Ahmedabad plane crash : પ્રત્યક્ષદર્શીઓએ જણાવ્યું કે શરૂઆતમાં સમજાતું નહોતું કે શું થયું, અવાજ એટલો જોરદાર હતો કે લોકો દહેશતમાં ઘરોમાંથી બહાર નીકળી આવ્યા
Ahmedabad plane crash : અમદાવાદમાં થયેલી ભયાનક વિમાન દુર્ઘટનાએ સમગ્ર દેશમાં ભય અને શોક ફેલાવી દીધો છે. જ્યારે દુર્ઘટના બની, ત્યારે ઘણા લોકો નજીકમાં હાજર હતા – જેમણે પોતાની આંખોથી ભયાનક દ્રશ્યો જોયાં અને આજે પણ તે ઝલક ભુલાવી શકતા નથી. આવો જાણીએ અમુક એવા લોકોના અનુભવો, જેમણે આ દુર્ઘટનાને જીવંત અનુભવ્યું.
“અવાજ એટલો ભયાનક હતો કે લાગ્યું કાનના પડદા ફાટી જશે”
રેખા નામની મહિલા, જે છેલ્લા 13 વર્ષથી દુર્ઘટનાસ્થળ નજીક રહે છે, જણાવ્યું કે તે દિવસની જેમ રોજની કામગીરીમાં વ્યસ્ત હતી ત્યારે અચાનક એક ધડાકાભર્યો અવાજ થયો. તેણીએ કહ્યું, “મને બોમ્બ ફાટ્યો હોય તેમ લાગ્યું. ઘરમાં બધું ધ્રૂજી ગયું, ડાઇનિંગ ટેબલ પણ હલવા લાગ્યું. તરત જ હું બહાર દોડી ગઈ. બહાર આવી તો સમજાયું કે વિમાન નીચે પડ્યું છે.”
તેણે ઉમેર્યું કે પ્લેનના ભાગો રસ્તા પર અને ઘરોની પાસે છૂટા પડેલા હતા. આખો વિસ્તાર ધુમાડાથી ઢંકાઈ ગયો હતો.
“મને લાગ્યું કે ભૂકંપ કે તોફાન આવ્યો છે”
બહાદુર નામના યુવાને કહ્યું કે તે ઘટનાસ્થળથી થોડે દૂર રહે છે. તેણે પણ ખૂબ જ જોરદાર અવાજ સાંભળ્યો અને તરત જ બહાર નીકળ્યો. આસપાસના લોકો ભાગદોડ કરવા લાગ્યા. તેણે કહ્યું, “જ્યાં જોઈ ત્યાં ધુમાડો, આગ, અને લોકોના ચીસાચીસ હતી. મને તો પહેલા લાગ્યું કે ભૂકંપ આવ્યો છે અથવા મોટા પાયે તોફાન.”
જ્યારે બહાદુરને ખબર પડી કે નજીકના હોસ્ટેલમાં વિદ્યાર્થીઓ ફસાયા છે, ત્યારે તેણે તુરંત સૈનિકોની સાથે મદદ કરી… તેણે કહ્યુ કે, “સેના સાથે મળીને મેં કાટમાળમાંથી પાંચ વિદ્યાર્થી જીવતા બહાર કાઢ્યા. તેમની હાલત બહુ ગંભીર હતી.”
“વિમાન ફાટ્યું અને આખો વિસ્તાર ધુમાડાથી ઢંકાઈ ગયો”
પ્રિયાંશુ નામના વધુ એક યુવાને કહ્યું કે તે દુર્ઘટના સમયે પોતાના ઘરમાં હતો. તેણે જણાવ્યું, “વિમાનનો ધડાકો સાંભળતાં જ હું ઊભો થઈ ગયો. પછી આખો વિસ્તાર કાળા ધુમાડાથી ભરાઈ ગયો હતો. એ ધુમાડા વચ્ચે કોઈ ચીસો પડી રહી હતી, ક્યાંક આગ લાગી હતી. હું ભયભીત પણ થયો અને દુ:ખી પણ, કારણ કે લોકોએ પળોમાં પોતાના લોકો ગુમાવ્યા હતા.”
