સુરતમાં નોકરી અપાવવાના બહાને મોટી છેતરપિંડી
સુરત શહેરમાં પોસ્ટ વિભાગમાં નોકરી અપાવવાની લાલચ આપીને મોટા પાયે ઠગાઈ કરવામાં આવી છે. નકલી વેબસાઇટ બનાવી નોકરી મેળવવાની આશા રાખતા લોકો પાસેથી લાખો રૂપિયાનું કબજાવ્યું હોવાનું બહાર આવ્યું છે. અઠવા પોલીસે આ મામલે ગંભીર તપાસ હાથ ધરી અને બે શખ્સોની ધરપકડ કરી છે. આ કિસ્સો નોકરીની શોધમાં રહેલા યુવાનોને ફરી સાવધાન રહેવાની ચેતવણી આપે છે.
નકલી પોર્ટલ બનાવી 20થી વધુ નોકરીવાંચ્છુકો સાથે ઠગાઈ
પોસ્ટ વિભાગ જેવી દેખાતી નકલી વેબસાઇટ બનાવી આરોપીઓએ ગુજરાતના અનેક જિલ્લાઓના નોકરીવાંચ્છુકોને જાળમાં ફસાવ્યા હતા. સર્ચ એન્જિનમાં દેખાતા સાચા ફોર્મનો ઉપયોગ કરી લોકોને વિશ્વાસમાં લેવામાં આવ્યા હતા. ત્યારબાદ તે જ ડિઝાઇન પર નકલી પોર્ટલ બનાવી પરીક્ષાઓ લઇ, ફેક કોલ લેટર આપીને તેઓ નોકરી મળવાની ખાતરી અપાવતા હતા. આ રીતે આશરે 20થી વધુ યુવાનો પાસેથી 16.90 લાખ રૂપિયા પડાવવામાં આવ્યા હતા.
કમ્પ્યુટર જ્ઞાનનો દુરુપયોગ કરી રચ્યો છેતરપિંડીનો ખેલ
આ કેસમાં પકડાયેલા બ્રિજ ઉર્ફે બ્રિજેશ પટેલે અમદાવાદની કોલેજમાંથી કોમ્પ્યુટર એન્જિનિયરિંગ કર્યું છે અને તેને એથિકલ હેકિંગ તથા સોફ્ટવેર ડેવલપમેન્ટનું વિશાળ જ્ઞાન છે. આ જ જાણકારીનો ખોટો ઉપયોગ કરીને તેણે નકલી વેબસાઇટ તૈયાર કરી હતી. તાજેતરની તપાસમાં ખુલ્યું છે કે નવસારી જિલ્લાના એક સહકારી મંડળનું એસએમએસ હેડર પણ આરોપીઓએ ગેરકાયદે રીતે મેળવી લીધો હતો, જેના આધારે GUJ-POST નામે ખોટા મેસેજ પાઠવતા હતા.
નવસારી, સુરત, થરાદ, માંડવી સહિતનાં વિસ્તારોમાંથી મળેલા નોકરી ઇચ્છુકોને ફોર્મ ભરાવી નકલી પરીક્ષાઓ લેવાઈ હતી. ખોટા કોલ લેટર અને ઇન્ટરવ્યુ મેસેજો મોકલીને વિશ્વાસમાં લેવામાં આવ્યા હતા. બાદમાં વિવિધ બહાનાઓ હેઠળ પૈસા ટ્રાન્સફર કરવાની માંગ કરવામાં આવતી હતી. ફરિયાદોના આધારે અઠવા પોલીસે ગુનો નોંધ્યો હતો અને તપાસ કરતાં મુખ્ય આરોપી બ્રિજેશ પટેલ અને ભુપેન્દ્ર શર્માને ઝડપી લીધા છે.
પોલીસની કાર્યવાહી અને તપાસ આગળ વધતી
અઠવા પોલીસ આરોપીઓની પૂછપરછ આગળ વધારી રહી છે અને નકલી વેબસાઇટ, ફેક પરીક્ષા પદ્ધતિ તથા મેસેજિંગ સિસ્ટમને લઈને વધુ પુરાવા એકત્ર કરી રહી છે. પોલીસનું કહેવું છે કે સરકારી નોકરીના નામે કોઈ જાણીતો વ્યક્તિ ઓનલાઈન પૈસા માગે તો તે મોટાભાગે છેતરપિંડી હોય છે. આવા કેસોમાં તરત જ પોલીસને જાણ કરવી જોઈએ જેથી અન્ય યુવાનો આ જાળમાં ફસાઈ ન જાય.
