Girnar Reel Case: ગિરનાર પર રીલ બનાવવાનો શોખ પડ્યો મોંઘો
Girnar Reel Case: જૂનાગઢના ગિરનાર પર્વત (Girnar Hills) પર જીવન જોખમમાં મૂકી રીલ બનાવવાની લાલચ હવે પાંચ યુવાનોને ભારે પડી છે. સુરક્ષા સાધન વગર, પરવાનગી વગર અને જોખમી ખડકો પર ચઢીને વીડિયો બનાવનાર આ યુવાનો સામે વન વિભાગે કડક પગલાં લીધા છે.
આ પાંચેય યુવાનોમાંથી ચાર રાજકોટના અને એક મહુવાનો હોવાનું સામે આવ્યું છે. બે દિવસ પહેલાં આ યુવાનોનો વીડિયો સોશિયલ મીડિયામાં વાયરલ થયો હતો, જેમાં તેઓ ગિરનારના ઊંચા પહાડ પર ચઢાણ કરી “એડવેન્ચર રીલ” બનાવી રહ્યા હતા.
Wildlife Protection Act હેઠળ કાર્યવાહી
સોશિયલ મીડિયા પર વીડિયો વાયરલ થયા બાદ વન વિભાગે (Forest Department) તરત જ તપાસ હાથ ધરી હતી. ગણતરીના કલાકોમાં જ યુવાનોની ઓળખ કરી કાર્યવાહી શરૂ કરવામાં આવી. અધિકારીઓએ જણાવ્યું કે, “આ રીલ ગિરનારના અભયારણ્ય ક્ષેત્રમાં બનાવવામાં આવી હતી, જ્યાં વન્યજીવોના વાસસ્થાનમાં દખલ કરવી કાયદેસર ગુનો છે.”
આ ઘટનાને પગલે Wildlife Protection Act-1972ની કલમ 27, 29 અને 35 ઉપરાંત Gujarat Forest Act હેઠળ ગુનો નોંધાયો છે. તમામ યુવાનોને નોટિસ પાઠવીને પૂછપરછ માટે બોલાવવામાં આવ્યા હતા.
સ્થળ ઉપર જ ફટકારાયો દંડ
તપાસ દરમિયાન યુવાનોને સમજાવતાં અધિકારીઓએ કહ્યું કે તેઓએ પોતાનો જીવ જોખમમાં મૂકી રીલ બનાવી અને અન્ય યુવાનોને પણ ખતરનાક ઉદાહરણ આપ્યું.
તેમણે લેખિત માફીપત્ર આપ્યું અને આવું ફરીથી ન કરવાનું વચન આપ્યું.
વન વિભાગે તમામ સામે દસ હજાર રૂપિયાનો સામૂહિક દંડ ફટકાર્યો અને ઘટનાને ગંભીર ચેતવણી રૂપે ગણાવી.
ગિરનાર: એશિયાટિક સિંહનું નેચરલ હેબિટેટ
ગિરનાર અભયારણ્ય એ એશિયાટિક સિંહ (Asiatic Lion)નું કુદરતી નિવાસસ્થાન છે. અહીંનો “કોર ઝોન” અત્યંત સંવેદનશીલ છે અને આ વિસ્તારમાં પ્રવેશ માટે વન વિભાગની પરવાનગી ફરજિયાત છે.
વિભાગના અધિકારીઓએ સ્પષ્ટ ચેતવણી આપી —
“રીલ બનાવવા માટે જીવ જોખમમાં ન મૂકો. વન્યજીવોના વિસ્તારનો ભંગ કરશો તો કાયદો ચોક્કસ પગલું લેશે.”
સોશિયલ મીડિયાનું જોખમી આકર્ષણ
આ ઘટના ફરી એકવાર એ પ્રશ્ન ઉઠાવે છે કે સોશિયલ મીડિયા ફેમ માટે લોકો ક્યાં સુધી જોખમ ઉઠાવે છે?
રીલની લાલચમાં યુવાનો માત્ર પોતાનો જ જીવ જોખમમાં નથી મુકતા, પરંતુ કુદરત અને વન્યજીવોને પણ અસ્થિર કરે છે.
વિભાગે સૌને સંદેશ આપ્યો છે કે પ્રકૃતિની સુરક્ષા કરતાં મોટું કોઈ “કન્ટેન્ટ” નથી.
