Narmada Maiya Bridge suicide: નર્મદા મૈયા બ્રિજ કે આત્મહત્યાનું કેન્દ્ર? ભરૂચવાસીઓએ સુરક્ષા માટે ઉઠાવ્યો અવાજ

Narmada Maiya Bridge suicide: સુરક્ષા વિના બ્રિજ જીવલેણ સાબિત! નર્મદા મૈયા બ્રિજ પર ફરીથી પ્રશ્નચિહ્ન

Narmada Maiya Bridge suicide: ભરૂચ અને અંકલેશ્વર વચ્ચે નિર્મિત નર્મદા મૈયા બ્રિજ હાલમાં એક ગંભીર માનસિક આરોગ્યના મુદ્દાનું પ્રતિક બની રહ્યો છે. બ્રિજ પર વધી રહેલા આત્મહત્યાના બનાવોએ શહેરના નાગરિકોને ચિંતામાં મુકી દીધા છે. અત્યાર સુધીમાં અંદાજે 40થી વધુ લોકો નર્મદા નદીમાં છલાંગ લગાવીને પોતાનું જીવનનો અંત લાવ્યા છે.

સ્થાનિકોની લાંબા સમયથી માગ – ‘બ્રિજ સુરક્ષિત બનાવો’

છેલ્લા ત્રણ વર્ષથી ભરૂચના જાગૃત નાગરિકો સરકાર અને તંત્રને પત્રો લખી રહ્યાં છે કે બ્રિજની બંને બાજુ લોખંડની જાળીઓ અથવા અવરોધક દોરાઓ લગાવવામાં આવે, જેથી આત્મહત્યાના બનાવો અટકાવી શકાય. તંત્રને અનેકવાર મૌખિક અને લેખિત રજૂઆતો કરવા છતાં હજુ સુધી કોઈ ગંભીર પગલાં લેવામાં આવ્યા નથી.

‘સુસાઇડ પોઈન્ટ’ બની ગયેલો બ્રિજ

ભરૂચના યોગી પટેલ જણાવે છે કે, “આ બ્રિજ હવે આત્મહત્યાનું કેન્દ્ર બની ગયું છે. ગુજરાતમાં ઘણા બ્રિજ પર આત્મહત્યા અટકાવવા સુરક્ષા વ્યવસ્થા કરાઈ છે, ત્યારે અહીં તંત્ર કેમ સૂતું છે?” તેમનું કહેવું છે કે તેઓએ રાજ્ય સરકારથી લઈને જિલ્લાની પ્રશાસકીય તંત્ર સુધી રજૂઆતો કરી છે પણ અમલ શૂન્ય રહ્યો છે.

સામાજિક કાર્યકરોની તાકીદ – પોલીસ બંદોબસ્ત અને સીસીટીવી જરૂરી

સામાજિક કાર્યકર ધર્મેશ સોલંકી પણ આ મુદ્દે તંત્ર પર ઉંગલી ઊંચકે છે. તેઓ કહે છે કે, “આજ સુધીમાં 35થી 40થી વધુ આત્મહત્યાના પ્રયાસો થઈ ચૂક્યા છે. અમદાવાદ અને વડોદરા જેવા શહેરોમાં જેટલાં પગલાં લેવાયા છે, એ જ માળખું અહીં અમલમાં લેવાય તો ઘણાં જીવ બચી શકે.”

તેમણે તાત્કાલિક આ જ પગલાંની માંગણી કરી:

બ્રિજની બંને બાજુ લોખંડની જાળીઓ લગાવવી

24×7 પોલીસ બંદોબસ્ત ગોઠવવો

સીસીટીવી કેમેરાની સુવિધા

નદી કિનારે ફાયર અને રેસ્ક્યુ ટીમ તૈનાત કરવી

વિકાસ માટે બનાવાયો, ભય માટે ઓળખાવા લાગ્યો

₹430 કરોડના ખર્ચે બનેલો નર્મદા મૈયા બ્રિજ વર્ષ 2021માં જાહેર જનતા માટે ખુલ્લો મુકાયો હતો. ભરૂચ અને અંકલેશ્વરના ટ્રાફિકના ભારને ધ્યાને લઈ આ ચાર માર્ગીય ફોર-વે બ્રિજ બનાવવામાં આવ્યો હતો. જોકે, હાલમાં તેનો ઉપયોગ લોકો જીવન ત્યાગ કરવા માટે કરે છે તે અત્યંત દુઃખદ છે.

બચાવના પ્રયત્નો પણ અજમાયા

બ્રિજ પરથી ઝંપલાવનારાઓને બચાવવાના અનેક પ્રયત્નો પણ થયા છે. નદીમાં કાર્યરત માછીમારોની મદદથી કેટલાય લોકો બચી ગયા છે, પણ ઘણાને મોત ટાળી શકાયું નથી. ચિંતાની વાત એ છે કે માત્ર ભરૂચના નહીં, પરંતુ આસપાસના જિલ્લાઓના લોકો પણ અહીં આવીને આત્મહત્યાની કોશિશ કરે છે.

નર્મદા મૈયા બ્રિજ હવે માત્ર વિકાસની દ્રષ્ટિએ નહિ, પણ માનસિક આરોગ્ય અને જનસુરક્ષા માટે પણ મહત્વનો મુદ્દો બની ગયો છે. તાત્કાલિક પગલાં લેવામાં ન આવે તો આ બ્રિજ ઉપરનાં વધુ જીવહાનિકારક બનાવો ભવિષ્યમાં પણ જોવા મળી શકે છે. ભરૂચવાસીઓની માંગ – “હવે તો તંત્ર જાગે!” – માત્ર માંગ નહીં, પણ સમયની તાતી જરૂરિયાત છે.