સોશિયલ માધ્યમોમાં જાહેરાતો મૂકી આધાર પુરાવા મેળવતી ટોળકીનો પર્દાફાશ
સુરતના ડુમ્મસ રોડ વિસ્તારમાં આવેલી સ્વસ્તિક યુનિવર્સિટી બિલ્ડિંગમાં ગ્લોબલીંક ટેક સર્વિસ નામે ચાલતી ઓફિસ પર સાયબર ક્રાઇમ વિભાગે છાપો મારી મહત્વપૂર્ણ ગેરરીતિઓનો પર્દાફાશ કર્યો છે. આ ઓફિસ પરથી લોકોને પર્સનલ લોન આપવાની જાહેરાતો કરવામાં આવતી અને તેમાં વિશ્વાસ મૂકી સંપર્ક કરનારાઓ પાસેથી આધાર સહિતના પુરાવા મેળવવામાં આવતા હતા. ત્યારબાદ તેમની જાણ વગર તેમના ખાતામાંથી રકમ ઉપાડી લેવામાં આવી રહી હતી, જેને કારણે અનેક લોકો આ છેતરપિંડીના ભોગ બનેલા હોવાનું સામે આવ્યું છે.
મુખ્ય સૂત્રધાર સહિત બે લોકો પોલીસના જાળામાં
સાયબર ક્રાઇમ ટીમને મળેલા ઇમેઇલના આધારે પોલીસે તપાસ શરૂ કરી હતી. તપાસમાં ખુલ્યું કે સંચાલક નિતેશ વિજય ખવાણી દ્વારા આ સમગ્ર ગેરકાયદેસર પ્રવૃત્તિ ચલાવવામાં આવી રહી હતી. સોશિયલ માધ્યમોમાં પર્સનલ લોન માટે આકર્ષક જાહેરાતો મૂકી ગ્રાહકોને પ્રલોભીત કરવામાં આવતા હતા. જે ગ્રાહકો લોન માટે સંપર્ક કરતા, તેમના તમામ દસ્તાવેજો મેળવ્યા બાદ ગેરરીતે ACH મેન્ડેટ તૈયાર કરવામાં આવતું અને ત્યારબાદ તેમની જાણ વિના રકમ કપાઈ જતી હતી. પોલીસે મુખ્ય સૂત્રધાર સાથે એક અન્ય વ્યક્તિને ઝડપી કાર્યવાહી હેઠળ ધરપકડ કરી લીધી છે.
ખાતામાંથી ગુપ્ત રીતે રકમ ઉપાડીને કરોડોની છેતરપિંડીની શંકા
પોલીસ મુજબ ACH મેન્ડેટનો ઉપયોગ કરીને ગ્રાહકોના ખાતામાંથી 13,500થી 25,000 રૂપિયાની રકમ ઉપાડવામાં આવતી હતી. વધુ તપાસ દરમિયાન નિતેશની બીજી ઓફિસ પાલનપુર ગામની રોયલ ટાઇનિટિયમ બિલ્ડિંગમાં મળતાં, ત્યાં પણ જોબ આપવાના નામે છેતરપિંડી કરવામાં આવી રહી હતી. બંને જગ્યાઓ પરથી કુલ બે લેપટોપ, છ મોબાઇલ અને વિવિધ દસ્તાવેજો મળી કુલ 1.30 લાખની મત્તા કબજે કરવામાં આવી છે. પોલીસ હવે બંને ઓફિસોના ડેટાનું વિશ્લેષણ કરીને આ કૌભાંડમાં સંભવિત અન્ય લોકોની ભૂમિકા શોધી રહી છે.
