Wayanad landslide : કેરળના વાયનાડમાં ભૂસ્ખલનથી ભારે તબાહી સર્જાઈ છે. ભૂસ્ખલનથી સર્જાતી કુદરતી આપત્તિનો સામનો કરવા માટે કેન્દ્ર સરકારે આર્મીના જવાનો, NDRF, SDRF, આર્મ્ડ પોલીસ ફોર્સ અને એરફોર્સને રાહત અને બચાવ કામગીરી માટે તૈનાત કર્યા છે.
કેન્દ્રીય સંરક્ષણ પ્રધાન રાજનાથ સિંહે વાયનાડમાં બચાવ કામગીરી અંગે ભારતીય સેના પ્રમુખ સાથે ફોન પર વાત કરી હતી. તેમને ભૂસ્ખલન પ્રભાવિત વાયનાડમાં મદદ અને બચાવ માટે સેના તૈનાત કરવા માટે કહેવામાં આવ્યું છે. વાયનાડમાં સેનાની ટીમ ઘટનાસ્થળે પહોંચી ગઈ છે.
અહેવાલો અનુસાર, ભૂસ્ખલનના કારણે અત્યાર સુધીમાં63 થી વધુ લોકોના મોત થયા છે. જેપી નડ્ડાએ રાજ્યસભામાં ભૂસ્ખલનને મોટી દુર્ઘટના ગણાવી છે. તેમણે કહ્યું કે આ દુર્ઘટના માત્ર કેરળની નથી, પરંતુ સમગ્ર દેશ તેનાથી દુખી છે. કેરળમાં રાહત કાર્ય માટે જે પણ કામ જરૂરી છે તે કેન્દ્ર સરકાર કરી રહી છે.
જેપી નડ્ડાએ કહ્યું કે સરકાર વતી હું આ ખાતરી આપું છું કે કેરળમાં રાહત અને બચાવ કાર્ય માટે જે પણ જરૂરી હશે તે કરવામાં આવશે. વડાપ્રધાને કેરળના મુખ્યમંત્રી સાથે વાત કરી છે. તેમણે મુખ્યમંત્રીને મદદની ખાતરી આપી છે. રાજ્ય સરકાર સાથે સંકલનમાં રહીને કામગીરી કરવામાં આવી રહી છે. પહેલું કામ દફનાવવામાં આવેલા મૃતદેહોને કાઢવાનું છે. આ સંકટના સમયમાં આપણે બધા સાથે છીએ.
તેમણે કહ્યું કે પીએમ મોદીના નેતૃત્વમાં આ સરકાર સક્રિય અને પ્રો-રિસ્પોન્સિવ છે. જો કોઈ સૂચન આવે કે અમે અમારા કાર્યમાં સમાવી શકીએ, તો અમે આવા સૂચનોને પણ આવકારીએ છીએ.
રાજ્યસભામાં જ કેન્દ્રીય મંત્રી જી કિશન રેડ્ડીએ કહ્યું કે કેરળના આપત્તિગ્રસ્ત વિસ્તારોમાં રાહત અને બચાવ કામગીરી માટે સશસ્ત્ર દળો મોકલવામાં આવ્યા છે. પીએમ મોદીના આદેશ પર નેશનલ લેન્ડસ્લાઈડ ફોરકાસ્ટિંગ ઈન્સ્ટિટ્યૂટની રચના ગયા અઠવાડિયે જ કરવામાં આવી છે.
