LRD ભરતી-સરકારની હાલત સુડી વચ્ચે સોપારી જેવી

ગુજરાતમાં એક આંદોલન હજુ તો માંડ શાંત પડે છે ત્યાં જ બીજા કોઈ આંદોલનનાં પડઘમ વાગવા લાગે છે. રાજ્યમાં વારાફરતી પાટીદાર આંદોલન, દલિત આંદોલન અને બિનસચિવાલયના વિદ્યાર્થીઓનું આંદોલન હજુ તો માંડ ઠંડુ પડ્યું હતું ત્યાં સરકારની અણઘડ નીતિઓના પરિણામે લોકરક્ષક દળમાં ભરતી મામલે પણ એસટી અનામતની મહિલાઓ એક તરફ વિરોધ કરતી રહી છે ત્યાં હવે બિનનામત મહિલા ઉમેદવારોએ પણ આંદોલનનો બુંગીયો ફૂંકી દીધો છે. LRDની ભરતીમાં અનામત કેટેગરીની મહિલા ઉમેદવારોનું મેરિટ ઊંચુ હોવા છતાં જનરલ કેટેગરીની મહિલા અનામતમાં તેમને સ્થાન ન મળ્યું હોવાનો આક્ષેપ થઈ રહયો છે. પણ સરકારના દાવા મુજબ રાજ્ય સરકારના તા.1-8-2018ના એક ઠરાવ મુજબ અનામત કેટેગરીની મહિલાઓનું પરિણામ જનરલ કેટેગરીની મહિલાઓ કરતા વધુ હોવા છતાં તેમને નોકરી ન મળી આ હતી. જેથી આ ઠરાવને રદ કરવાની માંગણી સાથે છેલ્લા બે મહિનાથી પાટનગરમાં અનામત વર્ગની મહિલા ઉમેદવારો ઉપવાસ આંદોલન કરી રહી છે. આ આંદોલન સામે આખરે સરકાર ઝૂકી હતી અને ઠરાવમાં સુધારો કરવાની જાહેરાત કરી હતી. આ સાથે જ હવે બિનઅનામત વર્ગની મહિલાઓએ ઠરાવમાં સુધારો કરવાથી તેમને નુકસાન થશે એ બીકથી તેમણે સરકાર સામે બલોયાં ચડાવ્યાં છે. ગત સાંજે બિનઅનામત વર્ગની બહેનોને મુખ્યમંત્રી કાર્યાલય ખાતે વિરોધ પ્રદર્શન કરતી રોકવા માટે પોલીસે તેમની અટકાયત કરી છે. હવે બન્ને બાજુથી સરકારને દબાવ થતાં ગુજરાત સરકારની હાલત સાપે છછુંદર ગળ્યા જેવી થઈ છે.