એન્જીન્યરીંગનો અભ્યાસ હવે હિંદી માધ્યમમાં પણ થઈ શકશે

હવે અંગ્રેજીની સાથે સાથે હિંદી માધ્યમમાં પણ એન્જિનિયરિંગનો અભ્યાસ થઇ શકશે. ટેકનિકલ સંસ્થાઓને તેની સાથે જોડાયેલા કોર્સ હવે હિંદી માધ્યમમાં ભણાવવાની સ્વતંત્રતા મળશે. સરકારે તેને લઇને ટેકનિકલ સંસ્થાઓને આ સગવડ આપી છે. સાથે સાથે તેને પ્રોત્સાહિત કરવા માટે એન્જિનિયરિંગ સાથે જોડાયેલા પુસ્તકોને હિંદીમાં તૈયાર કરવાની પહેલ પણ કરી છે. સરકારનું માનવું છે કે તેનાથી વિદ્યાર્થીઓમાં એન્જિનિયરિંગમાં રસ વધશે. કેમ કે અત્યારે ભાષાની સમસ્યાના કારણે મોટી સંખ્યામાં વિદ્યાર્થીઓ એન્જિનિયરિંગનો અભ્યાસ કરવાથી પાછા પડે છે. એન્જિનિયરિંગનો અભ્યાસ હિંદી માધ્યમમાં કરાવવાની આ પહેલ એઆઇસીટીઇઅે કરી છે. તાજેતરમાં સરકારે તેને મંજૂરી આપી છે. જોકે સંસ્થાઓ પર તેને જબરદસ્તીથી થોપવામાં નહીં આવે. તેઓ પોતાની મરજીથી ઇન્સ્ટિટયૂટમાં એન્જિનિયરિંગના અભ્યાસ માટે અંગ્રેજી કે હિંદી કોઇ પણ ભાષા પસંદ કરવા સ્વતંત્ર હશે. એઆઇસીટીઇનું માનવું છે કે આની પહેલ થોડા સમય પહેલાં થવી જોઇતી હતી, પરંતુ તેની રાહમાં સૌથી મોટી બાધા પાઠય પુુસ્તકોની કમીની હતી. જેને હવે દૂર કરવાની કોશિશ થઇ રહી છે. એન્જિનિયરિંગ સાથે જોડાયેલાં પુસ્તકોને હિંદીમાં તૈયાર કરનારા લેખકોને પણ પ્રોત્સાહિત કરવામાં આવી રહ્યા છે. થોડા સમય પહેલાં કેન્દ્રીય પ્રધાન સત્યપાલસિંહે એન્જિનિયરિંગના અભ્યાસક્રમ સાથે જોડાયેલા પુસ્તકોને તૈયાર કરનારા લેખકોને પુરસ્કૃત પણ કર્યા હતા. એવું માનવામાં આવી રહ્યું છે કે સરકારની આ પહેલથી એન્જિનિયરિંગ સંસ્થાઓેની ગુણવત્તા સુધારવામાં મદદ મળશે. કારણ કે હાલમાં દેશમાં મોટી સંખ્યામાં સીટો ખાલી રહેવાથી કેટલીયે એન્જિનિયરિંગ કોલેજો બંધ થઇ રહી છે. ઉલ્લેખનીય છે કે ટેકનિકલ શિક્ષણ સાથે જોડાયેલ આઇઆઇટી અને એન્જિનિયરિંગ કોલેજોનું સંચાલન એઆઇસીટીઇના નિયમો હેઠળ થાય છે. તેમને પોતાને ત્યાં સંચાલિત થનારા દરેક કોર્સની પરવાનગી એઆઇસીટીઇ પાસેથી લેવાની હોય છે. એઆઇસીટીઇના અધ્યક્ષ પ્રો.અનીલ સહત્રબુદ્ધે જણાવ્યું કે એઆઇસીટીઇ સાથે જોડાયેલા કોઇ પણ કોર્સને હવે હિંદીમાં ભણાવવા પર કોઇ પ્રતિબંધ નથી. કોઇ પણ સંસ્થા હિંદી માધ્યમમાં તેનો અભ્યાસ કરાવી શકે છે.