Surat Flood Rescue : સુરતમાં ધોધમાર વરસાદે સર્જી જળબંબાકાર સ્થિતિ
Surat Flood Rescue : સુરતમાં છેલ્લા ત્રણ દિવસથી ધોધમાર વરસાદના કારણે શહેરના અનેક વિસ્તારો જળમય બન્યા છે. ખાસ કરીને ગીતાનગર વિસ્તારમાં ત્રણથી ચાર ફૂટ સુધી પાણી ભરાઈ જતાં લોકો મુશ્કેલીમાં મુકાયા છે. એ સમયે એક 8 મહિના ગર્ભવતી મહિલાની તબિયત અચાનક લથડતાં તંત્ર દ્વારા તાત્કાલિક રેસ્ક્યૂ કામગીરી હાથ ધરવામાં આવી હતી.
ગૌરીબેન શર્માની જીવ બચાવતી કામગીરી
ગીતાનગરમાં રહેતા સંદીપભાઈ શર્માની પત્ની ગૌરીબેનની તબિયત લથડતાં તાત્કાલિક તંત્રને જાણ કરવામાં આવી. ચારે બાજુ ભરાયેલા પાણીમાં હોસ્પિટલ સુધી જવું મુશ્કેલ બન્યું હતું. ફાયર બ્રિગેડના જવાનોએ બોટ મારફતે ઘર સુધી પહોંચીને ગૌરીબેનને સલામત રીતે બોટમાં બેસાડી પર્વત પાટિયાની શ્રીજી હોસ્પિટલમાં પહોંચાડ્યાં. હાલ ગૌરીબેનની તબિયત સામાન્ય છે.
પતિએ તંત્રનો આભાર માન્યો
ગૌરીબેનના પતિ સંદીપભાઈએ આ મુશ્કેલ ઘડીમાં તંત્ર તથા ખાસ કરીને ફાયર બ્રિગેડનો દિલથી આભાર વ્યક્ત કર્યો. તેમણે જણાવ્યું કે તાત્કાલિક કામગીરીએ તેમની પત્ની તથા ગર્ભસ્થ શિશુનું જીવન બચાવ્યું.
વેપારીઓને કરોડો રૂપિયાનું નુકસાન
સુરતના વરાછા તથા રઘુકુળ ટેક્સટાઈલ માર્કેટ સહિત અનેક વિસ્તારોમાં પૂરનું પાણી ઘૂસતાં વેપારીઓને ભારે નુકસાન વેઠવું પડ્યું છે. ખાસ કરીને બેઝમેન્ટમાં આવેલી દુકાનોમાં 8થી 10 ફૂટ સુધી પાણી ભરાઈ જતાં લાખો રૂપિયાનું માલસામાન પલળી જવાથી ખરાબ થઈ ગયું છે.જીગર ઠક્કરે જણાવ્યું કે તેમની દુકાનમાં લેપટોપ, પ્રિન્ટર તથા અન્ય સાધનો સહિત લગભગ દોઢ કરોડ રૂપિયાનું નુકસાન થયું છે. દુકાનમાં ભરાયેલા પાણીના કારણે તમામ ચીજવસ્તુઓ પલળી જતાં સ્વાહા થઈ ગયા હતા.
પાલિકાની નિષ્ફળતા સામે વેપારીઓમાં રોષ
વેપારીઓનું કહેવું છે કે પાલિકાની પૂર્વ ચોમાસાની કામગીરી યોગ્ય રીતે કરવામાં આવી હોત તો આ સ્થિતિનો સામનો કરવો જ ન પડત. તેઓ તંત્ર સામે તાત્કાલિક વળતર તથા ખાડી પૂરના કાયમી નિરાકરણ માટે કાર્યવાહી કરવાની માંગ કરી રહ્યા છે.
રઘુકુળ ટેક્સટાઇલ માર્કેટમાં જાળવણીનો અભાવ
રઘુકુળ ટેક્સટાઇલ માર્કેટમાં ભરાયેલા વરસાદી પાણીમાં મોટા પ્રમાણમાં સાડીનો જથ્થો પલળી જતાં વેપારીઓને કરોડો રૂપિયાનું નુકસાન થયું છે. ઉત્તરપ્રદેશ, મધ્યપ્રદેશ તથા બિહાર જેવા રાજ્યોમાં મોટા ઓર્ડર મોકલવાનાં હતા, જે હવે નુકસાનમાં ફેરવાઈ ગયા છે.
દર વર્ષે પૂરની સમસ્યા અને તંત્રનું ઢીલુ વલણ
વેપારીઓનું કહેવું છે કે દર વર્ષે ચોમાસાની શરૂઆતમાં જ ખાડી પૂરની સમસ્યાની પુનરાવર્તન થાય છે, પરંતુ તંત્ર દ્વારા કોઈ કાયમી ઉકેલ લાવવામાં નથી આવતો. નેતાઓ માત્ર મુલાકાત લઈને આશ્વાસન આપે છે, પરંતુ વાસ્તવમાં કોઈ પગલાં લેવાતા નથી.
તાત્કાલિક વળતર માટે વેપારીઓનો આગ્રહ
હોટફિક્સ દુકાનદાર નિલેશભાઈ ભાયાણીએ જણાવ્યું કે અનેક વખત પૂરથી ધંધો ચોપટ થયો છે, પણ કોઈ વળતર મળ્યું નથી. વેપારીઓ તંત્ર પાસેથી તાત્કાલિક પગલાં તથા ભવિષ્યમાં પૂર અટકાવવા માટે મજબૂત આયોજન કરવાની માંગ કરી રહ્યા છે.
