Anita Anand જાણો અનિતા આનંદની રાજકીય સફર વિશે…
Anita Anand કેનેડાના રાજકારણમાં ભારતીય મૂળની મહિલાઓની વધતી ભૂમિકા ફરી એકવાર સામે આવી છે. તાજેતરમાં, વડા પ્રધાન માર્ક કાર્નેએ તેમના નવા મંત્રીમંડળમાં અનિતા આનંદને વિદેશ મંત્રી તરીકે નિયુક્ત કર્યા છે. ભારતના વિદેશ મંત્રી ડૉ. એસ. જયશંકરે તેમને આ મહત્વપૂર્ણ પદ પર નિયુક્તિ બદલ અભિનંદન પાઠવ્યા છે.
અનિતા આનંદ કોણ છે?
અનિતા આનંદનો જન્મ 1967 માં કેનેડાના નોવા સ્કોટીયા પ્રાંતમાં થયો હતો. તેમના માતાપિતા ભારતથી કેનેડા આવ્યા હતા. તેમની માતા પંજાબની હતી અને પિતા તમિલનાડુના હતા. અનિતાએ ક્વીન્સ યુનિવર્સિટી, ઓક્સફોર્ડ યુનિવર્સિટી અને ટોરોન્ટો યુનિવર્સિટીમાં અભ્યાસ કર્યો છે. તેઓ એક અનુભવી વકીલ અને પ્રોફેસર રહી ચૂક્યા છે.
અનિતા આનંદની રાજકીય સફર
2019માં અનિતા આનંદે ઓકવિલે મતવિસ્તારમાંથી સંસદ સભ્ય તરીકે રાજકારણમાં પ્રવેશ કર્યો. આ પછી તેમણે જાહેર સેવા અને પ્રાપ્તિ મંત્રી, સંરક્ષણ મંત્રી, પરિવહન મંત્રી જેવા મહત્વપૂર્ણ પદો પર સેવા આપી છે. કોવિડ-19 મહામારી દરમિયાન તેમણે રસી અને પીપીઈ કીટની ખરીદીમાં મહત્વપૂર્ણ ભૂમિકા ભજવી હતી.
વિદેશ મંત્રી તરીકે નવી ભૂમિકા
13 મે-2025ના રોજ વડા પ્રધાન માર્ક કાર્નેએ અનિતા આનંદને વિદેશ મંત્રી તરીકે નિયુક્ત કર્યા. અગાઉ આ પદ મેલાની જોલી પાસે હતું, જેમને હવે ઉદ્યોગ મંત્રી બનાવવામાં આવ્યા છે. અનિતા આનંદે ભગવદ્ ગીતા પર હાથ રાખીને શપથ લીધા હતા, જે તેમના ભારતીય મૂળ અને સાંસ્કૃતિક મૂલ્યોને પ્રતિબિંબિત કરે છે.
ભારત-કેનેડા સંબંધોમાં નવી આશા
અનિતા આનંદની નિમણૂક ભારત-કેનેડા સંબંધોમાં નવી ઉર્જા લાવશે તેવી અપેક્ષા છે. તેમનો ભારતીય બેકગ્રાઉન્ડ અને વૈશ્વિક દ્રષ્ટિકોણ બંને દેશો વચ્ચે સહયોગને વધુ મજબૂત બનાવી શકે છે. વિદેશ મંત્રી તરીકે અનિતા આનંદની નિમણૂક માત્ર કેનેડા માટે જ નહીં પરંતુ ભારતીય સમુદાય માટે પણ ગર્વની વાત છે. તેમની સફળતા સ્પષ્ટ કરે છે કે સખત મહેનત અને સમર્પણથી કોઈપણ ઊંચાઈ પ્રાપ્ત કરી શકાય છે
