શું જંક ફૂડ્સ પણ આપણી રોગપ્રતિકારક શક્તિ વધારી શકે છે? આ રહ્યા શ્રેષ્ઠ વિકલ્પો
ચિપ્સ, બર્ગર, પિઝા જેવી વસ્તુઓને સામાન્ય રીતે સ્વાસ્થ્ય માટે નુકસાનકારક માનવામાં આવે છે, કારણ કે તેમાં ખાંડ, મીઠું, ચરબી અને કેલરી વધુ હોય છે. પરંતુ કેટલાક જંક ફૂડ્સ એવા છે જે સ્વાસ્થ્ય માટે ફાયદાકારક પણ હોઈ શકે છે. આવો, જાણીએ તેના વિશે.
ફિટ રહેવા માટે હંમેશા હેલ્ધી ખાવાની અને જંક ફૂડ્સથી દૂર રહેવાની સલાહ અપાય છે. જોકે, કેટલાક જંક ફૂડ્સ એવા હોય છે, જે સ્વાસ્થ્ય માટે સારા હોય છે. આ તેમના ઘટકો (Ingredients) પર નિર્ભર કરે છે. જો તેમને હેલ્ધી વસ્તુઓનો ઉપયોગ કરીને અને યોગ્ય રીતે બનાવવામાં આવે, તો તે ફાયદાકારક બની શકે છે. પરંતુ તેનું સેવન મર્યાદિત માત્રામાં જ કરવું જોઈએ. માર્ગેરીટા પિઝાથી લઈને બેક્ડ બીન્સ સુધી, ઘણા વિકલ્પો છે.
ધ સનના રિપોર્ટમાં ન્યુટ્રિશનલ થેરાપિસ્ટ એવી વ્હાઇટહેડે એક રસપ્રદ વાત જણાવી છે કે માત્ર હેલ્ધી સુપરફૂડ્સ જ નહીં, પરંતુ કેટલાક જંક ફૂડ્સ પણ આપણી રોગપ્રતિકારક શક્તિ (Immunity) વધારવામાં મદદ કરી શકે છે.
ઇમ્યુનિટી વધારવામાં મદદ કરતા જંક ફૂડ્સના વિકલ્પો
1. માર્ગેરીટા પિઝા
માર્ગેરીટા પિઝામાં રહેલો ટામેટાંનો સોસ લાઇકોપીનથી ભરપૂર હોય છે, જે ઇમ્યુન સેલ્સને સુરક્ષા આપે છે. લાઇકોપીન એક શક્તિશાળી એન્ટીઑકિસડન્ટ છે. તેમાં વપરાતા મોઝેરેલા ચીઝમાં પણ પ્રોટીન અને વિટામિન બી12 હોય છે. વળી, ઓરેગાનો સોજો ઘટાડવામાં અને પાચનમાં મદદ કરે છે.
2. હેમબર્ગર
ઇમ્યુનિટી માટે ઝિંક ખૂબ જ જરૂરી છે. એક સારી ગુણવત્તાવાળો બર્ગર ઝિંકથી ભરપૂર હોય છે. બીફ પેટીમાં ઝિંક હોય છે, જે શરીરના ટી-સેલ્સને સક્રિય કરે છે, જે સંક્રમણ સામે લડવાનું કામ કરે છે. ઝિંકની ઊણપથી ઇમ્યુન સિસ્ટમ પર અસર પડે છે.
3. કરી
કરી શિયાળામાં ફ્લૂથી બચાવવા માટે અસરકારક સાબિત થઈ શકે છે. કરીમાં રહેલા આદુમાં (Ginger) જિંજરોલ નામનું તત્વ હોય છે, જે વ્હાઇટ બ્લડ સેલ્સને બેક્ટેરિયા અને વાયરસ સામે લડવા માટે એલર્ટ કરે છે. કરીમાંના મસાલા સોજો ઘટાડવામાં મદદ કરે છે.
4. ગાર્લિક બ્રેડ
આ બનાવવા માટે ઉપયોગમાં લેવાતું લસણ ખૂબ જ ફાયદાકારક છે. લસણને કાપવા કે કચડવાથી તેમાં એલિસિન નામનું તત્વ બને છે, જે ઇમ્યુનિટીને મજબૂત કરે છે. લસણ એક શક્તિશાળી એન્ટિમાઇક્રોબાયલ છે, જે વાયરસ અને બેક્ટેરિયા સામે લડે છે. તેને કાપીને થોડીવાર માટે મૂકી દો જેથી એલિસિન સારી રીતે બની શકે.
5. ચિલી કોન કાર્ને
આ વાનગીમાં ઘણા જરૂરી પોષક તત્વો હોય છે, જેમ કે રાજમા જે ફાઇબર અને પ્રોટીનનો સારો સ્ત્રોત છે. બીફમાંથી ઝિંક અને પ્રોટીન મળે છે, અને ટામેટાંના બેઝમાંથી લાઇકોપીન મળે છે. રાજમાનો ફાઇબર પેટમાં રહેલા સારા બેક્ટેરિયાને પોષણ આપીને ઇમ્યુન સિસ્ટમને મજબૂત બનાવે છે.
6. બેક્ડ બીન્સ
બેક્ડ બીન્સ ઇમ્યુનિટી વધારવામાં મદદરૂપ છે. તેમાં પ્રોટીન અને વિટામિન બી કોમ્પ્લેક્સ હોય છે, જે ઇમ્યુન કોશિકાઓને યોગ્ય રીતે કામ કરવામાં મદદ કરે છે. તે ફાઇબરથી પણ ભરપૂર છે, જે ટોક્સિન્સને બહાર કાઢવામાં મદદ કરે છે.
7. મૅકરોની ચીઝ
ચીઝવાળી આ વાનગી પણ સ્વાસ્થ્ય માટે સારી ગણી શકાય. ચીઝ ઝિંકનો સારો સ્ત્રોત છે, જે શરીરના ટી-સેલ્સને સક્રિય કરે છે. વળી, ડ્યુરમ ઘઉંમાંથી બનેલી મેકરોની વધારે પ્રોટીન આપે છે, જે ઇમ્યુનિટી વધારવામાં મદદરૂપ થઈ શકે છે.
8. ક્રિસ્પ્સ (ચિપ્સ)
એક પેકેટ ચિપ્સ ખાવું હેલ્ધી ન ગણાય, પરંતુ બટાકામાં પોટેશિયમ, મેગ્નેશિયમ અને વિટામિન સી હોય છે. બટાકામાં રહેલો રેઝિસ્ટન્સ સ્ટાર્ચ (એક પ્રકારનો ફાઇબર) પેટના સારા બેક્ટેરિયાને સંતુલિત રાખે છે, જે ઇમ્યુન સિસ્ટમને મજબૂત બનાવે છે. જો તમે ફિશ એન્ડ ચિપ્સ ખાઓ છો, તો માછલીમાંથી મળતું ઓમેગા-3 ફેટી એસિડ ઇમ્યુન સિસ્ટમને સપોર્ટ કરે છે.
