EPFO નાણાકીય વર્ષ 2024-25 માટે EPF વ્યાજ ટ્રાન્સફર પ્રક્રિયા 99.9% સુધી પૂર્ણ, ચૂકવણી ઝડપથી કરી
EPFO કર્મચારી ભવિષ્ય નિધિ સંગઠન (EPFO) દ્વારા નાણાકીય વર્ષ 2024-25 માટે વ્યાજની ચુકવણી પ્રક્રિયા આ વર્ષે સમયસર પૂર્ણ કરવામાં આવી છે. કેન્દ્રીય શ્રમ મંત્રી મનસુખ માંડવિયાએ જણાવ્યું કે 8 જુલાઈ 2025 સુધીમાં 33.56 કરોડ ખાતાઓમાંથી લગભગ 32.39 કરોડ ખાતાઓમાં 8.25% વ્યાજ દરે રકમ ટ્રાન્સફર કરી દેવામાં આવી છે.
હિસાબ અપડેટની પ્રક્રિયા ઝડપથી પૂર્ણ
આ વર્ષે વિતેલા વર્ષોની સરખામણીમાં વ્યાજ જમા કરવાની પ્રક્રિયા ઝડપથી હાથ ધરવામાં આવી. ગયા વર્ષે વ્યાજ જમા ઓગસ્ટથી શરૂ થઈ ડિસેમ્બરે પૂર્ણ થઈ હતી. પરંતુ 2024-25 માટેના હિસાબમાં જૂન જ મહિનામાંEPFO દ્વારા વ્યવસ્થિત રીતે કામગીરી પૂર્ણ કરવામાં આવી હતી.
EPFO હેઠળ 13.88 લાખ કંપનીઓ આવરી લેવામાં આવે છે. જેમાંથી 13.86 લાખ કંપનીઓના હિસાબોનું અપડેટ થઇ ગયું છે, જે કુલ કંપનીઓના લગભગ 99.9% જેટલા થાય છે. મંત્રી દ્વારા જણાવાયું કે બાકી રહેલા થોડાક હિસાબો પણ આ અઠવાડિયા દરમિયાન પૂરાં થઈ જશે.
2024-25 માટે વ્યાજ દર 8.25 ટકા
કેન્દ્ર સરકારે 22 મે 2025ના રોજ EPF સભ્યો માટે 8.25 ટકા વ્યાજ દરની મંજૂરી આપી હતી. ત્યારબાદ 6 જૂનથી જ EPFOએ વાર્ષિક હિસાબ અપડેટ કરવાની કામગીરી શરૂ કરી હતી.
તમારું ખાતું ચકાસવું કેમ મહત્વપૂર્ણ છે?
EPFOના આ સભ્યો માટે આ મહત્વપૂર્ણ છે કે તેઓ પોતાનું ખાતું UMANG એપ, EPFO પોર્ટલ કે SMS દ્વારા ચકાસે કે તેમના ખાતામાં વ્યાજ જમા થયું છે કે નહિ. ઘણીવાર ટેક્નિકલ કારણોસર થોડા ખાતામાં વિલંબ થઈ શકે છે, તેથી સમયાંતરે ચકાસણી કરવી ઉત્તમ છે.
સૂચન: PF ખાતું ચકાસવા માટે EPFO પોર્ટલ પર યુએન નંબર અને પાસવર્ડથી લોગિન કરી શકો છો અથવા UMANG મોબાઈલ એપ દ્વારા પણ માહિતી મેળવી શકો છો.
