૂર્ણ રહ્યા છે. 5 ઓગસ્ટ, 2019ના રોજ જમ્મુ અને કાશ્મીરમાંથી કલમ 370 હટાવ્યા બાદ અને રાજ્યને બે કેન્દ્રશાસિત પ્રદેશોમાં વિભાજિત કર્યા પછી બંને દેશો વચ્ચેના સંબંધોમાં ખટાશ આવી ગઈ હતી.
ઇમરાન ખાને શનિવારે સાંજે લાહોરમાં પોતાના જમાન પાર્ક સ્થિત નિવાસસ્થાને પત્રકારો સાથે વાતચીત કરતા દાવો કર્યો હતો કે જનરલ બાજવા ઈચ્છતા હતા કે હું ભારત સાથે મૈત્રીપૂર્ણ સંબંધો બનાવું. તેઓએ આ માટે મારા પર દબાણ કર્યું, તેનાથી અમારા સંબંધો ખરાબ થયા. ઇમરાને પુનરોચ્ચાર કર્યો કે જ્યાં સુધી જમ્મુ-કાશ્મીરનો વિશેષ દરજ્જો પુનઃસ્થાપિત ન થાય ત્યાં સુધી તેમની સાથે શાંતિ મંત્રણા ન કરવી જોઈએ.
ભારતે પાકિસ્તાનને વારંવાર કહ્યું છે કે તે આતંકવાદ, દુશ્મનાવટ અને હિંસા મુક્ત વાતાવરણમાં ઇસ્લામાબાદ સાથે સામાન્ય પડોશી સંબંધો ઈચ્છે છે. પીટીઆઈ પ્રમુખે કહ્યું કે નિવૃત્ત જનરલે પાકિસ્તાન સાથે જે કર્યું તે દુશ્મન પણ કરી શક્યું નથી. ઇમરાને કહ્યું કે બાજવાને સેનાને જવાબદાર ઠેરવવા જોઇએ.
ઇમરાનનો આરોપ- બાજવા મારી હત્યા કરાવવા માંગતા હતા
ઇમરાને બાજવા પર આરોપ લગાવ્યો કે તેઓ ન માત્ર તેમના દેશના પતન માટે જવાબદાર છે, પરંતુ આર્થિક વિનાશનો પાયો પણ નાખ્યો. આ સાથે તેમના પક્ષના સભ્યો અને પત્રકારો પર પણ અત્યાચાર ગુજારવામાં આવ્યો. પૂર્વ ક્રિકેટરે આરોપ લગાવ્યો કે બાજવા મારી હત્યા કરાવવા માંગતા હતા.
જણાવી દઈએ કે, ગયા વર્ષે એપ્રિલમાં અવિશ્વાસ પ્રસ્તાવ દ્વારા સત્તા પરથી હટાવવામાં આવ્યા ત્યારથી જ ઇમરાન ખાનનો જનરલ (નિવૃત્ત) બાજવા સાથે વિવાદ ચાલી રહ્યો છે. જનરલ બાજવા સતત બે ટર્મ સેવા આપ્યા બાદ ગયા વર્ષે 29 નવેમ્બરે નિવૃત્ત થયા હતા.
પંજાબ અને ખૈબર પખ્તુનખ્વામાં ચૂંટણીમાં વિલંબ
આ સિવાય ઇમરાને પીએમએલ-એનની આગેવાનીવાળી સરકાર પર પંજાબ અને ખૈબર પખ્તુનખ્વા પ્રાંતમાં ચૂંટણીમાં વિલંબ કરવાનો આરોપ લગાવ્યો હતો. ઇમરાને કહ્યું કે આ પ્રાંતોમાં ચૂંટણી યોજવામાં વિલંબથી ભ્રષ્ટાચારીઓને ફાયદો થશે. તેઓ પીટીઆઈને કચડી નાખવા અને ઇમરાન ખાનને ખતમ કરવાની આશામાં ચૂંટણીમાં વિલંબ કરી રહ્યા છે. ઇમરાને કહ્યું કે જો 90 દિવસમાં ચૂંટણી નહીં થાય તો પાકિસ્તાન બંધારણ વગરનું થઈ જશે.
