વોકલ ફોર લોકલના સંકલ્પને મજબૂત કરતી વાઇબ્રન્ટ ગુજરાત કોન્ફરન્સ
વાઇબ્રન્ટ ગુજરાત રિજનલ કોન્ફરન્સ–૨૦૨૬ માત્ર ઉદ્યોગો જ નહીં, પરંતુ ભારતની વિરાસત અને હસ્તકલાનું પણ મહાકુંભ બની રહી. “રિજનલ એસ્પિરેશન, ગ્લોબલ એમ્બિશન”ના સૂત્રને સાર્થક કરતા આ કાર્યક્રમમાં ગામડાંના અંતરિયાળ વિસ્તારોના કલાકારોને પોતાની કલાનું પ્રદર્શન કરવાની અમૂલ્ય તક મળી. કોન્ફરન્સમાં મુલાકાતીઓ માટે વિવિધ કલાત્મક સ્ટોલ્સ આકર્ષણનું કેન્દ્ર બન્યા હતા, જ્યાં આધુનિકતા અને પરંપરાનો અનોખો સમન્વય જોવા મળ્યો હતો.
લિપણ આર્ટના કલાકાર પૂજાબેનની વડાપ્રધાન સાથે મુલાકાત
વર્ષ ૨૦૧૭થી લિપણ આર્ટના માધ્યમથી કલાને જીવંત રાખનાર પૂજાબેન ચૌહાણ માટે આ કોન્ફરન્સ યાદગાર બની ગઈ. વડાપ્રધાન શ્રી નરેન્દ્રભાઈ મોદીએ રૂબરૂ તેમના સ્ટોલની મુલાકાત લઈને કલાની પ્રશંસા કરી હતી. પૂજાબેને ભાવુક થતા જણાવ્યું કે, વડાપ્રધાનશ્રી દ્વારા કલાકારોની કદર થવી એ જ અમારા માટે સૌથી મોટું બહુમાન છે. સરકાર દ્વારા પૂરા પાડવામાં આવેલા આ વૈશ્વિક મંચને કારણે સ્થાનિક કલાકારોને નવી ઓળખ અને બજાર મળી રહ્યું છે.
વેસ્ટમાંથી બેસ્ટ: નાળિયેરના છોતરાંમાંથી કલાત્મક સર્જન
ભાવનગરના કલાકાર શાંતિભાઈ ગોયાણીએ પર્યાવરણ જાળવણી અને કલાનો સુંદર સંગમ રજૂ કર્યો હતો. તેઓ નાળિયેરના નકામા છોતરાંમાંથી અદભૂત કલાત્મક ચીજવસ્તુઓ તૈયાર કરે છે. તેમણે સરકારનો આભાર માનતા કહ્યું કે, નિઃશુલ્ક સ્ટોલ ફાળવણીને કારણે તેમને આર્થિક ટેકો મળ્યો છે અને વેચાણ પણ ખૂબ સારું રહ્યું છે. કચરામાંથી કંચન બનાવવાની તેમની આ આવડતે ‘વોકલ ફોર લોકલ’ના સંકલ્પને વધુ મજબૂત બનાવ્યો છે.
ભારતીય સાંસ્કૃતિક વારસાનું વૈશ્વિક બ્રાન્ડિંગ
૧૫ જાન્યુઆરીના રોજ આ કોન્ફરન્સ સંપન્ન થઈ, પરંતુ તે કલાકારોના જીવનમાં આત્મવિશ્વાસનું નવું કિરણ છોડતી ગઈ. કોન્ફરન્સ દરમિયાન હજારો મુલાકાતીઓએ સ્થાનિક ચીજવસ્તુઓની ખરીદી કરી, જેનાથી ગ્રામીણ અર્થતંત્રને વેગ મળ્યો છે. આ ઐતિહાસિક પહેલ દ્વારા ગુજરાતની હસ્તકલા વિશ્વના નકશા પર વધુ મજબૂતીથી ઉભરી છે અને આગામી સમયમાં આ કલાકારો માટે નિકાસના નવા દ્વાર ખુલશે તેવી અપેક્ષા સેવાઈ રહી છે.
