Myanmar Earthquake Reason: મ્યાનમારમાં ભૂકંપનું રહસ્ય, વારંવાર વિનાશનું કારણ સાગાઈંગ ફોલ્ટ
Myanmar Earthquake Reason: શુક્રવારે મ્યાનમાર અને થાઈલેન્ડમાં ભૂકંપના તીવ્ર આંચકા અનુભવાયા. બપોરે 12:50 વાગ્યે 7.7 તીવ્રતાનો પહેલો ભૂકંપ આવ્યો, અને 12 મિનિટ પછી 6.4 તીવ્રતાનો બીજો. મ્યાનમારમાં સતત આંચકા અનુભવી રહ્યાં છે, જે લોકોમાં ભયનું વાતાવરણ સર્જી રહ્યા છે. રાત્રે 11:56 વાગ્યે 4.2 તીવ્રતાનો વધુ એક ભૂકંપ આવ્યો.
ભૂકંપનું કેન્દ્ર અને અસર
ભૂકંપનું કેન્દ્રબિંદુ મ્યાનમારના મધ્ય ભાગમાં, માંડલે શહેરથી 17.2 કિમી દૂર હતું. પડોશી દેશ થાઈલેન્ડ પણ પ્રભાવિત થયો, જ્યાં બેંગકોકમાં એક નિર્માણાધીન ઈમારત ધરાશાયી થતા 9 લોકોના મોત થયા. ભૂકંપના આંચકા ઉત્તર-પૂર્વ ભારત સુધી અનુભવાયા, પરંતુ ત્યાં કોઈ મોટું નુકસાન નોંધાયું નથી.
મ્યાનમારમાં ભૂકંપ શા માટે વારંવાર આવે છે?
મ્યાનમાર ભૂકંપની દ્રષ્ટિએ સંવેદનશીલ પ્રદેશ છે. USGS અનુસાર, 10 કિમી ઊંડાઈવાળો આ ભૂકંપ છીછરો હતો અને છેલ્લાં બે વર્ષમાં વિશ્વનો સૌથી શક્તિશાળી ભૂકંપ માનવામાં આવે છે. મુખ્ય કારણ સાગાઈંગ ફોલ્ટ છે, જે ભારતીય અને સુન્ડા ટેક્ટોનિક પ્લેટો વચ્ચે આવેલું છે. 1200 કિમી લાંબા આ ફોલ્ટમાં દર વર્ષે 11-18 મીમીનો હલનચલન થાય છે, જે ઊર્જા એકઠી કરી ભવિષ્યમાં પણ મોટા ભૂકંપ લાવી શકે છે.
ભૂકંપ કેમ થાય છે?
જ્યારે ટેક્ટોનિક પ્લેટો એકબીજા પર ઘસાઈ કે સરકે છે, ત્યારે ભૌતિક દબાણના કારણે ભૂકંપ થાય છે. USGS અનુસાર, મ્યાનમારમાં થયેલો ભૂકંપ સ્ટ્રાઈક-સ્લિપ ફોલ્ટિંગથી થયો, જેમાં પ્લેટો આડી ખસી હતી. ભૂકંપની તીવ્રતા અને નુકસાન માપવા માટે વૈજ્ઞાનિકો મોમેન્ટ મેગ્નિટ્યુડ સ્કેલનો ઉપયોગ કરે છે.
ઈતિહાસમાં મ્યાનમારમાં મોટા ભૂકંપ
1900 પછી, 7.0થી વધુ તીવ્રતાના છ થી વધુ ભૂકંપ નોંધાયા છે. 1990માં 7.0 તીવ્રતાનો ભૂકંપ 32 ઈમારતો ધરાશાયી કરાવી ચૂક્યો છે, જ્યારે 2016માં 6.9 તીવ્રતાનો ભૂકંપ થયો હતો.
મ્યાનમારમાં ભૂકંપનું જોખમ હજી ટળ્યું નથી. સંભવિત ભવિષ્યની આપત્તિ માટે તકેદારી રાખવી જરૂરી છે.
