દેશની તમામ હોઈકોર્ટમાં લાગશે ‘જસ્ટિસ ક્લોક’, જે કહેશે કોર્ટે કેટલું કામ કર્યું

દેશની તમામ હાઈકોર્ટ અને અન્ય કોર્ટમાં પડતર કેસોની સંખ્યા વધી રહી છે જેના કારણે લોકોને ન્યાય આપવામાં ઢીલાશ રહે છે. અને મોડો ન્યાય આપવો એટલે કે ન્યાય ન આપવા બરોબર છે. ત્યારે દેશની તમામ 24 હાઈકોર્ટમાં રોજના કેટલા કેસનું નિવારણ થયું અને કેટલા પડતર કેસો છે અને કામ કરવાની દ્રષ્ટીએ કઈ કોર્ટ વધુ સારુ કામ કરે છે તે દર્શાવતી LED ‘જસ્ટિસ ક્લોક’ લગાવવામાં આવશે. ગત વર્ષે વડાપ્રધાન મોદી દ્વારા ન્યાયતંત્રમાં આવી ગયેલી સુસ્તીને દૂર કરવાના પ્રયસારુપે આ પ્રકારનો વિચાર જાહેર કરવામાં આવ્યો હતો. જેથી સામાન્ય લોકોમાં પણ કોર્ટની કાર્યવાહી અંગે અવેરનેસ આવે. આ વિચારને એકવાર હાઈકોર્ટમાં અમલમાં લેવાયા બાદ દેશભરની નીચલી અદાલતોમાં પણ તેનું અમલિકરણ કરવામાં આવશે. રાજ્યકક્ષાના કેન્દ્રીય કાયદા પ્રધાન પી.પી. ચૌધરીએ આ અંગે જણાવ્યું કે, ‘આ ક્લોક લગાવવા પાછળનો હેતું દેશની તમામ કોર્ટ વચ્ચે ઝડપી અને સારુ કામકાજ કરવા માટે સ્પર્ધાત્મક વાતાવરણ ઉભુ કરવાનો પણ છે. જેથી કેટલા પડતર કેસ અને કેટલા ઉકેલ્યા તેના આધારે તમામ કોર્ટને પરફોર્મન્સ રેંક પણ આપવામાં આવશે.’ આ પ્રકારની જસ્ટિસ ક્લોકનું પહેલું મોડેલ ગતવર્ષે દિલ્હીમાં કાયદા મંત્રાલય અંતર્ગત આવતી દિલ્હી જસ્ટિસ ડિપાર્ટમેન્ટ ઓફિસમાં લગાવવામાં આવ્યું હતું. દિલ્હીના જેસલમેર હાઉસમાં લગાડવામાં આવેલ જસ્ટિસ ક્લોક લોકોને કેન્દ્રમાં રાખતી સર્વિસ ઉપરાંત ડિસ્ટ્રિક્ટ અને સબોર્ડિનેટ કોર્ટની કામકાજની માહિતી પણ દર્શાવે છે.