જાતિનું નકલી પ્રમાણપત્ર આપ્યું તો થશે 3 વર્ષની જેલ, વિધાનસભામાં બિલ પાસ

બુધવારે ગુજરાત વિધાનસભામાં બિલ પસાર થયું, જે જાતિના પ્રમાણપત્રના થતા દુરુપયોગને રોકશે. હવે જાતિના પ્રમાણપત્રનો ખોટો ઉપયોગ કરવો દંડનીય ગુનો ગણાશે. ‘ગુજરાત અનુસૂચિત જાતિ, અનુસૂચિત જનજાતિ અને અન્ય પછાત વર્ગ (કાસ્ટ સર્ટિફિકેટની ખરાઈ અને ફાળવણી પર નિયંત્રણ) બિલ 2018’ સત્રના છેલ્લા દિવસે ગૃહમાં સર્વસંમતિથી પસાર થયું.
આદિજાતિ વિકાસ મંત્રી ગણપત વસાવાએ રજૂ કરેલા બિલ પ્રમાણે, સરકારી નોકરી મેળવવા કે શૈક્ષણિક સંસ્થાઓમાં એડમિશન લેવા માટે જો કોઈ નકલી જાતિનું પ્રમાણપત્ર રજૂ કરશે તો તેને 3 વર્ષની જેલ થશે. ગુના પ્રમાણે ઓછામાં ઓછી 6 મહિનાની તો જેલ થશે જ. સાથે 50 હજાર રૂપિયાનો દંડ પણ થશે. આ પ્રકારના કેસમાં દંડ 10,000થી ઓછો તો નહીં જ હોય.
મંત્રી વસાવાએ કહ્યું કે, “સ્થાનિક સ્વરાજની ચૂંટણીના ઉમેદવારો પણ જો કાસ્ટ સર્ટિફિકેટનો ખોટો ઉપયોગ કરશે, તો તેમને પણ આ જ પ્રમાણેની સજા અને દંડ કરવાની જોગવાઈ છે. સાથે જ આમ કરનાર ઉમેદવારની ઉમેદવારી રદ કરાશે અને ચૂંટણી પણ રદ કરાશે. કો-ઓપરેટીવ સોસાયટીની ચૂંટણી માટે પણ આ જ કાયદો લાગૂ પડશે.”
જે સરકારી અધિકારીએ જાતિના નકલી પ્રમાણપત્ર બનાવી આપ્યા હશે તેને પણ આ જ પ્રકારની સજા થશે. જેમણે નકલી પ્રમાણપત્ર બતાવીને નોકરી મેળવી હશે તેમની પણ નોકરીમાંથી હકાલપટ્ટી થશે. આ બિલની જોગવાઈ પ્રમાણે ખોટું પ્રમાણપત્ર આપીને નોકરી મેળવનાર વ્યક્તિ પાસેથી નોકરી દરમિયાન મળેલા નાણાં અને લાભો પાછા મેળવવાની સરકારને સત્તા છે. ખોટા પ્રમાણપત્ર આપીને મેળવેલું એડમિશન પણ રદ કરાશે. વિદ્યાર્થીની ડિગ્રી પણ રદ કરાશે.
બિલમાં કાસ્ટ સર્ટિફિકેટ મેળવવા માટે પણ નવા નિયમો ઉમેરવામાં આવ્યા છે. સરકારે નિયુક્ત કરેલા સક્ષમ અધિકારીઓ અરજીકર્તાની સ્થિતિની ખરાઈ કર્યા પછી જ જાતિનું પ્રમાણપત્ર આપશે. આ માટે નક્કી કરેલી સમિતિને જો અરજીકર્તા શંકાસ્પદ જણાય તો તેની પૂછપરછ પણ કરી શકે છે. આ બિલ હવે સંમતિ માટે ગવર્નરને મોકલાશે.