Imran Masood ઓપરેશન સિંદૂર પર કોંગ્રેસનો સમર્થનભર્યો સંદેશ: ‘સેનાની બહાદુરીને સલામ, આતંકવાદ સામે કડક પગલાં જરુરી’
Imran Masood કોંગ્રેસના સાંસદ ઇમરાન મસૂદે ભારતીય સેના દ્વારા હાથ ધરવામાં આવેલા ઓપરેશન સિંદૂરની ખુલ્લી પ્રશંસા કરી છે અને કહ્યું છે કે આતંકવાદ સામે કડક પગલાં લેવા માટે આખો દેશ એકસાથે ઉભો છે. તેમણે જણાવ્યું કે “મારો ઉદ્દેશ છે કે આતંકવાદનો ખાત્મો થવો જોઈએ અને ભારતીય સેના એ જ કર્યું છે. હું શબ્દોમાં કટાક્ષ કરવા માંગતો નથી, માત્ર એટલું કહેવા માંગું છું કે સેના દેશના સુરક્ષામાં જે ભૂમિકા ભજવી રહી છે તે અભિનંદનયોગ્ય છે.”
પહેલગામમાં 22 એપ્રિલે થયેલા આતંકવાદી હુમલા બાદ ભારતીય સેના દ્વારા શરૂ કરાયેલ ઓપરેશન સિંદૂર અંતર્ગત પાકિસ્તાન અને પાકિસ્તાની કબજાવાળા કાશ્મીર (પીઓકે)માં 9 આતંકવાદી ઠેકાણાઓનો નાશ થયો છે. આ હવાઈ હુમલામાં ભારતે ખુબ જ નિશ્ચિત લક્ષ્યાંક રાખી માત્ર આતંકવાદી સંસ્થાઓને નિશાન બનાવ્યા હતા.
કોંગ્રેસ સાંસદે કહ્યું કે વિપક્ષ દરેક રાષ્ટ્રહિતના નિર્ણયો પાછળ અડગ રીતે ઉભો છે. “સરકાર આતંકવાદ સામે જે પણ પગલાં લેશે, અમે તેને સંપૂર્ણ સમર્થન આપીશું,” એમ ઈમરાન મસૂદે જણાવ્યું હતું. તેમણે વધુમાં કહ્યું કે રાહુલ ગાંધી પહેલાના જ દિવસે જાહેરમાં કેન્દ્ર સરકારને ટેકો આપવાની વાત કરી હતી.
મેરઠમાં તાજેતરમાં દેશદ્રોહના આરોપમાં ત્રણે યુવકોની ધરપકડ અંગે મસૂદે કહ્યું કે આવા લોકો દેશમાં સહન ન કરવાં જોઈએ. “આપણા દેશમાં રહીને, કમાઈને અને પછી પાકિસ્તાનની તરફદારી કરવા વાળાઓ સામે કડકમાં કડક પગલાં લેવાં જોઈએ,” એમ તેમણે સ્પષ્ટ કહ્યું.
આ નિવેદનોથી સ્પષ્ટ થાય છે કે ઓપરેશન સિંદૂરને માત્ર શાસક પક્ષનો જ નહીં, પરંતુ વિપક્ષનો પણ પૂરતો ટેકો મળ્યો છે અને દેશવ્યાપી સર્વસંમતિથી આતંકવાદનો સામનો કરવાનો સંકેત મળ્યો છે.
