સુરતમાં ગ્રીન નેટ વગરની 145 બાંધકામ સાઇટ પર મનપાની કડક કાર્યવાહી
શિયાળાની શરૂઆત સાથે જ દેશભરમાં વાયુ પ્રદૂષણનું સ્તર વધી રહ્યું છે અને ગુજરાત પણ તેની અસરથી બચી શક્યું નથી. ખાસ કરીને સુરતમાં હવામાં ધૂળકણો વધતા મનપા હરકતમાં આવ્યું છે. તાજેતરમાં શહેરમાં ચાલી રહેલી અનેક બાંધકામ સાઈટોની તપાસ હાથ ધરતા જણાયું કે મોટાભાગની સાઈટોએ ગ્રીન નેટ ના લગાવતા ધૂળ-રેતી ઉડી રહી હતી. આ બેદરકારીને કારણે હવાની ગુણવત્તા ખરાબ થઈ રહી હોવાથી મનપાએ તરત જ કાર્યવાહી શરૂ કરી છે.
ગ્રીન નેટ વગરની 145 સાઈટ પર 44 લાખથી વધુનો દંડ
સુરત શહેરી વિકાસ વિભાગની વિવિધ ટીમોએ શહેરભરમાં તપાસ કરી હતી. તપાસ દરમિયાન 145 સાઈટમાં નિયમોનું ઉલ્લંઘન થયાનું સામે આવ્યું. ગ્રીન નેટનો અભાવ, બેરિકેટિંગ ન કરવું અને સાઈટ પરની સુરક્ષા વ્યવસ્થાની કમી જેવા મુદ્દાઓ ગંભીર માનવામાં આવ્યા. આ તમામ પરિસ્થિતિને ધ્યાનમાં લઈ મનપાએ કુલ રૂ. 44 લાખ 27 હજારનો દંડ ફટકાર્યો છે. સાથે જ તાત્કાલિક નિયમોનું પાલન કરવા સંબંધિત નોટિસ પણ આપવામાં આવી છે.
કયા ઝોનમાં કેટલી સજા થઈ?
સરથાણા ઝોનમાં સૌથી વધુ 26 સાઈટ પર કાર્યવાહી થઈ અને રૂ. 8.45 લાખનો દંડ લેવામાં આવ્યો. વરાછા અને અઠવા ઝોનમાં 22-22 સાઈટ દંડિત થઈને કુલ રૂ. 8.65 લાખની વસૂલાત થઈ. લિંબાયત ઝોનમાં 14 સાઈટને 6.45 લાખનો દંડ કરાયો. ઉધના ઝોનમાં મળીને 30 જેટલી સાઈટને 7 લાખનો દંડ ફટકારવામાં આવ્યો. કતારગામના 13 બાંધકામોએ 2.80 લાખની પેનલ્ટી ભરવાની રહી, જ્યારે સેન્ટ્રલ ઝોનની 7 સાઈટને રૂ. 13 લાખનો સૌથી વધારે દંડ ફટકારાયો. રાંદેર ઝોનની 14 સાઈટને 3.50 લાખનો દંડ કરવામાં આવ્યો.
બિલ્ડર્સને કડક પાલનની ચેતવણી: ડેપ્યુટી કમિશનરનું નિવેદન
સુરત મનપાના ડેપ્યુટી કમિશનર મનીષ ડોક્ટરે જણાવ્યું કે, ક્લીન એર એક્શન પ્લાન હેઠળ શહેરમાં ગ્રીન કન્સ્ટ્રક્શનની પ્રેક્ટિસને પ્રોત્સાહન આપવામાં આવે છે. બાંધકામ સાઈટ પર ગ્રીન નેટ લગાવવું, મટીરિયલ લઈ જતી વાહન તાળપત્રીથી ઢાંકી રાખવી, ખોદકામને બેરિકેટિંગ કરવું અને એન્ટ્રી-એક્ઝિટ પોઈન્ટ પર સફાઈ જાળવવા જેવા નિયમો બિલ્ડર્સને સતત જણાવવામાં આવે છે. તેઓએ સ્પષ્ટ કર્યું કે ઉદ્દેશ્ય દંડ વસૂલવો નહીં પરંતુ બિલ્ડર્સને ગંભીર બનાવી નિયમોનું કડક પાલન કરાવવાનું છે, જેથી શિયાળામાં વાયુ પ્રદૂષણ કાબૂમાં રાખી શકાય.
