સુરત : લાલભાઇ કોન્ટ્ર્ક્ટર સ્ટેડિયમમાં ત્રિદિવસીય દિવ્યાંગ વ્હિલચેર ક્રિક્રેટ ટુર્નામેન્ટનું આયોજન બી પોઝીટીવ સંસ્થા દ્વારા કરવામાં આવ્યુ છે. પ્રથમ દિવસે નોંધનિય દર્શકો સ્ટેડિયમમાં જોવા મળ્યા હતાં. કોઇપણ રમતપ્રેમી આ મેચ વિનામૂલ્યે જોઈ શકે છે. સોમવારે બપોરે 3 વાગ્યે પ્રથમ મેચ ઉત્તરાખંડ અને મહારાષ્ટ્ર વચ્ચે રમાઇ હતી. જેમાં મહારાષ્ટ્રનો વિજય થયો હતો. તા- 5 અને 6 જુને સવારે 8થી સાંજે પાંચ વાગ્યા સુધી મેચ ચાલશે. ટુર્નામેન્ટના આયોજક પ્રોફેસર ચેતન રાઠોડે જણાવ્યુ કે આ નેશનલ લેવલની ટુર્નામેન્ટમાં ગુજરાત સિવાય મહારાષ્ટ્ર અને ઉત્તરાખંડની ટીમ ભાગ લેશે. ત્રિકોણીય જંગની લીગ મેચ 12-12 ઓવરની રહેશે જ્યારે ફાઇનલ મેચ 20 ઓવરની છેે. ગુજરાતની ટીમનો કેપ્ટન લક્ષ્મણ બિરાડે સુરતનો છે તે ઇન્ટરનેશનલ ઇન્ડિયાની ટીમમાં વાઇસ કેપ્ટન છે. ઓલરાઉન્ડર લક્ષ્મણ બિરાડેએ અત્યાર સુધીમાં નવ ઇન્ટરનેશનલ રમી છે. વ્હિલચેર પર ક્રિક્રેટ રમવી એક પડકાર છે. બેટિંગ, બોલિંગ, ફિલ્ડીંગ, કેચ વગેરેમાં ભારે સંઘર્ષ કરવો પડે છે. આ ત્રિકોણીય મુકાબલામાં તેણે ગુજરાતના જીતનો વિશ્વાસ વ્યક્ત કર્યો હતો. ગુજરાતની ટીમમાં સુરતના છ ખેલાડીઓ પૈકી લક્ષ્મણ બિરાડે, ભુવન ભરવાડ, પરશુરામ, મનોજ સાંસરકર, સચિન, પરેશ અને કોચ અતુલ રામાણીનો સમાવેશ થાય છે. મેચ નોર્મલ જે સીઝન બોલથી રમાય છે એ બોલથી જ રમાશે. ગુજરાતની ટીમ જીતવા માટે હોટ ફેવરીટ છે. ગુજરાતની ટીમમાં સુરતના છ પ્લેયરનો સમાવેશ કરાયો છે. આ બધા ખેલાડીઓ છેલ્લા ઘણા સમયથી સચિન તલંગપુર ખાતે પ્રેકટિસ કરી રહ્યા હતાં. ગુજરાતના ખેલાડીઓ પણ જીત માટે આત્મવિશ્વાસુ અને ઉત્સાહિત છે.
