રેસ્ટોરન્ટ ‘વનશ્રી’થી દર મહિને 40-50 હજાર કમાણી
સુરત જિલ્લાના માંડવી તાલુકાના આદિવાસી વિસ્તારમાં મહિલાઓ હવે સ્વાવલંબન તરફ આગળ વધી રહી છે. બલેઠી ગામની સંગીતાબેન ચૌધરી એની જીવંત સાબિતી છે, જે એક સમયે માત્ર ગૃહિણિ તરીકે ઓળખાતી હતી. ઘર, બાળકો અને દૈનિક જવાબદારીઓ વચ્ચે જીવન વીતતું, પરંતુ વિચાર અને હિમ્મત બદલાઈ ત્યારે માર્ગ ખુદ બનાવાયો. આજે તેઓ વિસડાલીયા ખાતે ઉભેલા દેશના પ્રથમ ટ્રેડમાર્કવાળા રૂરલ મોલમાં પોતાની રેસ્ટોરન્ટ ‘વનશ્રી’ ચલાવે છે અને પોતાની ઓળખ મજબૂત બનાવી છે.
વન વિભાગના પ્રોત્સાહનથી મળી ઉડાન, રેસ્ટોરન્ટે આપી નવી ઓળખ
કારકિર્દીની શરૂઆત સંગીતાબેને રૂરલ મોલમાં ચા-નાસ્તો પીરસવાના નાનકડા કાર્યથી કરી હતી. સમય જતાં વન વિભાગ તરફથી માર્ગદર્શન મળ્યું અને આત્મવિશ્વાસ વધ્યો, જેના કારણે પોતાની રેસ્ટોરન્ટ શરૂ કરવાની તક મળી. આજે ‘વનશ્રી’માં બાજરી, નાગલી અને ચોખાના તાજા રોટલા સાથે ઘરેલું ગુજરાતી અને પંજાબી જમણનો સ્વાદ શહેર-ગામથી આવતા લોકો માણે છે. લગ્ન પ્રસંગો અને સરકારી કાર્યક્રમોમાંથી મોટા ઓર્ડર મળી રહ્યા છે, જેના કારણે આવક સતત વધી રહી છે.
મહિને 40-50 હજાર કમાણી, 7થી વધુ બહેનોને પણ કાર્યનો આધાર
આજે સંગીતાબેન માત્ર કમાણી જ નથી કરતા, પરંતુ આસપાસની 7થી વધુ મહિલાઓને રોજગાર આપી તેમની જીવનયાત્રા બદલી રહી છે. મહિને 40 થી 50 હજાર રૂપિયા જેટલી આવકથી ઘરે સમૃદ્ધિ આવી છે અને આત્મવિશ્વાસ પણ વધી ગયો છે. સંગીતાબેન કહે છે કે, પહેલા મારી કોઈ ઓળખ ન હતી, પરંતુ આજે મોલ, ગ્રાહકો અને સમાજમાં મને આગવી ઓળખ છે. આ બધું સરકારના સહયોગ અને પોતાની મહેનતથી શક્ય બન્યું છે.
વિસડાલીયા રૂરલ મોલ આદિવાસી વિકાસની નવી દિશા
વિસડાલીયા રૂરલ મોલ માત્ર વેપારીઓ માટે નહીં, પરંતુ આશરે 34થી વધુ આદિવાસી ગામોના પરિવાર માટે જીવનનો આધાર છે. અહીં મસાલા ઉત્પાદન, પાપડ-વડી બનાવટ, હસ્તકળા, બેકરી, આયુર્વેદિક વસ્તુઓ અને મશરૂમ વેચાણ જેવી પ્રવૃત્તિઓ ચાલે છે, જેમાં મોટો ફાળો મહિલાઓનો છે. લગભગ 300થી વધુ કારીગરો આ મોલ સાથે જોડાયેલા છે, જેના કારણે ગ્રામીણ અર્થતંત્રમાં નવો વેગ જોવા મળે છે. સંગીતાબેન જેવી ઉદ્યમી મહિલાઓ ગામમાં પ્રેરણાનું કેન્દ્ર બની રહી છે.
આત્મનિર્ભરતા તરફના પગલા–આદિવાસી મહિલાઓ માટે નવી આશા
આ કહાની સ્પષ્ટ કરે છે કે યોગ્ય માર્ગદર્શન અને વિશ્વાસ મળે તો ગ્રામ્ય મહિલાઓ પણ ઉદ્યોગસાહસિકતા તરફ આગળ વધી શકે. વિસડાલીયા રૂરલ મોલે આદિવાસી સમાજમાં આત્મનિર્ભર જીવનશૈલીનો પ્રકાશ પ્રગટાવ્યો છે. સંગીતાબેનની સફળતા માત્ર એક મહિલાની જીત નથી, પણ સમગ્ર વિસ્તારની પ્રગતિનું ચિહ્ન છે. હવે વધુ મહિલાઓ પણ તેમના માર્ગ પર ચાલવા માટે પ્રેરાઈ રહી છે.
