ફિલિપાઇન્સમાં કાલમેગી વાવાઝોડાનો કહેર, 241 લોકોનાં મોત; રાષ્ટ્રપતિએ કટોકટી જાહેર કરી
ફિલિપાઇન્સમાં શક્તિશાળી કાલમેગી વાવાઝોડાએ ભારે વિનાશ વેર્યો છે. અધિકારીઓના જણાવ્યા અનુસાર અત્યાર સુધીમાં 241 લોકોનાં મોત થયાં છે અને ઘણા લોકો ગુમ છે. પરિસ્થિતિને જોતાં ફિલિપાઇન્સના રાષ્ટ્રપતિ ફર્ડિનાન્ડ આર. માર્કોસ જુનિયરે દેશમાં કટોકટી (ઇમરજન્સી)ની ઘોષણા કરી છે.
અધિકારીઓનું કહેવું છે કે વાવાઝોડાને કારણે ઘણા લોકો સુધી હજી પણ મદદ પહોંચી શકી નથી. રેડ ક્રોસને સેંકડો કોલ્સ આવ્યા છે જેમાં લોકો મદદની વિનંતી કરી રહ્યા છે.
ફિલિપાઇન્સની સેનાએ શું કહ્યું?
ફિલિપાઇન્સની સેનાએ જણાવ્યું છે કે મૃતકોમાં એ 6 લોકો પણ સામેલ છે, જેઓ કાલમેગીથી પ્રભાવિત પ્રાંતોને માનવતાવાદી સહાય પહોંચાડવા જઈ રહેલા વાયુસેનાના હેલિકોપ્ટરમાં સવાર હતા. આ હેલિકોપ્ટર મંગળવારે દક્ષિણ અગુસન ડેલ સૂર પ્રાંતમાં દુર્ઘટનાગ્રસ્ત થયું હતું.
દક્ષિણ ચીન સાગર તરફ આગળ વધ્યું વાવાઝોડું
હવામાન નિષ્ણાતોના જણાવ્યા અનુસાર, કાલમેગી વાવાઝોડું દક્ષિણ ચીન સાગર તરફ આગળ વધી ગયું છે. આ દરમિયાન પવનોની ગતિ 130 થી 180 કિલોમીટર પ્રતિ કલાક સુધીની રહી હતી.
નાગરિક સુરક્ષા કાર્યાલયના ઉપ-પ્રશાસક અને પ્રાંતીય અધિકારીઓએ જણાવ્યું કે મોટાભાગના મૃત્યુ મધ્ય પ્રાંત સેબુમાં થયા છે, જ્યાં વાવાઝોડાને કારણે અચાનક પૂર આવ્યું અને નદીઓ છલકાઈ ગઈ. અધિકારીઓના જણાવ્યા અનુસાર, પૂરને કારણે રહેણાંક વિસ્તારો જળમગ્ન થઈ ગયા, જેના કારણે ગભરાયેલા લોકોને ઘરોની છત પર આશ્રય લેવાની ફરજ પડી હતી.
સેબુમાં કુદરતનો કહેર!
વાવાઝોડાથી બચાવવા માટે શક્ય તમામ પ્રયાસો કરવામાં આવ્યા હતા, પરંતુ આ દરમિયાન અચાનક પૂર આવ્યું. સેબુ 24 લાખથી વધુ વસ્તી ધરાવતો પ્રાંત છે.
BREAKING: The Philippines declares a state of emergency after Typhoon Kalmaegi leaves at least 114 dead and hundreds missing in central provinces. https://t.co/mJm1nWYjIm
— The Associated Press (@AP) November 6, 2025
આ શહેર હજી 30 સપ્ટેમ્બરના રોજ આવેલા 6.9 તીવ્રતાના ભૂકંપમાંથી બહાર આવી રહ્યું હતું, જેમાં ઓછામાં ઓછા 79 લોકોનાં મોત થયાં હતાં અને હજારો લોકો વિસ્થાપિત થયા હતા.
લોકોને સુરક્ષિત સ્થાનો સુધી પહોંચાડાયા
ગવર્નર બારિકુઆટ્રોએ જણાવ્યું કે ભૂકંપથી વિસ્થાપિત ઉત્તરી સેબુના હજારો રહેવાસીઓને વાવાઝોડું આવે તે પહેલાં અસ્થાયી તંબુઓથી બનેલા આશ્રય સ્થાનો સુધી લઈ જવામાં આવ્યા હતા. આના કારણે ભૂકંપથી તબાહ થયેલા ઉત્તરીય કસ્બાઓમાં કાલમેગીને કારણે આવેલા પૂરની અસર ઓછી થઈ છે.
