પ્રેમ સંબંધોના કારણે બંધાયેલ શારીરિક સંબંધ રેપ નથીઃ હાઈકોર્ટ

બૉમ્બે હાઈકોર્ટની ગોવા બ્રાંચે હાલમાં જ આપેલ એક ચૂકાદામાં કહ્યું કે, ‘જો પુરુષ અને સ્ત્રી વચ્ચે પ્રેમ સંબંધ હોય અને તેના પરિણામે બંને વચ્ચે સમજૂતીથી બંધાતા શારીરિક સંબંધને રેપની વ્યાખ્યામાં ન આવરી શકાય.’ કોર્ટે કહ્યું કે જ્યારે બંને વચ્ચે ગાઢ પ્રેમ હોવાના સબૂત હોય અને ત્યારે તથ્યોને ખોટી રીતે આધાર માનીને પુરુષને રેપનો આરોપી ગણી શકાય નહીં.
હાઈકોર્ટે આ નિર્ણય યોગેશ પાલેકરના કેસમાં આપ્યો છે. જેમના પર એક મહિલા સાથે લગ્નનો વાયદો કરીને રેપ કરવાનો આરોપમાં 7 વર્ષની જેલ અને રુ.10000નો દંડ કરવામાં આવ્યો હતો. કોર્ટે 2013ના આ કેસમાં આદેશ આપતા આરોપીની સજા અને દંડને રદ કર્યો હતો. યોગેશ ગોવાના એક કસિનોમાં શેફનું કામ કરતો હતો અને તેની સાથે જ કામ કરતી એક યુવતિ સાથે તેનો સંબંધ બંધાયો હતો.
યુવતિએ આરોપ લગાવતા કહ્યું કે, ‘યોગેશ પરિવાર સાથે મળાવીશ તેમ કહીને પોતાના ઘરે લઈ ગયો હતો. જ્યાં તેમણે રાત્રિરોકાણ કર્યું હતું જે દરમિયાન તેમની વચ્ચે પહેલીવાર શારીરિક સંબંધ ભંધાયો હતો. જે બાદ બીજી 3-4 વખતે તેમની વચ્ચે સંબંધ બંધાયો હતો. જેના આધારે યુવતિ યોગેશ વિરુદ્ધ રેપની ફરિયાદ દાખલ કરી હતી.’
કોર્ટે પોતાની સુનાવણીમાં નોંધ્યું કે યુવતી અને યુવકના સંબંધ એટલા મજબૂત હતા કે યુવતિ પાલેકરને આર્થિક મદદ પણ કરતી હતા. જસ્ટિસ સીવી ભદાંગે ચૂકાદો આપતા કહ્યું કે, ‘તેમનો સંબંધ ફક્ત પાલેકરના વાયદાઓના આધારે નહોતો. પરંતુ બંનેની સમજૂતીના કારણે બન્યો હતો. યુવતિ પાલેકરને ફક્ત આર્થિક સહયતા જ નહોતી આપતી પરંતુ જ્યારે પાલેકરે ગોવા ખાતે ડિપ્રેશનની સારવાર કરાવી તો મહિલાએ ફરિયાદ પણ પાછી લઈ લીધી હતી. જે દર્શાવે છે કે બંને વચ્ચે ગાઢ પ્રેમ સંબંધ હતો.’