Crops seeds with brochures: હવે દરેક પાકના બીજ સાથે મળશે માહિતીભર્યો બ્રોશર, કેન્દ્ર સરકારનો મહત્વનો નિર્ણય
Crops seeds with brochures: કેન્દ્રીય કૃષિ મંત્રાલયે હવે તમામ પાકના બીજ માટે એક મોટો નિર્ણય લીધો છે. મંત્રાલયે તમામ બીજ ઉત્પાદક અને વિતરણ કરતી કંપનીઓને આદેશ આપ્યો છે કે હવે તેઓ દરેક બિયારણ સાથે એક માહિતીસભર બ્રોશર આપશે. આ બ્રોશરમાં બીજના પ્રકારથી લઈ પાકના સંચાલન સુધીની તમામ વિગતો મળી રહેશે. અગાઉ 15 જાન્યુઆરી 2025ના રોજ આ નિયમ ફક્ત કપાસ માટે લાગુ કરવામાં આવ્યો હતો, પરંતુ હવે તમામ પાકો માટે ફરજિયાત બનાવવામાં આવ્યો છે.
શા માટે ફક્ત કપાસ?
જ્યારે આ નિયમ માત્ર કપાસ માટે લાગુ કરવામાં આવ્યો હતો, ત્યારે કેટલાક બીજ ઉત્પાદકો અને ખેડૂત સંગઠનો દ્વારા આ નિર્ણયનો વિરોધ થયો હતો. તેમની માંગ હતી કે અન્ય પાકો માટે પણ આવી જ સુવિધા આપવી જોઈએ. કપાસના વધતા જીવાત ઉપદ્રવ અને ભાવની અસ્થિરતાના કારણે હવે ખેડૂત મકાઈ અને અન્ય પાક તરફ ઝુકી રહ્યા છે. દેશમાં કપાસનું વાવેતર 130 લાખ હેક્ટરથી ઘટીને 113 લાખ હેક્ટર રહી ગયું છે. આ પૃષ્ઠભૂમિમાં જ મંત્રાલયે નવી દિશામાં પગલાં લીધાં છે.
શું માહિતી હશે બ્રોશરમાં?
બ્રોશરમાં નીચેની માહિતી સમાવિષ્ટ રહેશે:
- બીજની જાતિ અને તેનો પરિપક્વ સમય
- જમીનના પ્રકારની યોગ્યતા
- સિંચાઈ અને ખાતર વ્યવસ્થાપન
- ફાઈબરની ગુણવત્તા અને ઉપજનો અંદાજ
- પાક સંચાલન અને રોગનિદાન
આ ઉપરાંત, પેકેટ પર આ માહિતી સ્થાનિક ભાષામાં તેમજ અંગ્રેજીમાં આપવી ફરજિયાત છે.
ખેડૂત સંગઠનોએ ઉઠાવી હતી માંગણી
ખેડૂત સંગઠનોના દબાણ બાદ, કેન્દ્ર સરકારે આ નિર્ણયમાં પરિવર્તન કર્યો છે. ‘સીડ ઈન્ડસ્ટ્રી ટેકનિકલ એલાયન્સ’ના વડા મિલિંદ દામલેએ નીતિન ગડકરી સાથે મુલાકાત કરી અને મુદ્દો ઉઠાવ્યો હતો. કેટલીક બીજ કંપનીઓએ QR કોડ આપવાનો વિકલ્પ પણ સૂચવ્યો હતો, પણ સરકારે સ્પષ્ટ કર્યું કે છાપેલા બ્રોશર આપવો ફરજિયાત રહેશે.
આ નિર્ણયથી ખેડૂતોએ પાક વિશે વિગતવાર માહિતી મેળવી શકાશે, જેના કારણે પાકનું સંચાલન વધુ યોગ્ય રીતે શક્ય બનશે અને ઉપજમાં પણ સુધારો થઈ શકે છે.
