જૈશ-એ-મોહમ્મદની ‘મેડમ સર્જન’ પર મોટો ખુલાસો, ‘ઓપરેશન હમદર્દ’ અને ‘ટીમ ડી’ તપાસના ઘેરામાં
ગુપ્તચર એજન્સીઓએ જૈશ-એ-મોહમ્મદ (JeM)ની ટોપ કમાન્ડર ડૉ. શાહીન ઉર્ફે ‘મેડમ સર્જન’ સાથે જોડાયેલો મોટો ખુલાસો કર્યો છે. તે ‘ઓપરેશન હમદર્દ’ હેઠળ છોકરીઓનું બ્રેઈનવોશિંગ કરીને તેમની ભરતી કરી રહી હતી. યુપી એટીએસએ તેની ‘ટીમ ડી’ને ડીકોડ કરી છે. બેંક ખાતાઓ અને ફંડિંગની તપાસ ચાલુ છે.
ગુપ્તચર એજન્સીઓએ જૈશ-એ-મોહમ્મદ (JeM)ની ટોપ કમાન્ડર ડૉ. શાહીન વિશે મહત્વપૂર્ણ માહિતી જાહેર કરી છે. સૂત્રોના જણાવ્યા અનુસાર, ડૉ. શાહીનને સંગઠનમાં ‘મેડમ સર્જન’નો કોડનેમ આપવામાં આવ્યો હતો. તેના નજીકના સાથીઓ અને જૈશના અન્ય આતંકવાદીઓ તેને આ જ નામથી બોલાવતા હતા. શાહીન યુવતીઓનું બ્રેઈન વોશ કરીને સંગઠનમાં તેમની ભરતીના કામમાં વ્યસ્ત હતી. રિપોર્ટ્સ મુજબ, શાહીન છોકરીઓને જુદી-જુદી શ્રેણીઓમાં વહેંચીને તેમને આતંકવાદ તરફ વાળવાનું કામ કરતી હતી.
જૈશનું ‘ઓપરેશન હમદર્દ’ શું હતું?
જૈશ-એ-મોહમ્મદે ‘ઓપરેશન હમદર્દ’ નામનું વિશેષ અભિયાન ચલાવ્યું હતું. આમાં યુવાન મુસ્લિમ છોકરીઓ અને મહિલાઓ પ્રત્યે સહાનુભૂતિ (હમદર્દી) દર્શાવીને તેમને આતંકવાદ તરફ લઈ જવાની યોજના હતી. આ ઓપરેશનને ત્રણ ભાગોમાં વહેંચવામાં આવ્યું હતું:
- પ્રથમ કેટેગરી: આર્થિક રીતે નબળી મુસ્લિમ છોકરીઓ અને મહિલાઓ. તેમને પૈસાની લાલચ આપીને આતંકવાદના માર્ગે લાવવાનું ષડયંત્ર હતું.
- બીજી કેટેગરી: જે છોકરીઓ અને મહિલાઓ સામાન્ય રીતે બુરખો પહેરતી નથી અને જેમની મહત્વાકાંક્ષાઓ (ખ્વાહિશો) ખૂબ મોટી હોય છે. તેમને વિદેશ લઈ જવા, મોટા-મોટા સપના બતાવવા અને વૈભવી જીવનનું વચન આપવાનો પ્લાન હતો.
- ત્રીજી કેટેગરી: વિચારોથી કટ્ટરપંથી છોકરીઓ અને મહિલાઓ, જેઓ સરળતાથી જિહાદના માર્ગે આવી જાય.
‘મેડમ સર્જન’ આ જ ઓપરેશનને અંજામ આપવામાં લાગેલી હતી.
‘ટીમ ડી’ પર યુપી એટીએસની નજર
ઉત્તર પ્રદેશ એટીએસએ શાહીનની ‘ટીમ ડી’ને ડીકોડ કરી છે. ટીમ ડીમાં શાહીનના ડૉક્ટર સાથીઓ સામેલ હતા. જૈશને મોકલેલા સંદેશાઓ અને ચેટબોક્સમાં ‘ટીમ ડી’નો ઉલ્લેખ મળ્યો છે. આતંકવાદીઓ વચ્ચે વાતચીત માટે કોડવર્ડ્સનો ઉપયોગ થતો હતો:
- આતંકવાદીને ‘સ્પેશિયાલિસ્ટ’ કહેવાતો હતો.
- ચેટબોક્સમાં ‘હાર્ટ સ્પેશિયાલિસ્ટ’, ‘આઇ સ્પેશિયાલિસ્ટ’, ‘ફિઝિશિયન’ જેવા શબ્દોનો પ્રયોગ થતો હતો.
- પૈસાની વ્યવસ્થા કરવા માટે ‘ઓપરેશનની તૈયારી’ શબ્દ.
- નાના હથિયારો માટે ‘મેડિસિન સ્ટોક’.
- રેકી (જાસૂસી) વાળી જગ્યા માટે ‘ઓપરેશન થિયેટર’.
ટીમ ડીના તમામ સભ્યોને અલગ-અલગ કામ સોંપવામાં આવ્યા હતા. આ ટીમ જૈશના ટોચના કમાન્ડરના સીધા સંપર્કમાં હતી.
બેંક એકાઉન્ટ્સની તપાસ શરૂ
એજન્સીઓ ડૉ. પરવેઝ અને ડૉ. આરિફની બેંક એકાઉન્ટ ડિટેલ્સ ચકાસી રહી છે. ડૉ. આરિફને બુધવારે (12 નવેમ્બર) કાનપુરથી કસ્ટડીમાં લેવામાં આવ્યા હતા. સહારનપુરમાં પણ અનેક શંકાસ્પદ લોકોના એકાઉન્ટ્સની તપાસ થઈ રહી છે. પ્રાથમિક તપાસમાં જાણવા મળ્યું છે કે આ ગ્રૂપે ભરતી અને તાલીમ માટે ફંડ મેળવવા માટે ઘણા એકાઉન્ટ્સ રાખ્યા હતા. વિદેશી ફંડ ટ્રાન્સફર અને શંકાસ્પદ જમા રકમ પર ધ્યાન કેન્દ્રિત કરવામાં આવ્યું છે. એજન્સીઓ માની રહી છે કે જૈશની લીડરશિપે ડૉ. શાહીન અને ટીમ ડીને યુપીના અમુક વિસ્તારોમાં આ ઓપરેશન ચલાવવા માટે સીધો આદેશ આપ્યો હતો. એન્ક્રિપ્ટેડ કમ્યુનિકેશન અને કોડ લેંગ્વેજને તોડવું એ તાજેતરના મહિનાઓની સૌથી મોટી ગુપ્તચર સફળતા માનવામાં આવી રહી છે. આવનારા દિવસોમાં વધુ ધરપકડો અને ખુલાસા થવાની આશા છે.
ડૉક્ટર ઉમરની કારમાં થયો હતો બ્લાસ્ટ
દિલ્હી પોલીસે લાલ કિલ્લા બ્લાસ્ટ કેસ, જેમાં 12 લોકોના મોત થયા હતા, તેના મુખ્ય આરોપી ડૉ. ઉમરની હિલચાલને લગભગ 50 લોકેશન્સના CCTV ફૂટેજથી ટ્રેસ કરી છે. 10 નવેમ્બરના રોજ ડૉ. ઉમર ફરીદાબાદથી દિલ્હી આવ્યા હતા. બદ્રપુર બોર્ડરથી પ્રવેશ કર્યા પછી સાઉથ-ઈસ્ટ ડિસ્ટ્રિક્ટ, પછી ઈસ્ટ ડિસ્ટ્રિક્ટ, સેન્ટ્રલ ડિસ્ટ્રિક્ટની રિંગ રોડ, નોર્થ ડિસ્ટ્રિક્ટ, નોર્થ-વેસ્ટ ડિસ્ટ્રિક્ટના અશોક વિહાર (જ્યાં જમ્યા), પછી સેન્ટ્રલ ડિસ્ટ્રિક્ટમાં મસ્જિદની મુલાકાત લીધી, અને છેલ્લે નોર્થ ડિસ્ટ્રિક્ટના લાલ કિલ્લા પાર્કિંગ એરિયા પહોંચ્યા. લગભગ 3 કલાક પછી તે પાર્કિંગમાંથી બહાર નીકળ્યા અને કારમાં ધમાકો થઈ ગયો.
