Mahesh Vasava: મહેશ વસાવાનો ભાજપ છોડવાનો નિર્ણય અને મનસુખ વસાવાની ધડાકેદાર ટિપ્પણીઓથી રાજકીય પારો ચઢ્યો!
Mahesh Vasava: ગુજરાતની રાજકીય જમીન પર ફરીથી ચકચાર મચી ગઈ છે. આદિવાસી ક્ષેત્રમાં દિગ્ગજ નેતા તરીકે ઓળખાતા મહેશ વસાવાએ ભારતીય જનતા પાર્ટીથી રાજીનામું આપતાં સમગ્ર વિસ્તારમાં રાજકીય ગરમાવો વધી ગયો છે. ખાસ કરીને દક્ષિણ ગુજરાતના આદિવાસી પત્તા – અંબાજીથી લઈ ઉંમરગામ સુધીમાં રાજકીય ગરમાવો અનુભવાઈ રહ્યો છે.
રાજીનામા પાછળનો સ્ફોટક કારણ
મહેશ વસાવાએ રાજીનામા બાદ જણાવ્યું કે, “ભાજપ અને કોંગ્રેસ બંનેને અમે વર્ષોથી ઓળખીએ છીએ, પણ ભાજપે જે વિકાસના વાયદા કર્યા હતા, તે જમીન પર ક્યારેય ઉતર્યા નથી. રસ્તાઓથી લઈને પીવાના પાણી જેવી મૂળભૂત સમસ્યાઓમાં અમારા વિસ્તારના લોકો હજી પણ ઝઝૂમી રહ્યા છે.”
તેમણે સ્પષ્ટતા કરી કે તેમની લડાઈ હક માટે છે, હોદ્દા માટે નહીં. “અમે લોકહિત માટે ભાજપમાં જોડાયા હતાં, પણ જ્યારે લોકોને ન્યાય નહીં મળે, ત્યારે રાજીનામું આપવું જ યોગ્ય પગલું બની જાય છે,” તેમ મહેશ વસાવાએ કહ્યું.
મનસુખ વસાવાનો પ્રહાર
મહેશ વસાવાના રાજીનામા પર ભાજપના વરિષ્ઠ નેતા અને સાંસદ મનસુખ વસાવાએ કડક પ્રતિક્રિયા આપી છે. તેમણે મહેશ વસાવાનું પગલું ઉતાવળું ગણાવતાં જણાવ્યું કે, “મહેશભાઈને આમંત્રણ હોવા છતાં કેટલીક મહત્વની બેઠકમાં તેઓ હાજર નહોતા રહેતા. હવે રાજીનામું આપી એ વાતે દેખાડો કરે છે.”
મનસુખ વસાવાએ વધુમાં જણાવ્યું કે, “ભાજપની રાષ્ટ્રવાદી વિચારધારા છે. જે લોકોને પક્ષના આ મૂળ મૂલ્યો સાથે દૂરસ્થતા હોય, તેઓ લાંબા સમય સુધી ટકી શકતા નથી. મહેશભાઈ જ્યારે ભાજપમાં જોડાયા હતા ત્યારે જ એમને સ્પષ્ટ કરવામાં આવ્યું હતું કે પક્ષના સિદ્ધાંતોને માનનારા લોકો માટે જ અહીં સ્થાન છે.”
‘ભાજપને કોઈ ખતમ કરી શકે નહીં’ – મનસુખ વસાવા
મનસુખ વસાવાએ કટાક્ષભર્યું નિવેદન આપતાં કહ્યું કે, “સાત જન્મ લઈ લો, છતાં કોઈ પણ ભાજપ કે RSSને ખતમ કરી શકે નહીં. જેને પાર્ટી ખતમ કરવાની વાત કરવી છે, તે પોતે રાજકારણમાંથી બહાર થઈ જાય છે.”
તેમણે વધુમાં ઉમેર્યું કે, “કોંગ્રેસ સહિત તમામ પક્ષો ભાજપની તાકાત સારી રીતે જાણે છે. મહેશ વસાવાએ જે નિર્ણય લીધો છે, તે લાગણીઓમાં લેવાયેલો છે.”
