તાપમાન 44 ડિગ્રીને પારઃ ગાંધીનગર

રાજ્યભરમાં ગરમીનો પારો ઉંચકાતાં લોકો ત્રાહિમામ પોકારી ઉઠ્યા છે. આગામી ત્રણ દિવસો સુધી ગાંધીનગરમાં હજુ ગરમીથી રાહત નહીં મળે. હવામાન ખાતાએ આગામી દિવસોમાં તાપમાનનો પારો વધુ ઉંચકાશે તેવી આગાહી કરી છે. બુધવારે અમદાવાદમાં 43.2 ડિગ્રી તાપમાન નોંધાયું હતું જ્યારે રાજ્યનું કેપિટલ ગાંધીનગરમાં 44 ડિગ્રી તાપમાન નોંધાયું હતું. IMD ખાતે વૈજ્ઞાનિક મનોરમા મોહંતીએ કહ્યું કે, “45.3 ડિગ્રી તાપમાન સાથે ચાલુ સિઝનમાં કંડલા સૌથી ગરમ શહેર નોંધાયું છે. આગામી દિવસોમાં અમદાવાદમાં 43 સેલ્સિયસ ડિગ્રી તાપમાન રહેશે. સમગ્ર ઉત્તર ગુજરાતનું તાપમાન 41થી 43 ડિગ્રીની આસપાસ રહેશે.” વધુમાં મોહંતીએ કહ્યું કે આગામી 2-3 દિવસમાં સૌરાષ્ટ્ર-કચ્છ અને દક્ષિણ ગુજરાતમાં મહત્તમ તાપમાન 41થી 43 ડિગ્રી જેવું નોંધાશે. ગાંધીનગરના બિઝનેસમેન શૈલેષ રાઠોડે કહ્યું કે છેલ્લા થોડા વર્ષોથી ગાંધીનગરમાં અસહ્ય ગરમી પડી રહી છે. વિચિત્ર બાબત છે કે અમદાવાદથી પણ ગાંધીનગરનું મહત્તમ તાપમાન વધુ છે. ત્યારે વૃક્ષોનું મહત્વ સમજીને આપણે તે બાબતે ધ્યાન આપવું જોઈએ. ગાંધીનગરના રહેવાસી દર્શન પટેલે કહ્યું કે અસહ્ય ગરમીને કારણે મારા ખોરાકમાં ઘટાડો થયો છે અને સતત તરસ લાગ્યા કરે છે, ગરમીને કારણે મારા શરીરને પણ ભારે નુકસાન થયું છે જેથી અભ્યાસમાં ધ્યાન કેન્દ્રિત કરવું મુશ્કેલ બની રહ્યું છે. બુધવારે અમદાવાદમાં મહત્તમ 43.2 ડિગ્રી અને લઘુત્તમ 27.5 ડિગ્રી તાપમાન નોંધાયું હતું. કોમર્સના વિદ્યાર્થી સૌમિત પટેલે કહ્યું કે “દર બીજા દિવસે હું મિત્રો સાથે બહાર જમવા જતો. પરંતુ ભયંકર તાપને કારણે ઘરની અંદર જ રહેવા માટે મજબૂર થઈ ગયો છું. ઉપરાંત આવી ગરમીમાં બહાર જમવાનું રિસ્ક ન ઉઠાવી શકું.” આગામી દિવસોમાં તાપમાન 43 ડિગ્રી નોંધાશે.