ગ્રામ પંચાયોની સંવેદનશીલતાનું આકલન કરીને બંદોબસ્ત ગોઠવવામાં આવશે.

ડિસેમ્બર મહિનાના છેલ્લા સપ્તાહમાં વડોદરા જિલ્લાની વિવિધ ગ્રામ પંચાયતોની ચૂંટણીઓ અને મતદાન યોજાવાનું છે. મતદાન અને મત ગણતરી શાંતિમય વાતાવરણમાં પૂરી થાય એ બાબતને પ્રશાસન અગ્રતા આપી રહ્યુ છે. તેના અનુસંધાને જિલ્લા કલેકટરે અને જિલ્લા ચૂંટણી અધિકારીશ્રી લોચન સેહરાએ શનિવારે જિલ્લા સંકલન સમિતિની બેઠકમાં ઉપસ્થિત પ્રાંત અધિકારીઓ અને મામલતદારોને સંબંધિત વિભાગીય પોલીસ અધિકારીઓ અને પોલીસ અમલદારો સાથે પરામર્શ કરીને પ્રત્યેક ગ્રામ પંચાયની સંવેદનશીલતાનું આકલન કરવા અને તે પ્રમાણે બંદોબસ્ત ગોઠવવાની સૂચના આપી હતી. તેમણે જણાવ્યુ હતું કે, પંચાયત ચૂંટણીઓમાં ૯૦ ટકા જેટલુ ભારે મતદાન થતુ હોય છે અને ઉમેદવારો ગામના જ હોય છે એટલે લોકસભા/ધારાસભા કરતા સંવેદનશીલતાના બદલાતા આયામો ધ્યાનમાં રાખવા જરૂરી છે.